2026 பொங்கல் பண்டிகைக்கு ரூ.5,000 பரிசா? எகிறும் எதிர்பார்ப்பு.. தமிழக அரசு அறிவிப்பு வருமா?

தமிழர்களின் முக்கியப் பண்டிகைகளில் ஒன்றான பொங்கல் திருநாள் நெருங்கி வரும் வேளையில், இந்த ஆண்டு தமிழக அரசு பொங்கல் பரிசாக எவ்வளவு ரொக்கப் பணத்தை வழங்கும் என்ற எதிர்பார்ப்பு மக்கள் மத்தியில் அதிகரித்துள்ளது.

ஒவ்வோர் ஆண்டும் தமிழ்நாடு அரசு, பொங்கல் பண்டிகையை முன்னிட்டு சிறப்புப் பரிசுத் தொகுப்புடன் பணப் பரிசையும் வழங்கி வருகிறது. இந்த நடைமுறைப்படி, அரிசி ரேஷன் அட்டைதாரர்கள் மற்றும் இலங்கைத் தமிழர் மறுவாழ்வு முகாம்களில் வசிக்கும் குடும்பங்களுக்கு பொங்கல் பரிசு வழங்கப்படுகிறது.

தி.மு.க. ஆட்சிக்கு வந்த பிறகு, 2022 பொங்கலுக்கு 21 மளிகைப் பொருட்கள் அடங்கிய தொகுப்பு வழங்கப்பட்டது. ஆனால், 2023 மற்றும் 2024 பொங்கல் பண்டிகைகளுக்கு பச்சரிசி, கரும்பு, சர்க்கரையுடன் ரூ.1,000 ரொக்கப் பணமும் வழங்கப்பட்டது.

ஆனால், இந்த 2025 பொங்கல் பண்டிகையின்போது குடும்பங்களுக்கு ஒரு கிலோ பச்சரிசி, ஒரு கிலோ சர்க்கரை, மற்றும் முழு நீளக் கரும்பு மட்டுமே வழங்கப்பட்டது. ரொக்கப் பணம் இல்லாத இந்த முடிவு பரவலான விமர்சனங்களை சந்தித்தது.

இந்நிலையில், 2026 சட்டமன்றத் தேர்தலைக் கருத்தில் கொண்டு, வரவிருக்கும் பொங்கல் பரிசுத் தொகுப்பில் ரொக்கப் பணம் மீண்டும் அறிவிக்கப்படலாம் என்ற எதிர்பார்ப்பு எழுந்துள்ளது. இந்த முறை பரிசுத் தொகை கணிசமாக அதிகரிக்கக்கூடும் என்றும் பரவலாக யூகிக்கப்படுகிறது.

குறிப்பாக, சமூக வலைத்தளங்களில் இந்த முறை ரொக்கப் பணம் ரூ.5,000 ஆக இருக்கலாம் என்ற செய்திகள் வேகமாகப் பரவி வருகின்றன. இதற்கு முன், 2021-ல் அ.தி.மு.க. ஆட்சியின்போது ரூ.2,500 ரொக்கப் பணம் அதிகபட்சமாக வழங்கப்பட்டது குறிப்பிடத்தக்கது.

கடந்த ஆண்டு கணக்கீட்டின்படி, தமிழகத்தில் சுமார் 2.21 கோடி குடும்ப அட்டைதாரர்கள் உள்ளனர். இந்த ஒவ்வொரு குடும்பத்திற்கும் ரூ.5,000 வழங்கினால், அரசுக்கு தோராயமாக ரூ.11,000 கோடி தேவைப்படும் என மதிப்பிடப்பட்டுள்ளது.

மாநிலத்தின் தற்போதைய நிதி நிலையை கருத்தில் கொள்ளும்போது, இவ்வளவு பெரிய தொகையை ஒதுக்கீடு செய்வது சாத்தியமா என்ற கேள்வி இயல்பாகவே எழுகிறது.

இந்த ஆண்டு பொங்கல் பரிசுத் தொகுப்பில் ரூ.5,000 ரொக்கப் பணத்திற்கான மக்களின் கோரிக்கையை அரசு நிறைவேற்றுமா என்பது அடுத்த மாதத்தில் தெளிவுபடுத்தப்படும். அரசின் அறிவிப்புக்காக ஒட்டுமொத்த தமிழக மக்களும் ஆவலுடன் காத்திருக்கின்றனர்.