தொடர்ந்து எகிறும் விலைவாசி! இனி தக்காளி இல்லாம தான் குழம்பு வைக்கணும்! ஷாக் கொடுக்கும் ஜூன் மாத பணவீக்கம்!

சில காலமாகவே சாமானியர்களின் சம்பளம் அதிகரிக்கவில்லை. ஆனால் விலைவாசி மட்டும் தொடர்ந்து அதிகரித்து வருகிறது. எப்போதெல்லாம் மொத்தவிலை பணவீக்கம் அதிகரிக்கிறதோ? அப்போதெல்லாம் சில்லறை பணவீக்கமும் அதிகரிக்கும். அந்த வகையில் கடந்த ஜூன் மாதத்தில் சில்லரை பணவீக்க விகிதம் 4.38 சதவீதமாக உயர்ந்திருக்கிறது. ரிசர்வ் வங்கி ஒவ்வொரு மாதமும் பணவீக்கம் விகிதம் குறித்த கணிப்புகளை வெளியிடும். இந்நிலையில் பல மாதங்களாக 4 சதவீதத்திற்கு மேல் உயராமல் இருந்த விகிதம், தற்போது முதல்முறையாக 4.38 சதவீதமாக உயர்ந்துள்ளது.

அத்தியாவசிய பொருட்கள் மற்றும் உணவுப் பொருட்களின் விலை அதிகரிப்பு சாமானியர்களை வாட்டி வதைக்கிறது. ஜூன் மாதத்தில் வெள்ளி, தங்கம், வைரம், பிளாட்டினம் மற்றும் உணவுப் பொருட்களில் தக்காளி, இஞ்சி, வெங்காயம் ஆகியவற்றின் விலை அதிகரித்திருக்கிறது. அதே நேரம் சில பொருட்களின் விலை குறைந்தும் இருக்கிறது.

பணவீக்கம் என்றால் என்ன?: எளிமையாக சொல்ல வேண்டுமானால் விலைவாசி உயர்வு தான் பணவீக்கம். உதாரணமாக கடந்த 2 ஆண்டுகளுக்கு முன்பு நீங்கள் 100 ரூபாயை வைத்து வாங்கிய பொருட்களை நினைவில் கொள்ளுங்கள். இன்று அந்த 100 ரூபாய்க்கு பாதி பொருட்களை கூட வாங்க முடியாது. அந்த அளவுக்கு மூலப்பொருட்களின் விலை அதிகரித்து இறுதியில் அவை மக்களை வந்தடையும்போது விலை உயர்கிறது.

ஜூன் மாதத்தில் மட்டும் வெள்ளி விலை மிகப்பெரிய அதிகரிப்பை கண்டது. இதனால் வெள்ளி நகைகளின் பணவீக்க விகிதம் 133 சதவீதம் அதிகரித்திருக்கிறது. தங்கம், வைரம் மற்றும் பிளாட்டின நகைகளின் பணவீக்க விகிதம் 36.82 சதவீதமாக உள்ளது.

Also Read

Free.. வெறும் 4 மணி நேரத்தில் AI Expert ஆகிடலாம்.. அரசு சர்டிபிகேட் உடன் பொன்னான வாய்ப்பு!

உணவுப் பொருட்களின் விலையும் கடுமையாக அதிகரித்துள்ளது. இஞ்சி 50.41 சதவீதம் வரை அதிகரித்திருக்கிறது. இது பருவ கால பயிர் என்பதால் விநியோகத்தில் ஏற்பட்ட பிரச்சனை விலை உயர்வுக்கு காரணமானது. தக்காளி விலை 31.92% வரை அதிகரித்துள்ளது. உணவகங்கள் மற்றும் தங்கும் இடங்களின் விலையிலும் அதிகரிப்பு தென்படுகிறது. அதேபோல உணவுப் பொருட்கள் மற்றும் குளிர்பானங்களின் விலை 5.05% அதிகரித்திருக்கிறது. ஆனால் ஒரு சில பொருட்களின் விலை குறைந்திருக்கிறது. உருளைக்கிழங்கு 20.34%, பட்டாணி 9.67%, சீரகம் 3.75% குறைந்துள்ளது.

ஆக ஜூன் மாத பணவீக்க உயர்வு தற்காலிகமானதா? அல்லது நீண்ட காலத்திற்கு இதே நிலை தொடருமா? என்பதை ஆகஸ்ட் 5-ஆம் தேதி நடைபெற உள்ள ரிசர்வ் வங்கியின் அடுத்த பணவியல் கொள்கை கூட்டத்தின் முடிவுகள் தான் தீர்மானிக்கும்.