நீங்க PPF திட்டத்தில் முதலீடு செய்கிறீர்களா? இதன் 3 முக்கிய நன்மைகள் என்ன தெரியுமா?

போஸ்ட் ஆபீஸ்களில் எண்ணற்ற சேமிப்புத் திட்டங்கள் வழங்கப்படுகின்றன. ஒவ்வொன்றும் அவற்றின் முதலீட்டு தொகை, முதிர்வு காலம் மற்றும் வட்டி விகிதங்களைப் பொறுத்து மாறுபடும். ஒவ்வொரு திட்டமும் ஒவ்வொரு வகையான முதலீட்டாளர்களுக்கு ஏற்ற ஒன்றாக இருக்கும். அந்த வகையில் பொது வருங்கால வைப்பு நிதி என்று சொல்லப்படுகிற PPF நீண்டகால சேமிப்பு திட்டங்களுக்கு இந்தியாவில் மிகவும் விரும்பப்படும் திட்டமாக உள்ளது. இது முதலீட்டாளர்களுக்கு பல்வேறு நன்மைகளை வழங்குகிறது என்று கேள்விப்பட்டிருப்போம். அப்படி PPF திட்டத்தில் முதலீடு செய்வதானால் முதலீட்டாளர்களுக்கு என்ன நன்மை கிடைக்கிறது? என்பது குறித்து இந்தப் பதிவில் விரிவாகப் பார்ப்போம்.

தற்போது இந்த PPF திட்டத்திற்கு 7.1 சதவீத வட்டி விகிதம் வழங்கப்படுகிறது. இந்த வட்டி விகிதமானது காலாண்டுக்கு ஒரு முறை அரசாங்கத்தால் மாற்றி அமைக்கப்படும். அந்த வகையில் ஏப்ரல் முதல் ஜூன் வரையிலான காலாண்டிற்கு எந்த வட்டி விகிதம் வழங்கப்பட்டதோ அதே வட்டி விகிதத்தை மாற்றாமல் இந்த காலண்டிற்கும் அதாவது ஜூலை முதல் ஆகஸ்ட் வரையிலான காலாண்டிற்கும் நிர்ணயித்துள்ளது.

எந்த ஒரு வங்கியிலோ அல்லது தபால் அலுவலகத்திலும் நீங்கள் PPF கணக்கைத் தொடங்கலாம். ஒரு ஆண்டுக்கு குறைந்தபட்சம் 500 ரூபாய் முதல் PPF திட்டத்தில் முதலீடு செய்யலாம். PPF கணக்கில் அதிகபட்சமாக ஒரு நிதியாண்டுக்கு 1.5 லட்சம் வரையில் முதலீடு செய்ய முடியும். இந்தத் திட்டத்தின் முதிர்வு காலம் 15 ஆண்டுகள். இது சற்று நீண்ட கால சேமிப்பு திட்டமாகும்.

சரி இந்தத் திட்டத்தில் விண்ணப்பிப்பதன் மூலம் முதலீட்டாளர்களுக்கு கிடைக்கும் 3 முக்கிய நன்மைகள் குறித்துப் பார்ப்போம்.

உத்திரவாதமான வருமானம்: இது அரசாங்கத் திட்டம் என்பதால் உங்களுடைய முதலீடு பாதுகாப்பானதாக இருக்கும். அபாயம் இல்லாத நீண்ட கால சேமிப்பை விரும்பும் முதலீட்டாளர்களுக்கு PPF திட்டம் ஏற்றது.

வரிச் சேமிப்பு: பல இந்தியர்கள் PPF திட்டத்தை விரும்புவதற்கான முக்கிய காரணம். இதில் வழங்கப்படும் வரிச் சலுகைகள். வருமான வரிச் சட்டத்தின் 80-சி பிரிவின் கீழ் தனிநபர்கள் ஒரு PPF கணக்கிற்கு ஆண்டுதோறும் 3.5 லட்சம் வரை வரி விலக்கைப் பெறலாம்.

PPF ஓய்வூதிய கார்பஸை உருவாக்க உதவுகிறது: PPF என்பது ஓய்வூதியத்திற்காக சேமிப்பதற்கான சிறந்த வழியாகும். ஏனெனில் இதற்கு 15 வருட லாக்-இன் காலம் உண்டு. இது நீண்ட கால சேமிப்பை ஊக்குவிக்கிறது மற்றும் கூட்டு வட்டியின் நன்மையை வழங்குகிறது.