பிக்சட் டெபாசிட்களுக்கான வட்டி விகிதத்தை 8.10% வரை உயர்த்திய முன்னணி வங்கி.. முதலீட்டாளர்கள் குஷி!

இந்தியாவின் முன்னணி பொதுத்துறை வங்கியான பஞ்சாப் நேஷனல் பேங்க் (PNB) பொது வாடிக்கையாளர்கள் மற்றும் மூத்த குடிமக்களுக்கு வழங்கப்படும் பிக்சட் டெபாசிட்களுக்கான வட்டி விகிதங்களை ஆகஸ்ட் 1-ஆம் தேதி 2024 முதல் திருத்தி உள்ளது. அதன்படி ரூ. 3 கோடி வரையிலான பிக்சட் டெபாசிட்களுக்கு வட்டி விகிதங்கள் மாற்றம் செய்யப்பட்டுள்ளன. அதன் விவரங்கள் குறித்து இந்தப் பதிவில் விரிவாக பார்ப்போம்.

400 நாட்கள் முதிர்வு காலம் கொண்ட FD-களில் அதிக சலுகைகளை PNB வங்கி வழங்குகிறது. 400 நாட்கள் கொண்ட FD-களில் பொது வாடிக்கையாளர்களுக்கு 7.3 சதவீதமும், 60 வயதுக்கு மேல் உள்ள மூத்த குடிமக்களுக்கு 7.8 சதவீதமும், 80 வயதுக்கு மேல் உள்ள மூத்த குடிமக்களுக்கு 8.10 சதவீதமும் வட்டி வழங்கப்படுகிறது.

PNB பேங்க் அதன் 1 வருட FD-களில், பொது வாடிக்கையாளர்களுக்கு 6.85% வட்டி விகிதத்தையும், மூத்த குடிமக்களுக்கு 7.35 % மற்றும் 80 வயதுக்கு மேல் உள்ள மூத்த குடிமக்களுக்கு 7.65 % வட்டி வழங்குகிறது.

2 முதல் 3 ஆண்டுகளுக்கான FD-களில், PNB பேங்க் 7.85 % வரை வட்டி வழங்குகிறது. அதில் பொது வாடிக்கையாளர்களுக்கு 7.05 %, மூத்த குடிமக்களுக்கு 7.55 % மற்றும் 80 வயதுக்கு மேல் உள்ள மூத்த குடிமக்களுக்கு 7.85 % வட்டி விகிதத்தை வழங்குகிறது.

PNB பலாஷ் திட்ட FD விகிதங்கள்: 1204 நாட்கள் மற்றும் 1895 நாட்கள் கொண்ட இரண்டு திட்டங்கள் PNB பலாஷ் திட்டத்தின் கீழ் வழங்கப்படுகின்றன. இது PNB நிறுவனம் தொடங்கப்பட்ட தினத்தை நினைவுகூரும் வகையில் அதன் வாடிக்கையாளர்களுக்கு வழங்குகிறது.

1204 நாட்கள் முதிர்வுக்காலம் கொண்ட FD-களில், பொது வாடிக்கையாளர்களுக்கு 6.45 %, மூத்த குடிமக்களுக்கு 6.95 % மற்றும் 80 வயதுக்கு மேல் உள்ள மூத்த குடிமக்களுக்கு 7.25 % வட்டி விகிதத்தை வழங்குகிறது.

1895 நாட்களுக்கான அதன் மற்றொரு FD திட்டத்தில் சற்று குறைவான வட்டி விகிதங்கள் வழங்கப்படுகிறது. பொது வாடிக்கையாளர்களுக்கு 6.40 %, மூத்த குடிமக்கள் 7.2 % மற்றும் 80 வயதுக்கு மேல் உள்ள மூத்த குடிமக்களுக்கு 7.25 % வட்டி வழங்கப்படுகிறது.

பேங்க் ஆஃப் இந்தியா FD விகிதங்கள்: பேங்க் ஆஃப் இந்தியா ரூ. 3 கோடி வரையிலான டெபாசிட்டுகளுக்கான FD விகிதங்களையும் ரூ.3 கோடி முதல் ரூ.10 கோடி வரையிலான டெபாசிட்களுக்கான FD விகிதங்களையும் மாற்றியுள்ளது. 7 நாட்கள் முதல் 10 ஆண்டுகள் வரையிலான FD-களுக்கு 3% முதல் 6% வரையிலான வட்டி விகிதங்களை வழங்குகிறது. 666 நாட்களுக்கு ரூ.3 கோடிக்கும் குறைவான டெபாசிட்டுகளுக்கு அதிகபட்சமாக 7.30% வட்டி விகிதத்தை வழங்குகிறது.