தடலாடியாக 'இந்த' வங்கி உரிமத்தை ரத்து செய்தது RBI.. மக்களின் பணத்திற்கு என்ன பதில்..!!

சமீப காலமாக ஆர்பிஐ கூட்டுறவு வங்கிகளின் நிதி நிலை, விதிமுறைக்குள் கடைப்பிடிப்பதில் இருந்து பல விஷயங்களை தொடர்ந்து கண்காணித்து வருகிறது. இதன் அடிப்படையில் பல வங்கிகளின் உரிமத்தை ரத்து செய்த ஆர்பிஐ, தற்போது புதிதாக ஒரு வங்கியின் உரிமத்தை ரத்து செய்துள்ளது.

மும்பையைச் சேர்ந்த தி கபோல் கூட்டுறவு வங்கி லிமிடெட் வங்கி உரிமத்தை ரத்து செய்துள்ளதாக ரிசர்வ் வங்கி திங்கள்கிழமை அதிகாரப்பூர்வ அறிக்கையை வெளியிட்டு உள்ளது. தி கபோல் கூட்டுறவு வங்கி மூலதனம் மற்றும் வருவாய் ஈட்டும் வாய்ப்புகள் இல்லை என்பதால் வங்கி உரிமம் ரத்து செய்யப்பட்டு உள்ளது.

இதை கொடர்ந்து கபோல் கூட்டுறவு வங்கி டெபாசிட்களை ஏற்றுக்கொள்வது மற்றும் டெபாசிட்களைத் திரும்பச் செலுத்துவது உள்ளிட்ட அனைத்து வங்கி சார்ந்த பணிகளை செய்ய தடை விதிக்கப்பட்டுள்ளது என்று ரிசர்வ் வங்கி வெளியிட்ட அறிக்கையில் தெரிவித்துள்ளது.

கூட்டுறவு அமைச்சகத்தின் கூடுதல் செயலாளர் மற்றும் கூட்டுறவு சங்கங்களின் மத்திய பதிவாளர் ஆகியோருக்கும் வங்கியை மூடுவதற்கான உத்தரவை வெளியிடவும், வங்கிக்கு ஒரு கலைப்பாளர் ஆதாவது liquidator-ஐ நியமிக்கவும் கோரியுள்ளது ஆர்பிஐ.

மேலும் இவ்வங்கி மொத்தமாக மூடப்படும் வேளையில் ​​ஒவ்வொரு டெபாசிட்டரும் டெபாசிட் இன்சூரன்ஸ் மற்றும் கிரெடிட் கியாரண்டி கார்ப்பரேஷன் (டிஐசிஜிசி) அமைப்பில் இருந்து 5 லட்சம் ரூபாய் வரையிலான டெபாசிட் தொகைக்கான இன்சூரன்ஸ் கிடைக்கும் என ரிசர்வ் வங்கி தெரிவித்துள்ளது.

அதாவது இந்த வங்கியில் ஒருவர் செய்த டெபாசிட் தொகை 5 லட்சத்திற்கும் குறைவாக இருக்கும் பட்சத்தில் முழுமையாக கிடைக்கும். 5 லட்சத்திற்கும் அதிகமாக இருக்கும் தொகைக்கு கட்டாயம் எவ்விதமான காப்புறுதியும் இருக்காது. இதனால் 5 லட்சம் ரூபாய்க்கு மேல் இருக்கும் ஒவ்வொரு ரூபாயும் இழப்பு தான்.

இதன் படி தி கபோல் கூட்டுறவு வங்கி லிமிடெட் வங்கியில் சுமார் 96.09 சதவீத டெபாசிட்தாரர்கள் டிஐசிஜிசி-யில் இருந்து முழு டெபாசிட் தொகையையும் பெற உரிமை பெற்றுள்ளனர்.

தி கபோல் கூட்டுறவு வங்கி லிமிடெட் வங்கியின் தற்போதைய நிதி நிலையில், இவ்வங்கியில் தற்போதுள்ள டெபாசிட்தாரர்களுக்கு முழுமையாக பணம் செலுத்த முடியாது என்ற நிலையை உறுதி செய்த பின்பு தான் ரிசர்வ் வங்கி வங்கியை மூடுவதாகவும், வங்கி உரிமத்தை ரத்து செய்துள்ளதாகவும் தெரிவித்துள்ளது.