பஞ்சாப் நேஷனல் வங்கி வாடிக்கையாளர்களுக்கு குட் நியூஸ்: வீட்டு கடன் ஈஎம்ஐ குறைக்கப்பட்டது!!

இந்திய ரிசர்வ் வங்கி ரெப்போ வட்டி விகிதத்தை 25 அடிப்படை புள்ளிகள் குறைத்துள்ளது. இதனை அடுத்து பொதுத்துறை வங்கியான பஞ்சாப் நேஷனல் வங்கி தனது , வீட்டு கடன்களுடன் தொடர்புடைய ரெப்போ இணைப்புக் கடன் விகிதம் (RLLR)ஐ குறைப்பதாக அறிவித்துள்ளது. இது வீட்டு கடன் வாங்கியவர்களுக்கான மாதாந்திர தவணைகளை (EMIs) குறைக்கும் என எதிர்பார்க்கப்படுகிறது.

ரிசர்வ் வங்கி ரெப்போ விகிதத்தை 25 அடிப்படைப் புள்ளிகள் குறைத்ததை அடுத்து பஞ்சாப் நேஷனல் வங்கி இதனை அறிவித்தது. இந்த வங்கி தனது RLLR விகிதத்தை 06.12.2025 முதல் உடனடியாக அமலுக்கு வந்துள்ளதாக கூறுகிறது. 10 அடிப்படைப் புள்ளிகள் BSP உட்பட, RLLRஐ 8.35% இல் இருந்து 8.10% ஆக குறைத்துள்ளது.

05.12.2025 அன்று ரிசர்வ் வங்கி ரெப்போ விகிதத்தைக் குறைத்ததைத் தொடர்ந்து எங்களின் RLLR விகிதத்தை 8.35% இல் இருந்து 8.10% ஆக 06.12.2025 முதல் திருத்தி அமைத்துள்ளோம் என தெரிவித்துள்ளது. ஆனால் வங்கியின் MCLR மற்றும் அடிப்படை விகிதங்களில் எந்த மாற்றமும் இல்லை.

டிசம்பர் 5, வெள்ளிக்கிழமை நடைபெற்ற பணவியல் கொள்கைக் (MPC) கூட்டத்தில் ரிசர்வ் வங்கி தனது ரெப்போ விகிதத்தை 25 அடிப்படைப் புள்ளிகள் குறைத்து, அதை 5.25% ஆக நிர்ணயித்தது. ஆளுநர் சஞ்சய் மல்ஹோத்ரா தலைமையிலான ஆறு உறுப்பினர்கள் கொண்ட குழு ஒருமனதாக வாக்களித்து, எதிர்காலத்தில் மேலும் குறைப்புகளுக்கு இடமளிக்கும் நடுநிலையான நிலைப்பாட்டை தக்கவைத்தது. ஆகஸ்ட் மற்றும் அக்டோபர் மாதங்கள் தவிர, பிப்ரவரி 2025 முதல் இது மத்திய வங்கியின் நான்காவது விகிதக் குறைப்பு ஆகும்.

PNB-யின் RLLR குறைப்பால், ரிசர்வ் வங்கியின் ரெப்போ விகிதத்துடன் இணைக்கப்பட்ட வீட்டுக் கடன்களின் வட்டி விகிதங்கள் குறைந்து, வாடிக்கையாளர்களுக்கு இஎம்ஐ குறையும். RLLR-க்கான மறுசீரமைப்பு காலம் பொதுவாக மூன்று மாதங்கள் என்பதால், அக்டோபரில் இஎம்ஐ தொடங்கியவர்களுக்கு, விகிதக் குறைப்பு ஜனவரியில் அமலாகும். பேங்க் ஆஃப் இந்தியா, இந்தியன் வங்கி உட்பட பிற வங்கிகளும் இதேபோன்ற குறைப்புகளை அறிவித்தன. இந்தியன் வங்கி தனது விகிதத்தை 8.20% இல் இருந்து 7.95% ஆக, 25 அடிப்படைப் புள்ளிகள் குறைத்தது.

அக்டோபர் 2019 RBI சுற்றறிக்கையின்படி, வங்கிகள் சில்லறை கடன்களை வெளி பெஞ்ச்மார்க் கடன் விகிதங்களுடன் (E-BLR) இணைக்க வேண்டும். எனவே, பெரும்பாலான வங்கிகள் ரெப்போ விகிதத்தையே தங்கள் பெஞ்ச்மார்க்காக ஏற்றுக்கொண்டன. RLLR இணைந்த வீட்டுக் கடன் பெறுவோர் இனி குறைவான இஎம்ஐ செலுத்துவார்கள்.