மறைந்த ரத்தன் டாடாவின் பங்களா விற்பனை.. ரூ.55 கோடிக்கு பேரம் பேசும் Aircel நிறுவனர் சிவசங்கரன்..!!

இந்தியாவின் மறைந்த புகழ்பெற்ற தொழிலதிபரான ரத்தன் டாடாவுக்கு சீஷெல்ஸ் நாட்டின் மாஹேவில் கடற்கரை ஒட்டிய பங்களா ஒன்று சொந்தமாக இருக்கும் நிலையில், அது தற்போது விற்பனைக்கு வரவுள்ளது. ரத்தன் டாடாவின் உயில் படி, இந்த பங்களா, இந்தியாவில் ஸ்டார்ட்அப் நிறுவனங்களுக்கு நிதி வழங்கிய சிங்கப்பூரில் பதிவு செய்யப்பட்ட ஆர்.என்.டி அசோசியேட்ஸ் என்ற அமைப்புக்கு தற்போது சொந்தமாகியுள்ளது.

ரத்தன் டாடாவின் உயிலை செயல்படுத்தும் அதிகாரிகளால் நியமிக்கப்பட்ட மதிப்பீட்டாளர்கள், இந்தப் பங்களாவின் மதிப்பை வெறும் ரூ.85 லட்சம் என்று மிகவும் குறைவாக நிர்ணயித்துள்ளனர். ஆனால், ஏர்செல் (Aircel) நிறுவனத்தின் நிறுவனரான சி. சிவசங்கரன் மற்றும் அவரது குடும்பத்தினர் இந்த பங்களாவை வாங்குவதற்கு 6.2 மில்லியன் அமெரிக்க டாலர் (சுமார் ரூ.55 கோடி) தொகையை வழங்க தயாராக இருப்பதாக தகவல் வெளியாகியுள்ளது.

விலை வேறுபாடு : சொத்தின் அதிகாரப்பூர்வமான மதிப்பீட்டு தொகைக்கும், சிவசங்கரன் குடும்பம் கொடுக்க முன்வந்த தொகைக்கும் இடையே சுமார் ரூ.54 கோடி வித்தியாசம் இருப்பது, இந்த சொத்தைப் பெற அவர்கள் எவ்வளவு ஆர்வமாக உள்ளனர் என்பதை காட்டுகிறது.

நிதிப் பங்கீடு : இந்த சொத்து விற்கப்பட்டால், அதன் மூலம் கிடைக்கும் விற்பனை தொகை முழுவதுமாக ரத்தன் டாடா அறக்கட்டளை நிதியம் மற்றும் ரத்தன் டாடா அறக்கட்டளை ஆகிய இரண்டு தொண்டு நிறுவனங்களுக்கும் சமமாக பிரித்துக் கொடுக்கப்படும் என்று மும்பை உயர் நீதிமன்றத்தின் உத்தரவில் தெரிவிக்கப்பட்டுள்ளது.

ரத்தன் டாடா - சிவசங்கரன் நட்பின் பின்னணி : சிவசங்கரன், சீஷெல்ஸ் நாட்டின் குடிமகன் ஆவார். சீஷெல்ஸ் சட்டத்தின்படி, அங்குள்ள குடிமக்கள் மட்டுமே சொத்து வாங்க முடியும். ஆனால், ரத்தன் டாடாவின் உலகளாவிய நற்பெயர் மற்றும் தொழிலதிபர் அந்தஸ்து காரணமாக, விதிவிலக்கு அளிக்கப்பட்டு அவர் பங்களாவை வாங்குவதற்கு சிவசங்கரன் உதவியுள்ளார். மேலும், சீஷெல்ஸ் நாட்டின் போக்குவரத்துக்கு டாடா மோட்டார்ஸ் ஆற்றிய பங்களிப்பை பாராட்டி, 1982 ஆம் ஆண்டிலேயே டாடாவுக்காக ஒரு சிறப்பு அஞ்சல் தலையை அந்நாடு வெளியிட்டுள்ளது.

சிவசங்கரன், கடந்த காலங்களில் ரத்தன் டாடாவுடனான தனது நட்பை பற்றிப் பேசியுள்ளார். மும்பையில் உள்ள டாடாவின் சாதாரண வீட்டில் அவரை சந்திக்க, தான் தினமும் காலை 7.15 மணிக்கு சென்றதாகவும், டாடா சந்திப்பின்போதே உடற்பயிற்சி செய்வார் என்றும் அவர் கூறியிருக்கிறார்.

விற்பனையில் உள்ள சட்டச் சிக்கல்கள் : தற்போது சீஷெல்ஸ் உச்ச நீதிமன்றத்தில் திவால் வழக்கில் சிக்கியுள்ள சிவசங்கரன், இந்த சொத்தை வாங்குவதற்கு ஆர்வம் காட்டி வருகிறார். எனினும், நிலுவையில் உள்ள கட்டுமானக் கட்டணங்கள் அல்லது வரிகள் எதுவும் இல்லாமல் இந்த சொத்து தங்களுக்கு வழங்கப்பட வேண்டும் என்று சிவசங்கரன் தரப்பில் கோரப்பட்டுள்ளதாக தகவல்கள் தெரிவிக்கின்றன.

பல நிறுவனங்களை தொடங்கி வெற்றி கண்ட சிவசங்கரன், ஒரு காலத்தில் 4 பில்லியன் டாலருக்கு மேல் சொத்து மதிப்பு கொண்டிருந்தவர். அவர் ஒரு நேர்காணலில், "நான் ஏழை இல்லை. பலர் என்னை பணமில்லாதவன் என்று நினைக்கிறார்கள். அப்படி இல்லை, நான் திவாலாகிவிட்டேன்" என்று அவர் கூறியிருந்தார். இந்த விற்பனை குறித்த இறுதி ஒப்பந்தம் இன்னும் எட்டப்படவில்லை என்றாலும், சிவசங்கரனின் மகனும் இந்த விவகாரத்தில் ஈடுபட்டுள்ளார் என்பது குறிப்பிடத்தக்கது.