வங்கி கடன் வாங்கியவர்களுக்கு ஜாக்பாட்!! 2025இல் உங்க கடன் வட்டி எவ்வளவு குறைஞ்சிருக்கு தெரியுமா?

2025 ஆம் ஆண்டு, கடன் வாங்கியவர்களுக்கு ஒரு சிறப்பான ஆண்டாக அமைந்தது. இந்திய ரிசர்வ் வங்கி ரெப்போ விகிதத்தை பலமுறை குறைத்ததன் மூலம், வீட்டுக் கடன், வாகனக் கடன் மற்றும் தனிநபர் கடன்களுக்கான மாதாந்திர தவணைகளில் (EMI) குறிப்பிடத்தக்க நிவாரணம் கிடைத்தது. ஓராண்டில் நான்கு முறை வட்டி விகிதங்கள் குறைக்கப்பட்டு, ரெப்போ விகிதம் ஆண்டின் இறுதியில் 5.25 சதவீதமாக சரிந்தது.ரிசர்வ் வங்கி பிப்ரவரி முதல் டிசம்பர் 2025 வரை எத்தனை முறை விகிதங்களைக் குறைத்தது, அதன் தாக்கம் என்ன என்பதைப்பற்றி பார்க்கலாம்.

2025 ஆம் ஆண்டின் தொடக்கத்தில், பிப்ரவரி மாதத்தில், ரிசர்வ் வங்கி தனது முதல் ரெப்போ விகிதக் குறைப்பை அறிவித்தது. அப்போது, ரெப்போ விகிதம் 6.50 சதவீதத்திலிருந்து 6.25 சதவீதமாக, அதாவது 25 அடிப்படைப் புள்ளிகள் குறைக்கப்பட்டது. பிப்ரவரி 2023-க்குப் பிறகு இரண்டு ஆண்டு இடைவெளிக்குப் பிறகு வந்த முதல் குறைப்பு இது . EMI செலுத்துவோருக்கு இது சிறந்த செய்தியாக அமைந்தது.

2025 ஏப்ரலில் ரிசர்வ் வங்கி ரெப்போ விகிதத்தை இரண்டாவது முறையாகக் குறைத்தது. அப்போது, ரெப்போ விகிதம் 6.25 சதவீதத்திலிருந்து 6 சதவீதமாக, மேலும் 25 அடிப்படைப் புள்ளிகள் குறைக்கப்பட்டது. இந்தக் குறைப்பு, கடன் வாங்கியவர்களுக்கு EMI சுமையில் மேலும் நிவாரணம் அளித்தது. வீட்டுக் கடன் மற்றும் வாகனக் கடன்களுக்கான வட்டிச் சுமை குறைந்ததுடன், முதலீட்டாளர்களுக்குச் சாதகமான சூழலும் உருவானது.

2025 ஜூன் மாத பணவியல் கொள்கைக் குழு (MPC) கூட்டத்தில், ரிசர்வ் வங்கி ரெப்போ விகிதத்தை 50 அடிப்படைப் புள்ளிகள் குறைத்து 5.50 சதவீதமாக அறிவித்தது. இது அந்த ஆண்டின் மிகப்பெரிய வட்டி குறைப்பாக அமைந்தது. இம்முடிவின் தாக்கம் சந்தையிலும் பிரதிபலித்தது; வங்கிகள் வீட்டுக் கடன், தனிநபர் கடன் மற்றும் வாகனக் கடன்களுக்கான வட்டி விகிதங்களில் வாடிக்கையாளர்களுக்குச் சலுகைகளை வழங்கின. ஆண்டின் இந்தக் மூன்றாவது குறைப்பு மிகுந்த பலன் அளிப்பதாக இருந்தது.

ஆகஸ்ட் மற்றும் அக்டோபர் 2025-இல் நடைபெற்ற MPC கூட்டங்களில், ரிசர்வ் வங்கி ரெப்போ விகிதத்தில் எந்த மாற்றத்தையும் செய்யவில்லை. விகிதம் 5.50 சதவீதமாகவே நிலைத்தது. மேற்கொண்டு குறைப்பு இல்லாவிட்டாலும், ஆண்டின் முதல் மூன்று குறைப்புகளின் நன்மைகள் ஏற்கனவே EMI-கள் மூலம் கடன் வாங்கியவர்களுக்குப் பெரும் ஆறுதலை அளித்தன, மேலும் கடன் சூழல் அவர்களுக்குச் சாதகமாகவே தொடர்ந்தது.

ஆண்டின் இறுதியில், 2025 டிசம்பரில், ரிசர்வ் வங்கி நான்காவது முறையாக ரெப்போ விகிதத்தைக் குறைத்து, அதை 5.25 சதவீதமாகக் கொண்டு வந்தது. இந்தக் குறைப்பு ஆண்டின் முடிவில் மீண்டும் கடன் வாங்குபவர்களுக்குப் பெரும் நிம்மதியை அளித்தது. இந்த நான்கு விகிதக் குறைப்புகளும் வீட்டுக் கடன்களையும், வாகனக் கடன்களையும் மலிவாக்கியது மட்டுமின்றி, தனிநபர் நிதி மேலாண்மை மற்றும் EMI செலுத்தலையும் எளிதாக்கியது.

ஒட்டுமொத்தமாக 2025 பிப்ரவரி முதல் டிசம்பர் வரை, ரிசர்வ் வங்கி ரெப்போ விகிதத்தை மொத்தம் 1.25% குறைத்தது. ரெப்போ விகிதம் என்பது இந்திய ரிசர்வ் வங்கி (RBI) மற்ற வங்கிகளுக்குக் கடன் வழங்கும் வட்டி விகிதமாகும். இந்த விகிதத்தைப் புரிந்துகொள்வது அவசியம், ஏனெனில் இது ஒட்டுமொத்த வங்கி அமைப்பு மற்றும் கடன் வழங்குதல் முடிவுகளைப் பாதிக்கிறது. ரிசர்வ் வங்கி ரெப்போ விகிதத்தை அதிகரிக்கும்போது, வங்கிகளுக்குக் கடன் வாங்குவது அதிக செலவாகும்; அது குறையும்போது, வங்கிகளுக்குக் கடன் வாங்குவது மலிவாகிறது.

ரிசர்வ் வங்கி ரெப்போ விகிதத்தைக் குறைக்கும்போது, வங்கிகளுக்கு மலிவாக நிதி கிடைக்கிறது. இதனால், வங்கிகள் தங்கள் வாடிக்கையாளர்களுக்குக் குறைந்த வட்டி விகிதத்தில் கடன்களை வழங்குகின்றன. இது சாமானியர்களின் வீட்டுக் கடன், வாகனக் கடன் மற்றும் தனிநபர் கடன்களுக்கான EMI-களை நேரடியாகக் குறைக்கிறது. மாதச் செலவுகளில் இது நிம்மதியளித்து, சேமிப்பை அதிகரிக்கிறது. மேலும், மலிவான கடன்கள் முதலீடு மற்றும் வாங்கும் வாய்ப்புகளையும் பெருக்கலாம்.