வெறும் ரூ.500 முதலீட்டில் ரூ.40 லட்சம் ரிட்டர்ன்ஸ்..!! போஸ்ட் ஆபீஸின் PPF திட்டம் பற்றி தெரியுமா..?

பணம் சம்பாதிப்பதுடன், அந்தப் பணத்தை பாதுகாப்பாக முதலீடு செய்து, அதிக வருமானமும் பெறுவதுதான் புத்திசாலித்தனமான அணுகுமுறை. இந்த கருத்தை தொடர்ந்து வலியுறுத்தும் நிதி நிபுணர்கள், நடுத்தர மற்றும் அதிக வருமானம் ஈட்டும் மக்களுக்காக மத்திய அரசு அறிமுகப்படுத்தியுள்ள அஞ்சல் அலுவலக PPF (Public Provident Fund) திட்டத்தை சிறந்த தேர்வாகப் பரிந்துரைக்கின்றனர். இது சந்தை அபாயங்கள் இல்லாத, அரசால் முழுமையாகப் பாதுகாக்கப்பட்ட ஒரு நீண்ட கால சேமிப்புத் திட்டமாகும்.

முழு வரி விலக்கு : இந்த PPF திட்டத்தின் மிக முக்கியமான சிறப்பு என்னவென்றால், இது முத்தலைமுறை வரிச் சலுகை கொண்டிருப்பதுதான். அதாவது, இந்தத் திட்டத்தில் நீங்கள் ஆண்டுதோறும் வைப்பு செய்யும் தொகைக்கு வரி விலக்கு உண்டு. அதில் கிடைக்கும் வட்டிக்கும் வரி இல்லை. இறுதியாக முதிர்வு காலத்தில் கையில் வாங்கும் மொத்தப் பணத்திற்கும் முழுமையான வரி விலக்கு உண்டு. இந்த முழுமையான வரிச் சலுகை, இந்தத் திட்டத்தை மற்ற சேமிப்புகளை விட மிகவும் கவர்ச்சிகரமானதாக மாற்றுகிறது. இது ஒரு நிலையான வருமானத்தை தருவதால், பணத்தை இழக்க நேரிடும் என்ற பயமின்றி முதலீடு செய்யலாம்.

ரூ.1.5 லட்சம் முதலீட்டில் அதிக லாபம் : தபால் அலுவலகத்தின் PPF திட்டத்தில் முதலீடு செய்யும் தொகை உங்களுக்கு எவ்வளவு பெரிய லாபத்தைப் பெற்றுத்தரும் என்பதற்கு ஒரு உதாரணத்தைப் பார்க்கலாம். நீங்கள் மாதந்தோறும் ரூ.12,500 வீதம், அதாவது ஆண்டுக்கு அதிகபட்சமாக ரூ.1.5 லட்சம் முதலீடு செய்கிறீர்கள் என்றால், 15 ஆண்டுகள் முடிவில் உங்களின் மொத்த முதலீடு ரூ.22.5 லட்சமாக இருக்கும். ஆனால், உங்களுக்கு வட்டியாக மட்டும் சுமார் ரூ.18 லட்சத்துக்கும் மேல் கிடைக்கும். எனவே, முதிர்வு காலத்தில் வரி விலக்குடன் மொத்தம் ரூ.40.68 லட்சம் ரூபாய் வரை உங்கள் கையில் கிடைக்கும். இந்த வருமானம் உங்கள் நீண்ட கால இலக்குகளான குழந்தைகளின் கல்வி அல்லது ஓய்வூதியத்துக்கு மிகவும் உதவியாக இருக்கும்.

PPF கணக்கை தொடங்க அதிகப் பணம் தேவையில்லை. வெறும் ரூ.500 ஆரம்ப வைப்புத் தொகையிலேயே கணக்கைத் திறக்கலாம். இந்தத் திட்டத்தின் முதிர்வுகாலம் 15 ஆண்டுகள் என்றாலும், இதைத் தொடர்ந்து 5 ஆண்டுகள் நீட்டித்துக் கொள்ளலாம். மேலும், அவசரத் தேவைகள் ஏற்பட்டால், முதலீடு தொடங்கி சில ஆண்டுகளுக்குப் பிறகு, உங்கள் இருப்பில் உள்ள தொகையை பிணையாக வைத்து கடன் பெறும் வசதியும், பகுதி தொகையைத் திரும்பப் பெறும் (Partial Withdrawal) வசதியும் இதில் உள்ளது. இதனால், இது ஒரு நீண்ட கால சேமிப்புடன் சேர்த்து, அவசர காலப் பாதுகாப்பு அரணாகவும் செயல்படுகிறது.