5G முதல் அரிசு மாவு வரை.. 3 புதிய வர்த்தகம்.. ரிலையன்ஸ் மாஸ்டர் பிளான்..!

அதானி குழுமத்திற்குப் போட்டியாகப் புதிய துறையில் இறங்குவதில் வேகத்தைக் குறைத்திருந்த ரிலையன்ஸ் இண்டஸ்ட்ரீஸ் இன்று அடுத்தடுத்து 3 புதிய வர்த்தகத்தில் இறங்குவதைக் குறித்து அறிவிப்பு வெளியிட்டு உள்ளது.

முகேஷ் அம்பானி உலகப் பணக்காரர்கள் பட்டியலில் 8,9,10 இடத்திலேயே இருக்கும் நிலையில் கௌதம் அதானி 4வது இடத்திற்கு முன்னேறியுள்ளார். இந்நிலையில் இந்த 3 புதிய வர்த்தகப் பிரிவுகளில் இறங்குவது குறித்த அறிவிப்புகள் முகேஷ் அம்பானியின் சொத்து உயர வழிவகுக்கும்.

ரிலையன்ஸ் ஜியோ

ரிலையன்ஸ் ஜியோ அதிவேக இண்டர்நெட் சேவையை அளிக்கவும், இந்தியாவின் டிஜிட்டல் சேவை தளத்தை மொத்தமா மாற்றவும் 5G சேவையை அறிமுகம் செய்ய உள்ளது. இதற்காகச் சில வாரங்களுக்கு முன்பு ரிலையன்ஸ் ஜியோ சுமார் 88,078 கோடி ரூபாய் முதலீடு செய்து அதிகப்படியான 5ஜி அலைக்கற்றைக் கைப்பற்றியுள்ளது.

5ஜி சேவை

இந்நிலையில் இந்தியாவிலேயே முதல் நிறுவனமாக 5ஜி சேவையை அறிமுகம் செய்யவும் இந்தியா முழுக்க விரிவாக்கம் செய்யவும் சுமார் 2 லட்சம் கோடி ரூபாயை ரிலையன்ஸ் ஜியோ முதலீடு செய்ய உள்ளதாக முகேஷ் அம்பானி 45வது வருடாந்திர பொதுக் கூட்டத்தில் தெரிவித்தார்.

தீபாவளி

ரிலையன்ஸ் ஜியோவின் புதிய 5ஜி சேவையைத் தீபாவளி பண்டிகைக்குள் டெல்லி, மும்பை, சென்னை, கொல்கத்தா ஆகிய 4 நகரங்களில் முதல்கட்டமாக அறிமுகம் செய்ய உள்ளது. டிசம்பர் 2023-க்குள் இந்தியாவில் ஒவ்வொரு டவுன், தாலுக்கா, கிராமம் வரையில் 5ஜி சேவை விரிவாக்கம் செய்ய இலக்கு நிர்ணயம் செய்யப்பட்டு உள்ளது ரிலையன்ஸ் ஜியோ.

ரிலையன்ஸ் ரீடைல்

ரிலையன்ஸ் ரீடைல் நிறுவனங்கள் கொரோனா தொற்று காலத்தின் போது சொந்தமாகப் பொருட்களைத் தயாரித்துத் தனது கடைகளிலும், ஈகாமர்ஸ் தளத்திலும் விற்பனை செய்யத் துவங்கியது. இதில் அதிகப்படியான லாபம் கிடைத்த நிலையில் தற்போது மக்கள் தினசரி பயன்படுத்தும் பொருட்களைச் சொந்த பிராண்டில் இறங்க முடிவு செய்துள்ளது.

FMCG பிரிவு வர்த்தகம்

இதற்காக ரிலையன்ஸ் ரீடைல் புதிதாக FMCG பிரிவில் வர்த்தகத்தைத் துவங்க முடிவு செய்துள்ளது. இப்பிரிவின் வாயிலாக, இப்பிரிவு வர்த்தகத்தின் கீழ் ஜியோ தரம் வாய்ந்த பொருட்களை மலிவான விலையில் அளிக்க உள்ளது. இதன் மூலம் இந்திய மக்களின் தினசரி தேவையைப் பூர்த்திச் செய்வதில் முக்கியப் பங்கு வகிக்க உள்ளது ரிலையன்ஸ் ரீடைல்.

நியூ எனர்ஜி துறை

ரிலையன்ஸ் இண்டஸ்ட்ரீஸ் தனது நியூ எனர்ஜி துறையில் அனைத்து தயாரிப்புகளையும் மலிவான விலையில் கொடுக்கும் வகையில் மொத்த நியூ எனர்ஜி வர்த்தகத்தைச் சந்தைக்குக் கொண்டு வந்து இணைக்கும் முக்கியச் சங்கிலியை புதிதாக அமைக்கப்பட உள்ள பவர் எலக்ட்ரானிக்ஸ் மற்றும் சாப்ட்வேர் சிஸ்டம்ஸ் வாயிலாகச் செய்ய உள்ளது.

பவர் எலக்ட்ரானிக்ஸ்

ரிலையன்ஸ் இண்டஸ்ட்ரீஸ் தனது நியூ எனர்ஜி துறையின் கீழ் ஏற்கனவே 4 ஜிகா தொழிற்சாலைகளை அமைக்கும் பணிகளைச் செய்து வரும் நிலையில் தற்போது புதிதாக 5வது ஜிகா பேக்ட்ரியை பவர் எலக்ட்ரானிக்ஸ் பிரிவுக்காக உருவாக்க உள்ளது.