மத்திய அரசுக்கு RBI கொடுத்த பணமூட்டை.. ரூ.87000 கோடி.. எதற்காக தெரியுமா..?

ரிசர்வ் வங்கியின் நிர்வாக குழு வெள்ளிக்கிழமை அதன் நிதி மேலாண்மை வாயிலாக கிடைத்த 87,416 கோடி ரூபாய் அளவிலான உபரி தொகையை டிவிடென்ட் ஆக மத்திய அரசுக்கு அளிக்க ஒப்புதல் அளித்துள்ளது.

இதுமட்டும் அல்லாமல் ஆர்பிஐ தனது contingency risk buffer அளவீட்டை தற்போது இருக்கும் 5.5 சதவீதத்தில் இருந்து 6 சதவீதமாக உயர்த்த முடிவு செய்துள்ளதாக ரிசர்வ் வங்கி தனது அறிக்கையில் தெரிவித்துள்ளது.

ரிசர்வ் வங்கி 2022 ஆம் நிதியாண்டில் 30,307 கோடியை மத்திய அரசுக்கு உபரி நிதியாக கொடுத்தது குறிப்பிடத்தக்கது. சக்திகாந்த தாஸ் தலைமையிலான ஆர்பிஐ நிர்வாக குழு ஏப்ரல் 2022 - மார்ச் 2023 காலக்கட்டத்திற்கான ரிசர்வ் வங்கியின் செயல்பாடுகள் குறித்து ஆலோசனை செய்த பின்பு, 2022-23 ஆம் ஆண்டுக்கான ரிசர்வ் வங்கியின் வருடாந்திர அறிக்கை மற்றும் கணக்குகளுக்கு ஒப்புதல் அளிக்கப்பட்டது.

மேலும் ரிசர்வ் வங்கியின் நிர்வாக குழு கூட்டத்தில் உலகளாவிய பொருளாதாரம் மற்றும் உள்நாட்டு பொருளாதார நிலைமை மற்றும் தற்போதைய geopolitical பிரச்சனைகள் இந்திய பொருளாதாரம் மீது எவ்விதமான பாதிப்பை கொண்டு உள்ளது என்பதை ஆலோசனை செய்தது.

இந்தியாவின் பென்ச்மார்க் 10 ஆண்டு பத்திர வருவாய் 5 அடிப்படை புள்ளிகள் அதாவது 0.05 சதவீதம் உயர்ந்து 7.01% ஆக இருந்தது. இந்த உயர்வுக்கு முக்கியமான காரணம் சந்தை முதலீட்டாளர்கள் சுமார் 1 - 1.5 லட்சம் கோடி ரூபாயை பத்திர சந்தையில் முதலீடு செய்துள்ளது தான்.

ஆர்பிஐ தனது பென்ச்மார்க் வட்டி விகிதத்தை அதிகரித்த காரணத்தால் இந்த வருடம் அதிகப்படியான உபரி நிதியை மத்திய அரசு பெறும் என கணிக்கப்பட்டது. இது மட்டும் அல்லாமல் ஆர்பிஐ ரூபாய் மதிப்பின் சரிவை கட்டுப்படுத்த அதிகப்படியான வெளிநாட்டு நாணய பரிமாற்றத்தில் ஈடுப்பட்டது, இதேபோல் உள்நாட்டு வங்கி அமைப்பில் அதிகப்படியான நிதி உட்செலுத்தப்பட்டது.