ஹைதராபாத்தில் எல்கேஜி-க்கு ரூ. 3.7 லட்சம் ஸ்கூல் ஃபீஸ்? சமூகவலைதளங்களில் கதறும் பெற்றோர்..!

ஹைதராபாத்: ஹைதராபாத்தில் எல்கேஜி கல்வி கட்டணம் 3.7 லட்சம் ரூபாயாக உயர்ந்து இருக்கிறது என ஒருவர் வெளியிட்டுள்ள பதிவு சமூக வலைத்தளங்களில் மிகப்பெரிய விவாதத்தை எழுப்பி உள்ளது. பெங்களூருவை சேர்ந்த முதலீட்டாளர் ஒருவர் ஹைதராபாத்தில் கல்வி கட்டணங்கள் தொடர்பாக தன்னுடைய எக்ஸ் பக்கத்தில் ஒரு பதிவினை வெளியிட்டு இருக்கிறார்.

ஹைதராபாத்தில் எல்கேஜி படிப்புக்கான கல்வி கட்டணம் எவ்வளவு தெரியுமா? 3.7 லட்சம் ரூபாய், இது 2.3 லட்சம் ரூபாயாக இருந்து தற்போது 3.7 லட்சம் ரூபாயாக உயர்ந்திருக்கிறது என தன்னுடைய பதிவில் அவர் சுட்டிக் காட்டியுள்ளார். இந்தியாவில் நாம் பணவீக்கம் பற்றி பேசுகிறோம், குறிப்பாக ரியல்எஸ்டேட் துறையில் பணவீக்கம் அதிகரித்திருப்பதாக கூறுகிறோம். ஆனால் உண்மையில் கல்வி பணவீக்கம் என்பது நாம் எதிர்பாராத வகையில் அதிகரித்துள்ளது என கூறியுள்ளார்.

அவர் எந்த பள்ளியில் இவ்வாறு கல்வி கட்டணம் வசூலிக்கப்படுகிறது என்பதை குறிப்பிடவில்லை. ஆனால் ஒட்டுமொத்தமாக தேசிய அளவில் இது தான் நிலைமை எனக் கூறும் வகையில் தன்னுடைய பதிவினை வெளியிட்டுள்ளார். இந்தியாவில் பள்ளி படிப்புக்கான கட்டணங்கள் கடந்த 30 ஆண்டுகளில் 9 மடங்கு அதிகரித்து இருக்கிறது எனக் கூறியுள்ளார்.

அதுமட்டுமின்றி கல்லூரி மேற்படிப்புக்கான கல்வி கட்டண உயர்வினை கேட்டால் தலையே சுற்றிவிடும் ஏனெனில் இந்தியாவில் கடந்த 30 ஆண்டுகளில் கல்லூரி மேற்படிப்புக்கான கட்டணங்கள் 20 மடங்கு அதிகரித்துள்ளது என சுட்டிக்காட்டி உள்ளார்.

நாம் தற்போது வீட்டுமனைகளின் விலை உயர்வை பற்றி பேசிக் கொண்டிருக்கிறோம் ஆனால் உண்மையில் நாம் கவலைப்பட வேண்டியது கல்வி கட்டண உயர்வு பற்றி தான் எனக் கூறியுள்ளார். கல்விக்கு நாம் கொடுக்கும் விலை நாளுக்கு நாள் அதிகரிக்கிறது என தெரிவித்துள்ளார்.

அவரது இந்த பதிவு சமூக வலைத்தளங்களில் பெரும் விவாதத்தை எழுப்பியுள்ளது. ஒரு பயனர் இந்தியாவில் உணவு ,சுகாதார மற்றும் கல்வி ஆகிய மூன்றுக்கான செலவினங்கள் அதிக அளவில் உயர்ந்துள்ளன, மிடில் கிளாஸ் மக்கள் தங்களுடைய வருமானத்தில் கிட்டத்தட்ட 70 சதவீதத்தை இந்த மூன்றுக்காகவே செலவிட வேண்டி இருக்கிறது எனக் கூறியுள்ளார்.

மேலும் உணவு, சுகாதாரம் மற்றும் கல்விக்கான பணவீக்கம் என்பது ஆண்டுதோறும் 10 முதல் 20 சதவீதம் வரை உயர்ந்து வருகிறது என தெரிவிக்கிறார். ஒரு பயனர் எல்கேஜி கல்வி கட்டணம் என்பது தனியார் நிறுவன ஊழியர்களின் ஆண்டு ஊதியத்தை விட அதிகமாக இருக்கிறது எனக் கூறியுள்ளார்.