இலங்கையில் அறிமுகமாகும் PhonePe செயலி.. இனி பேமெண்ட் ரொம்ப ஈசி!

கொழும்பு: இந்தியாவில் யூபிஐ பேமெண்ட்-ல் முடிசூடா மன்னனாக இருக்கும் PhonePe ஆப் தற்போது இலங்கையில் அறிமுகப்படுத்தப்பட்டுள்ளது. LankaPay உடன் கூட்டு சேர்ந்து இலங்கையில் PhonePe UPI பேமெண்ட்-ஐ அறிமுகப்படுத்தியுள்ளது. இதன் மூலம் இந்திய சுற்றுலாப் பயணிகள் இலங்கைக்குச் செல்லும் போது, எளிதாக LankaPay QR குறியீட்டை ஸ்கேன் செய்து பேமெண்ட் செய்ய முடியும் என்று கூறப்படுகிறது.

PhonePe பேமெண்ட் செயல்முறை தற்போது இலங்கையில் அறிமுகப்படுத்தப்பட்டுள்ளது. இது இந்தியர்கள் இலங்கைக்கு சுற்றுலா செல்வதை ஊக்குவிக்கும் வகையில் அறிமுகப்படுத்தப்பட்டுள்ளது. இந்த அப்டேட்டின் மூலம், இலங்கைக்குச் சுற்றுலா செல்லும் இந்தியர்கள் LankaPay QR குறியீட்டை ஸ்கேன் செய்து பணப்பரிவர்த்தனை செய்ய முடியும். கையில் பணத்தை எடுத்துச் செல்லாமல், எக்ஸ்சேஞ்ச் ரேட் போன்ற காரணிகளை கணக்கிடாமல் பாதுகாப்பாகவும் விரைவாகவும் பணம் செலுத்த முடியும்.

நாணய மாற்று விகிதம் என்பது ஒரு நாட்டின் நாணயத்தை மற்றொரு நாட்டின் நாணயத்தில் மாற்றும் விகிதம் ஆகும். உதாரணமாக, அமெரிக்க டாலருக்கும் இந்திய ரூபாயுக்கும் இடையிலான மாற்று விகிதம் 1 USD = 75 ரூபாய் என்று இருந்தால், 1 அமெரிக்க டாலரை 75 இந்திய ரூபாயாக மாற்றலாம். இது சர்வதேச வர்த்தகம் மற்றும் சுற்றுலாவில் மிக முக்கியமானது. மாற்று விகிதங்கள் பல்வேறு காரணிகளை அடிப்படையாகக் கொண்டு மாறுபடுகின்றன.

எனவே, வெளிநாட்டிற்குப் பயணம் செய்யும்போது அல்லது சர்வதேச பரிவர்த்தனைகளில் ஈடுபடும் போது, நாணய மாற்று விகிதத்தை புரிந்துகொள்வது அவசியமாகும். பணத்தைக் கொண்டு உங்களுடைய பில்களைச் செலுத்தும் போது, இந்த மாற்று விகிதத்தினால், நீங்கள் குழம்பக்கூடும். அதற்கு உதவும் வகையில் தற்போது PhonePe பணப்பரிவர்த்தனையை எளிதாக்கியுள்ளது.

இதனால் நீங்கள் UPI மற்றும் LankaPay நேஷனல் பேமெண்ட் நெட்வொர்க் மூலம் எளிதாக பணம் செலுத்தலாம். பணத்தை எடுத்துச் செல்லாமல் நாணய மாற்றங்களைக் கணக்கிடாமல் பாதுகாப்பாகவும் விரைவாகவும் பணம் செலுத்த முடியும். LankaPay QR குறியீட்டை ஸ்கேன் செய்து பேமெண்ட் செய்த பிறகு, இந்திய நாணயத்தில் தொகை டெபிட் செய்யப்படும் மற்றும் மாற்று விகிதமும் உங்களுக்கு காண்பிக்கப்படும்.

இந்திய சுற்றுலாப் பயணிகள் மற்றும் வணிகம் சார்ந்த பயணம் மேற்கொள்பவர்களுக்கு, இந்த புதிய அறிமுகம் உதவியாக இருக்கும். இதனை நினைத்து மகிழ்ச்சி அடைகிறோம் என்று LankaPay CEO சன்னா டி சில்வா கூறியுள்ளார்.

PhonePe செயலி 2016ஆம் ஆண்டு கொண்டுவரப்பட்டது. PhonePe டிஜிட்டல் பேமெண்ட் செயலியில் 520 மில்லியனுக்கும் அதிகமான பதிவு செய்யப்பட்ட பயனர்கள் உள்ளனர், மற்றும் 38 மில்லியன் வணிகர்களுக்கு, உங்களால் இதன் மூலம் பேமெண்ட் செய்ய முடியும். தினசரி 230 மில்லியன் பணப்பரிவர்த்தனைகள் PhonePe செயலி மூலம் செய்யப்படுகிறது.