58 டூ 88.. முகேஷ் அம்பானியின் பிரம்மாண்ட வளர்ச்சி..!

2020 துவக்கமும் கொரோனா பாதிப்பும்

2020ஆம் ஆண்டின் துவக்கத்தில் சீனா, இத்தாலி, அமெரிக்கா, பிரிட்டன் ஆகிய நாடுகளில் கொரோனா தொற்று அதிகமாக இருந்த காலகட்டத்தில் இந்தியாவில் துவக்க நிலையில் இருந்தது.

இந்தக் காலகட்டத்தில் ரிலையன்ஸ் இண்டஸ்ட்ரீஸ் பங்குகள் சில ஏற்ற இறக்கங்கள் இருந்தாலும் 1,500 ரூபாயில் இருந்து 1,400 ரூபாய் வரையிலான விலையில் வர்த்தகம் செய்யப்பட்டது.

இந்தக் காலகட்டத்தில் முகேஷ் அம்பானியின் மொத்த சொத்து மதிப்பு 57 பில்லியன் டாலரில் இருந்து 52 பில்லியன் டாலர் வரையில் சரிந்தது.

முகேஷ் அம்பானி குடும்பம்

ரிலையன்ஸ் இண்டஸ்ட்ரீஸ் குழுமத்தின் 42 சதவீத பங்குகள் முகேஷ் அம்பானி குடும்பத்தின் கட்டுப்பாட்டில் இருக்கும் காரணத்தால் இவரது மொத்த சொத்து மதிப்பில் ரிலையன்ஸ் இண்டஸ்ட்ரீஸ் பங்கு மதிப்பை அதிகளவிலான ஆதிக்கம் செலுத்துகிறது. இதன் வாயிலாக இந்நிறுவனத்தின் பங்கு மதிப்பு ஏற்ற இறக்கும் முகேஷ் அம்பானி சொத்து மதிப்பை அதிகளவில் பாதிக்கிறது.

ரிலையன்ஸ் ஜியோ

ரிலையன்ஸ் இண்டஸ்ட்ரீஸ் தனது டெலிகாம் நிறுவனமான ரிலையன்ஸ் ஜியோ நிறுவனத்தில் சுமார் 32.47 பங்குகளைப் பேஸ்புக், கூகுள், குவால்கம், இன்டெல் என உலகின் முன்னணி டெக் நிறுவனங்களுக்கும், பல்வேறு முன்னணி பங்கு முதலீட்டு நிறுவனங்களுக்கும் விற்பனை செய்து சுமார் 1,52,056 கோடி ரூபாய் அளவிலான முதலீட்டைத் திரட்டி மாபெரும் வெற்றியைக் கண்டது ரிலையன்ஸ் இண்டஸ்ட்ரீஸ்.

ரிலையன்ஸ் ரீடைல்

ரிலையன்ஸ் ஜியோ பங்குகளை விற்பனை செய்து பெரிய வெற்றியை அடைந்த பின்பு முகேஷ் அம்பானி ரிலையன்ஸ் ரீடைல் நிறுவனத்தின் 10.09 சதவீத பங்கு விற்பனை செய்து சுமார் 47,265 கோடி ரூபாய் முதலீட்டைத் திரட்டி அசத்தினார்.

வர்த்தக விரிவாக்கம்

இதோடு ஜியோமார்ட் அறிமுகம், வர்த்தக விரிவாக்கம், பல்வேறு நிறுவனங்களில் முதலீடு, புதிய வர்த்தகத் துறைக்குள் நுழைய வேண்டும் என அர்பன் லேடர், நெட்மெட்ஸ் போன்ற நிறுவன கைப்பற்றல் மூலம் ரிலையன்ஸ் இண்டஸ்ட்ரீஸ் பங்குகள் பெரிய அளவிலான வர்த்தக வளர்ச்சியை அடைந்தது.

வரலாற்று உச்ச விலை

ரிலையன்ஸ் ஜியோ மற்றும் ரிலையன்ஸ் ரீடைல் பங்குகளை விற்பனை செய்து சுமார் 2 லட்சம் கோடி ரூபாய் அளவிலான முதலீட்டைத் திரட்டியதன் வாயிலாக ரிலையன்ஸ் பங்குகளின் மதிப்பு வரலாறு காணாத உச்ச அளவான 2,369.35 ரூபாய் அளவீட்டை அடைந்தது.

இதன் மூலம் முகேஷ் அம்பானியின் மொத்த சொத்து மதிப்பு 88.4 பில்லியன் டாலர் வரையில் உயர்ந்தது.

முகேஷ் அம்பானி சரிவு

இதன் பின் பியூச்சர் குரூப் உடனான ரிலையன்ஸ் ரீடைல்-ன் 24,713 கோடி ரூபாய் வர்த்தகப் பரிமாற்ற ஒப்பந்தம் அமேசான் மூலம் பல்வேறு சிக்கல்களை எதிர்கொண்டு வருவதன் வாயிலாகவும், ரிலையன்ஸ் இண்டஸ்ட்ரீஸ் குழுமத்தின் கச்சா எண்ணெய் வர்த்தகத்தில் ஏற்பட்ட வர்த்தகம், வருவாய் பாதிப்பின் காரணமாக ரிலையன்ஸ் பங்கு மதிப்பு படிப்படியாகச் சரியத் துவங்கியது.

இதன் வாயிலாக முகேஷ் அம்பானியின் சொத்து மதிப்புத் தற்போது 74 பில்லியன் டாலராகச் சரிவடைந்துள்ளது.