இனிமே தான் அம்பானியோட ஆட்டமே ஆரம்பம்!! ஏஐ தொழில்நுட்பத்தில் ரூ.800 கோடியில் மெகா திட்டம்!!

முகேஷ் அம்பானி தொலைதொடர்பு , பெட்ரோ கெமிக்கல், சில்லறை வணிகம் உள்ளிட்ட துறைகளில் கால்பதித்து எப்படி போட்டியாளர்களை ஒழித்து கட்டினாரோ அந்த வகையில் தற்போது ஏஐ பிரிவில் தீவிரமாக கால்பதித்துள்ளார்.

ரிலையன்ஸ் இண்டஸ்ட்ரீஸ் லிமிடெட் (RIL) தனது துணை நிறுவனமான ரிலையன்ஸ் இன்டெலிஜென்ஸ் லிமிடெட், மெட்டா பிளாட்ஃபார்ம்ஸின் முழுச் சொந்தமான கிளை நிறுவனமான Facebook ஓவர்சீஸ் உடன் இணைந்து ஒரு கூட்டு நிறுவனத்தை உருவாக்கும் என்று அறிவித்துள்ளது.

ரிலையன்ஸ் எண்டர்பிரைஸ் இன்டெலிஜென்ஸ் லிமிடெட் (REIL) என்று பெயரிடப்பட்டுள்ள இந்தக் கூட்டு நிறுவனம், "நிறுவனங்களுக்கான AI சேவைகளை உருவாக்கி, சந்தைப்படுத்தி, விநியோகிப்பதில்" கவனம் செலுத்தும் என்று நிறுவனம் வெளியிட்ட அறிக்கையில் குறிப்பிடப்பட்டுள்ளது. இந்தப் பங்களிப்பின் மூலம், இரு நிறுவனங்களும் தங்கள் தொழில்நுட்ப திறன்களை மேம்படுத்தி, வணிகங்களுக்கான AI அடிப்படையிலான தீர்வுகளில் வாய்ப்புகளை ஆராய இலக்கு கொண்டுள்ளன.

REIL, ரிலையன்ஸ் இன்டெலிஜென்ஸின் முழுச் சொந்தமான துணை நிறுவனமாக, அக்டோபர் 24, 2025 அன்று இந்தியாவில் அதிகாரப்பூர்வமாகப் பதிவு செய்யப்பட்டது. திருத்தப்பட்ட மற்றும் மறுசீரமைக்கப்பட்ட கூட்டு ஒப்பந்தத்தின்படி, ரிலையன்ஸ் இன்டெலிஜென்ஸ் 70% பங்குகளையும், Facebook மீதமுள்ள 30% பங்குகளையும் REIL-ல் கொண்டிருக்கும். இரு நிறுவனங்களும் ஆரம்ப முதலீடாக சுமார் 855 கோடி ரூபாயை கூட்டாக ஒதுக்கியுள்ளன.

ரிலையன்ஸ் இண்டஸ்ட்ரீஸ் தலைவர் முகேஷ் அம்பானி, கடந்த ஆகஸ்ட் மாதம் நடைபெற்ற நிறுவனத்தின் வருடாந்திர பங்குதாரர்கள் கூட்டத்தில், மெட்டாவுடனான செயற்கை நுண்ணறிவுப் கூட்டு நிறுவனத்தை அறிவித்தார். ”அனைவருக்கும் AI மற்றும் இறுதியில் சூப்பர் இன்டெலிஜென்ஸுக்கான அணுகலை உறுதி செய்வதற்கான ஒரு முக்கிய படி" என்று மெட்டா தலைமை நிர்வாக அதிகாரி மார்க் ஜுக்கர்பர்க் பாராட்டினார்.

REIL-ன் ஆரம்ப மூலதனத்திற்காக ரிலையன்ஸ் இன்டெலிஜென்ஸ் 20,00,000 ஈக்விட்டி பங்குகளை, 2 கோடி ரூபாய் மதிப்பில் சந்தா செலுத்தியுள்ளது. "தலா 10 ரூபாய் மதிப்புள்ள 20,00,000 ஈக்விட்டி பங்குகளின் ஆரம்ப சந்தாவுக்காக ரிலையன்ஸ் இன்டெலிஜென்ஸ் 2 கோடி ரூபாயை முதலீடு செய்யும்," என்று அந்த வெளியீடு மேலும் குறிப்பிட்டது.

உலகிலேயே மிகப்பெரிய இரண்டு நிறுவனங்களில் இணைந்து ஏஐ பிரிவில் செயல்பட போகின்றன. இந்த இரு நிறுவனங்களும் கைகோர்ப்பது இது முதல் முறையல்ல. 2020 ஆம் ஆண்டில், மெட்டா ஜியோ பிளாட்ஃபார்ம்ஸில் 5.7 பில்லியன் டாலர்களை முதலீடு செய்தது. ஜியோ பிளாட்ஃபார்ம்ஸ் என்பது ரிலையன்ஸ் ஜியோவின் தாய் நிறுவனமாகும். ஏஐ போட்டியில் முன்னணி இடம் பிடிக்க வேண்டும் என துடித்து கொண்டிருக்கும் மெட்டா நிறுவனத்துக்கு ரிலையன்ஸ் உடனான இந்த இணைப்பு மிகப்பெரிய ஒரு ஊக்கமாக அமைந்திருக்கிறது.