ஆர்சிபி உடன் கைகோர்த்த பூமா.. 3 வருட டீல்..!

இந்தியா - இங்கிலாந்து இடையிலான கிரிக்கெட் போட்டிகளில் இந்தியா சிறப்பாக விளையாடி 3 தொடர்களையும் கைப்பற்றியுள்ளது. இந்நிலையில் அடுத்த சில நாட்களில் கிரிக்கெட் வெறியர்கள் மிகுந்த ஆர்வமுடன் காத்துக்கொண்டு இருக்கும் 14வது ஐபிஎல் போட்டிகள் வருகிற ஏப்ரல் 9ஆம் தேதி நடக்க உள்ளது.

ஐபிஎல் போட்டிகள்

கடந்த வருடத்தை விடவும் ஐபிஎல் போட்டிகளைச் சுற்றியுள்ள வர்த்தகம் மிகப்பெரிய அளவில் இந்த வருடம் வளர்ச்சி அடைந்துள்ள நிலையில், முன்னணி நிறுவனங்கள் எப்படியாவது ஐபிஎல் போட்டிகளில் தங்களது பிராண்டை விளம்பரம் செய்ய வேண்டும் எனப் போராடி வருகிறது.

பூமா நிறுவனம் கூட்டணி

இந்நிலையில் ஜெர்மன் நாட்டின் முன்னணி ஸ்போர்ட்ஸ்வியர் நிறுவனமான பூமா 14வது ஐபிஎல் போட்டிகளில் ராயல் சேலஞ்ர்ஸ் பெங்களூர் அணியுடன் கிட் பார்ட்னர் ஆகக் கூட்டணி வைத்துள்ளது.

3 வருட ஒப்பந்தம்

இதற்காக ராயல் சேலஞ்ர்ஸ் பெங்களூர் அணியுடன் ஜெர்மனி நாட்டின் பூமா நிறுவனம் சுமார் 3 வருடத்திற்கான ஒப்பந்தம் செய்துள்ளது. இந்த ஒப்பந்த விலை குறித்து இருதரப்பும் எவ்விதமான தகவல்களையும் அளிக்கவில்லை.

ராயல் சேலஞ்ர்ஸ் பெங்களூர் ஜெர்சி

இந்த ஒப்பந்தம் மூலம் பூமா நிறுவனம் ராயல் சேலஞ்ர்ஸ் பெங்களூர் அணியின் ஜெர்சியை அப்படியே தயாரித்து இந்தியா முழுவதும் விற்பனை செய்ய முடியும். ரீடைல் சந்தையில் மட்டும் அல்லாமல் ஈகாமர்ஸ் தளத்திலும் ஆர்சிபி அணியின் டிசர்ட்களை விற்பனை செய்யப் பூமா திட்டமிட்டுள்ளது.

ஐபிஎல் பிராண்ட் பார்ட்னர்

பூமா நிறுவனம் ஐபிஎல் துவங்கியபோது பிராண்ட் பார்ட்னராக இருந்து, ஆனால் பல்வேறு காரணங்களுக்காகவும், போட்டி அதிகமான காரணத்தாலும் ஐபிஎல் பிராண்ட் பார்ட்னரில் இருந்து விலகியது பூமா.

8 வருடத்திற்குப் பின்

சுமார் 8 வருட இடைவேளைக்குப் பின் பூமா தற்போது ஐபிஎல்-ல் டீம் பார்ட்னராகக் களமிறங்கியுள்ளது. ஐபிஎல் மற்றும் அதன் பிராண்ட் வேள்யூ கடந்த சில வருடமாக மிகவும் வேகமாக வளர்ந்து வரும் காரணத்தால் பூமா மீண்டும் ஐபிஎல் போட்டிகளில் பிராண்டிங் செய்யத் துவங்கியுள்ளது.

ஸ்போர்ட்ஸ்வியர் நிறுவனம்

பூமா ஒரு ஜெர்மனி நிறுவனமாக இருந்தாலும் இந்தியாவில் சுமார் 135 நகரங்களில் 370 நேரடி விற்பனை கடைகளை வைத்துள்ளது. இதுமட்டும் அல்லாமல் இந்தியாவின் மிகப் பெரிய ஸ்போர்ட்ஸ்வியர் நிறுவனமாகவும் பூமா திகழ்கிறது.