ஹோம் லோன், கார் லோன் வாங்கி இருக்கீங்களா? உங்களுக்கு ஒரு அதிர்ச்சி காத்திருக்கு..!!

இந்திய ரிசர்வ் வங்கியின் நிதி கொள்கை குழு கூட்டம் அடுத்த வாரம் நடைபெற இருக்கிறது. இந்த கூட்டத்தில் ரெப்போ வட்டி விவகாரத்தில் ரிசர்வ் வங்கி என்ன முடிவெடுக்கும் என்பது தான் கோடிக்கணக்கான இந்தியர்களின் எதிர்பார்ப்பாக உள்ளது. ஏனெனில் ரெப்போ வட்டி விகிதம் உயர்ந்தால் நம் வீட்டு கடன், வாகன கடன் உள்பட வங்கியில் நாம் வாங்கும் அனைத்து கடன்களின் வட்டிகளும் உயரும்.

நாட்டின் பணவீக்க நிலவரம், தேசிய பொருளாதார சூழல், உலக பொருளாதார சுழல் , ஈரான் போரால் ஏற்பட்டுள்ள தாக்கம், அமெரிக்க டாலருக்கு நிகரான ரூபாய் மதிப்பு ஆகியவற்றை அடிப்படையாக கொண்டு தான் ரிசர்வ் வங்கி ரெப்போ வட்டி விகிதம் தொடர்பான முடிவையே எடுக்கும். அந்த வகையில் வரவிருக்கும் மாதங்களில் வட்டி விகிதங்களை உயர்த்த வேண்டிய கட்டாயத்தில் ரிசர்வ் வங்கி இருப்பதாக வங்கிகள் மற்றும் தரகு நிறுவனங்கள் கணிக்கின்றன.

பணவீக்கத்தை கட்டுப்படுத்த, ஆர்பிஐ தனது ரெப்போ விகிதத்தை இருமுறை உயர்த்தக்கூடும் என கணிப்புகள் வெளியாகியுள்ளன. இதன் மூலம் ரெப்போ வட்டி விகிதம் 5.75% என்ற அளவை எட்டும் என எதிர்பார்க்கப்படுகிறது. ஜப்பானை சேர்ந்த பிரபல தரகு நிறுவனமான நோமுரா வெளியிட்டுள்ள அறிக்கையில், ஆர்பிஐ தனது வட்டி விகிதத்தை அக்டோபர் மற்றும் டிசம்பர் மாதங்களில் தலா 25 அடிப்படை புள்ளிகள் வீதம் உயர்த்தக்கூடும். அதாவது, மொத்தமாக 50 அடிப்படை புள்ளிகள் உயர்த்தப்பட்டு, தற்போதுள்ள ரெப்போ விகிதம் 5.75 சதவீதத்தை எட்டும் என கூறுகிறது.

Also Read

ஐடி துறையில் இருந்து ஒரு திரைப்பட தயாரிப்பாளர்..!! யார் இந்த Freshworks கிரிஷ் மாத்ருபூதம்?

நாட்டின் நுகர்வோர் விலைவாசி குறியீட்டு பணவீக்கம் ஆகஸ்ட் மாதத்தில் 4.8 சதவீதமாக இருந்த நிலையில், நான்காம் காலாண்டில் இது 6.3 சதவீதமாக உயரும் என நோமுரா கணித்துள்ளது. அதன் பின் பணவீக்கம் குறையும் என்பதால் வட்டி விகிதங்கள் உயர வாய்ப்பில்லை என்றும் ஆனால் இந்த ஆண்டு இறுதிக்குள் இரண்டு முறை வட்டி உயர்வு 100% சாத்தியம் என தெரிவித்துள்ளது.

அதிகரித்து வரும் பணவீக்கத்தை கட்டுப்படுத்த ஆர்பிஐ கடுமையான நடவடிக்கைகளை எடுக்க வேண்டிய கட்டாயத்தில் உள்ளது. மறுபுறம், மோசமான பயிர் உற்பத்தி, அதிகரித்து வரும் உணவு பொருட்கள் விலை மற்றும் மக்களின் குறைந்த செலவு திறன் போன்ற காரணங்களால், அடிக்கடி வட்டி விகிதங்களை உயர்த்துவது பொருளாதார வளர்ச்சிக்கு முட்டுக்கட்டையாக மாறக்கூடும் என்பதால் ரிசர்வ் வங்கிக்கு இக்கட்டான சூழல் ஏற்பட்டுள்ளது என்கின்றனர் நிபுணர்கள்.

Recommended For You

H1B விசாவுக்கு பெரிய கும்பிடு: இந்திய ஐடி நிறுவனங்களின் முடிவால் டெக் ஊழியர்கள் அதிர்ச்சி..!!

அக்டோபர் மற்றும் டிசம்பர் மாதங்களில் ரிசர்வ் வங்கி வட்டி விகிதங்களை உயர்த்தினால், அது ஃபுளோட்டிங் முறையில் வீட்டு கடன் , வாகன கடன் வாங்கியவர்களின் இஎம்ஐ சுமையை அதிகரிக்கக்கூடும். ஏனெனில் ரெப்போ வட்டி என்பதே ரிசர்வ் வங்கி மற்ற வங்கிகளுக்கு கொடுக்கும் கடன்களுக்கான வட்டி விகிதம் தான். எனவே வங்கிகள் தாங்கள் கொடுக்கும் வட்டி விகிதம் உயர்ந்தால் தாங்கள் வாடிக்கையாளர்களுக்கு கொடுக்கும் வட்டி விகிதங்களையும் உயர்த்திவிடும்.