பெங்களூரில் Villa-களுக்கு தான் டிமாண்ட் அதிகம்.. சமானிய மக்கள் சொந்த வீடு வாங்கவே முடியாதா..?

இந்தியாவின் ஐடி நகரமான பெங்களூரு நகரில் அண்மைக்காலமாக வில்லாக்களுக்கான டிமாண்ட் அதிகரித்திருப்பதாக ரியல் எஸ்டேட் நிறுவனங்கள் கூறுகின்றன. இந்தியாவிலேயே ரியல் எஸ்டேட் துறை மற்றும் வீட்டு வாடகை வேகமாக வளர்ந்து வரும் ஒரு நகரமாக பெங்களூரில் இருக்கிறது.

இங்கு செயல்பட்டு வரக்கூடிய பல்வேறு ஐடி நிறுவனங்கள் மற்றும் ஸ்டார்ட் அப் நிறுவனங்களை இதற்கு காரணமாக கூறலாம். நாள்தோறும் ஆயிரக்கணக்கானவர்கள் வேலை நிமித்தமாக பெங்களூருக்கு வருகை தந்த வண்ணம் இருக்கின்றனர். இந்த நிலையில் பெங்களூருவில் வில்லாக்களுக்கான தேவை அதிகரித்து வருகிறது என அங்கு செயல்பட்டு வரும் ரியல் எஸ்டேட் நிறுவனங்கள் கூறுகின்றன.

பத்தாண்டுகளுக்கு முன்பு பெங்களூருவில் வில்லாக்களை வாங்குவது என்பது ஒரு ஆடம்பரமான முதலீடாக பார்க்கப்பட்டது, வெகு சிலரே இதில் முதலீடு செய்வார்கள். ஆனால் தற்போது அடுக்குமாடி குடியிருப்புகளில் வீடு வாங்குவதை தவிர்த்து பலரும் வில்லாக்களை வாங்குவதற்கு முன் வருகின்றனர் என ரியல் எஸ்டேட் நிறுவனங்கள் கூறுகின்றன.

பெங்களூரில் சராசரியாக ஆடம்பர வசதிகள் கொண்ட வில்லாக்களின் மதிப்பு 2 கோடியிலிருந்து 5 கோடி ரூபாய் வரை இருப்பதாக கூறுகின்றன. தற்போது பலரும் ஆடம்பர குடியிருப்புகளை வாங்க வேண்டும் என விரும்புவதே வில்லாக்களுக்கான டிமாண்ட் அதிகரிப்பதற்கு காரணம் என சொல்லப்படுகிறது. அது மட்டும் இன்றி வில்லா என வாங்கும்போது அந்த குறிப்பிட்ட வீடு அமைந்திருக்கும் நிலமும் உரிமையாளருக்கே சொந்தமாக கிடைக்கிறது. அடுக்குமாடி குடியிருப்பில் அவர்கள் வாங்கும் பரப்பளவில் ஒரு குறிப்பிட்ட சதவீதத்திலான இடமே அவர்களுக்கு சொந்தமானதாக கிடைக்கிறது.

நிலம் முழுவதுமாக நமக்கு சொந்தமாக கிடைக்கிறது என்பதாலேயே பலரும் வில்லாக்களில் முதலீடு செய்ய முன் வருகிறார்கள். முன்பெல்லாம் வில்லாக்கள் என்றால் 3000 சதுர அடி பரப்பளவு கொண்டதாக இருந்தது. அதில் நீச்சல் குளம் ,தோட்டங்கள் உள்ளிட்டவற்றை பலரும் அமைத்துக் கொண்டனர். அப்போது அவற்றின் விலை 10 கோடி ரூபாயாக இருந்தது.

தற்போது மலிவு விலை வில்லாக்கள் சந்தையில் அதிகரித்துவிட்டன என ப்ரோக்கரின் ப்ளூ என்ற ரியல் எஸ்டேட் நிறுவனம் கூறுகிறது. 1500லிருந்து 2000 சதுர அடி பரப்பளவிலான வில்லாக்கள் 2 கோடியில் இருந்து 5 கோடி ரூபாய் வரை விற்பனை செய்யப்படுகின்றன எனக் கூறுகிறார் . வில்லாக்களுக்கான தேவை கடந்த ஓராண்டில் மட்டும் 25% உயர்ந்திருப்பதாக இந்த நிறுவனம் கூறுகிறது.

குறிப்பாக பெங்களூரின் வடக்கு மற்றும் கிழக்கு பகுதிகளில் வில்லாக்களுக்கான தேவை அதிகரித்துள்ளதாம். இங்கே ஒரு சதுர அடி 15000 ரூபாய் முதல் 18000 ரூபாய் வரையிலும் விற்கப்படுகிறது. குறிப்பாக பெங்களூருவில் வில்லாக்களை வாங்குபவர்களில் 25 சதவீதம் பேர் வெளிநாடு வாழ் இந்தியர்கள் என இந்த நிறுவனங்கள் கூறுகின்றன.