கடன்களுக்கான வட்டி விகிதம் அதிகரிக்காது.. RBI வட்டி விகிதத்தில் இந்த முறையும் மாற்றமில்லை..!

புதிய நிதியாண்டு தொடங்கியுள்ள நிலையில் ரிசர்வ் வங்கியின் கொள்கை கூட்டம் இன்று தொடங்கியுள்ளது.

தொடர்ந்து சர்வதேச அளவில் பணவீக்க விகிதமானது உயர்ந்து வரும் நிலையில், ரிசர்வ் வங்கியின் இந்த கூட்டம் மிக முக்கியமான ஒன்றாக பார்க்கப்பட்டது.

இந்த நிலையில் பொருளாதாரத்தினை ஊக்குவிக்கும் விதமாக இந்த முறையும் மாற்றம் செய்யப்படவில்லை. தொடர்ந்து ரெப்போ விகிதம் 4% ஆகவே தொடரும் என அறிவிக்கப்பட்டுள்ளது.

ரிவர்ஸ் ரெப்போ ரேட் அதிகரிப்பு

பொருளாதார வளர்ச்சியினை கருத்தில் கொண்டு ரெப்போ வட்டி விகிதத்தில் மாற்றம் செய்யப்படவில்லை. எனினும் ரிவர்ஸ் ரெப்போ விகிதத்தில் 40 அடிப்படை புள்ளிகள் அதிகரித்து, 3.75 சதவீதமாக அதிகரிக்கப்பட்டுள்ளது. இது பிப்ரவரி மாத எதிர்பார்ப்பினை விட பணவீக்கம் அதிகமாகவும், வளர்ச்சி குறைவாகவும் இருக்கும் என ரிசர்வ் வங்கியின் கவர்னர் சக்தி காந்த தாஸ் தெரிவித்துள்ளார்.

பண வீக்கம்

நடப்பு நிதியாண்டில் நுகர்வோர் பணவீக்க விகிதமானது சராசரியாக 5.7 சதவீதமாக இருக்கலாம் என ரிசர்வ் வங்கி கணிப்பு தெரிவித்துள்ளது. இந்த விகிதமானது ஏப்ரல் - ஜூன் 2022ல் சராசரியாக 6.3 சதவீதமாக இருந்தது. இதே ஜூலை - செப்டம்பரில் 5 சதவீதமாகவும், இருந்தது. இதுவே அக்டோபர் - டிசம்பர் காலகட்டத்தில் சராசரியாக 5.4 சதவீதமாகவும், இதுவே ஜனவரி - மார்ச்- ல் சராசரியாக 5.1 சதவீதமாகவும் இருந்தது.

ஜிடிபி கணிப்பு

கச்சா எண்ணெய் விலையினை 100 டாலர்களாக வைத்துக் கொண்டால் ஏப்ரல் - ஜூன் 2022ல் ஜிடிபி விகிதம் 16.2 சதவீதமாகவும், இதுவே ஜூலை - செப்டம்பர் காலாண்டில் 6.2% ஆகவும், இதுவே அக்டோபர் - டிசம்பரில் 4.1% ஆகவும், ஜனவரி - மார்ச் காலாண்டில் 4% ஆகவும் இருக்கலாம் என ரிசர்வ் வங்கி கணித்துள்ளது. இது தொடர்ந்து பணவீக்கம் உச்சம் தொட்டு வரும் நிலையில் அதனை கருத்தில் கொண்டு மதிப்பீடு செய்யப்பட்டுள்ளது.

ஏன் மாற்றமில்லை

இந்தியாவில் கொரோனாவின் தாக்கம் என்பது சற்று குறையத் தொடங்கியிருந்த்னாலும், சர்வதேச அளவில் நிலவி வரும் அரசியல் பதற்றங்களுக்கு மத்தியில், சப்ளை சங்கிலியில் பாதிப்பு, உற்பத்தி பாதிப்பு, செலவினங்கள் அதிகரிப்பு என பல காரணிகளுக்கும் மத்தியில் பணவீக்கமானது தொடர்ந்து அதிகரித்து வருகின்றது. ஆக வளர்ச்சியில் தாக்கத்தினை ஏற்படுத்தலாம் என எதிர்பார்க்கப்படுகிறது. இதன் காரணமாக வட்டி விகிதத்தில் மாற்றம் செய்யப்படவில்லை.

ஆறுதல் தரும் முடிவு

ரெப்போ விகிதத்தில் மாற்றமில்லை என்ற நிலையில், அது கடன்களுக்கான வட்டி விகிதத்திலும் பெரிய மாற்றத்தை ஏற்படுத்ததாது.ஆக இது இன்னும் சிறிது காலத்திற்கு கடன் பெறுவோருக்கும், பெற்றவர்களுக்கும் ஆறுதலை அளிக்கலாம். இது தேவையை அதிகரிக்கும். நுகர்வினையும் அதிகரிக்கலாம். மொத்தத்தில் பொருளாதாரத்தினை ஊக்குவிக்க இது காரணமாக அமையலாம்.