பெங்களூரு மெட்ரோ ரயில் திட்டத்தில் ரூ.2,920 கோடி சேமிப்பு.. எப்படி சாத்தியம்..? நடந்தது என்ன..?

பெங்களூருவின் அத்தியாவசிய திட்டமாக கருதப்படும் ஹெப்பால் - சர்ஜாபுரா மெட்ரோ ரயில் பாதைக்கான உத்தேச செலவு சுமார் ரூ.2,920 கோடி குறைய வாய்ப்புள்ளதாக தகவல்கள் வெளியாகியுள்ளன. ஆரம்பத்தில் ரூ.28,405 கோடி என மதிப்பிடப்பட்ட இந்த 37 கி.மீ. நீளத் திட்டத்திற்கு, கர்நாடக அரசு டிசம்பர் 2024 ஆம் ஆண்டு ஒப்புதல் அளித்தது. தற்போது மத்திய அரசின் இறுதி ஒப்புதலுக்காக காத்திருக்கிறது.

செலவு குறைப்புக்கான காரணம் என்ன..?: கர்நாடக அரசின் ஒப்புதலைத் தொடர்ந்து, மத்திய வீட்டுவசதி மற்றும் நகர்ப்புற விவகாரங்கள் அமைச்சகம் (MoHUA), இந்தத் திட்டத்தின் செலவு மதிப்பீட்டை ஒரு நிபுணர் நிறுவனம் மூலம் மறுபரிசீலனை செய்யக் கோரியிருந்தது. குறிப்பாக, நிலத்தடி பிரிவுகளுக்கான கட்டுமானச் செலவுகள் குறித்து நியாயமான விளக்கம் அளிக்க மத்திய அரசு கேட்டதாக கூறப்படுகிறது.

இதையடுத்து, பெங்களூரு மெட்ரோ ரயில் கார்ப்பரேஷன் லிமிடெட் (BMRCL), பிரான்ஸ் நாட்டைச் சேர்ந்த SYSTRA என்ற நிறுவனத்தின் உதவியை நாடியது. SYSTRA நிறுவனம் அளித்த அறிக்கையில், செலவுகள் மறுபரிசீலனை செய்யப்பட்டு, நிலத்தடி நிலையங்களின் நீளம் குறைப்பு மற்றும் பிற மெட்ரோ திட்டங்களின் சராசரி செலவுகளுடன் ஒப்பிடுதல் ஆகியவற்றின் மூலம் செலவுக் குறைப்பு சாத்தியமாகியுள்ளது என்று BMRCL அதிகாரிகள் தெரிவித்தனர்.

தற்போது திருத்தப்பட்ட வரைவு அறிக்கை மத்திய அரசின் ஆய்வில் உள்ளதாகவும், நிலத்தடிப் பிரிவில் செய்யப்பட்ட சில மேம்படுத்தப்பட்ட வடிவமைப்புகள் மற்றும் நிலம் கையகப்படுத்துதலில் செய்யப்பட்ட சிறிய மாற்றங்கள் காரணமாகவும் இந்த செலவுக் குறைப்பு ஏற்பட்டுள்ளதாக பெங்களூரு மெட்ரோ ரயில் நிர்வாக அதிகாரி தெரிவித்துள்ளார்.

பாதையின் அமைப்பு மற்றும் முக்கியத்துவம் : மொத்த நீளம் மற்றும் ரயில் நிலையங்களின் எண்ணிக்கையில் எந்த மாற்றமும் இல்லை என்றாலும், இந்தப் பாதையின் உயர்த்தப்பட்ட மற்றும் நிலத்தடிப் பிரிவுகளில் சிறிய மாற்றங்கள் செய்யப்பட்டுள்ளன. அதன்படி, உயர்த்தப்பட்ட பாதை 21.995 கி.மீ. நீளமும், நிலத்தடிப் பாதை 14.63 கி.மீ. நீளமும் கொண்டிருக்கும். ஆரம்பம் முதலே 6 பெட்டிகள் கொண்ட ரயில்கள் இயக்கப்படும் என்றும் தெரிவிக்கப்பட்டுள்ளது.

இந்தப் பாதை, தகவல் தொழில்நுட்பத்தின் முக்கிய மையமான சர்ஜாபுரத்தை, ஹெப்பாலுடன் இணைக்கிறது. இது மத்திய வர்த்தகப் பகுதி மற்றும் கோரமங்களம் வழியாக செல்வதால், பெங்களூருவின் போக்குவரத்து நெரிசலை குறைக்க மிகவும் முக்கியமானதாக கருதப்படுகிறது.

ஆரம்பத் திட்டத்தின்படி, சர்ஜாபுரத்தில் இருந்து கோரமங்களம் 3வது பிளாக் வரை (15 நிலையங்கள்) உயர்த்தப்பட்ட பாதையாகவும், அதைத் தொடர்ந்து கோரமங்களம் 2வது பிளாக் முதல் கால்நடை கல்லூரி வரை (11 நிலையங்கள்) நிலத்தடிப் பாதையாகவும், பிறகு கங்கா நகர் மற்றும் ஹெப்பால் நிலையங்கள் உயர்த்தப்பட்ட நிலையங்களாகவும் இருக்கும் என்று DPR-ல் குறிப்பிடப்பட்டிருந்தது.

நிதி மற்றும் காலக்கெடு : இந்தத் திட்டத்திற்கு மத்திய அரசு விரைவில் ஒப்புதல் அளிக்கும் என்று BMRCL அதிகாரிகள் நம்பிக்கை தெரிவித்துள்ளனர். நவம்பர் மாதத்திற்குப் பிறகு எந்த நேரத்திலும் ஒப்புதல் கிடைக்கலாம் என்றும், இந்த நிதியாண்டு முடிவதற்குள் (மார்ச் 2026) ஒப்புதலை எதிர்பார்க்கிறோம் என்றும் அவர்கள் கூறியுள்ளனர்.

இதற்கிடையில், இந்த 3ஏ கட்டத்தின் நான்கு பிரிவுகளில் புவியியல் தொழில்நுட்ப ஆய்வுகளை மேற்கொள்ள BMRCL ரூ.6.86 கோடி மதிப்பிலான டெண்டர்களை வெளியிட்டுள்ளது. இந்தப் பாதையின் நிதி ஒதுக்கீட்டில் மத்திய அரசு 20 சதவீதமும், கர்நாடக அரசு 20 சதவீதமும், மீதமுள்ள 60 சதவீதம் வெளிப்புற நிதி ஆதாரங்கள் மூலமும் திரட்டப்படும் என்பது குறிப்பிடத்தக்கது.