விளாடிமிர் புதின் முடிவால் 83 பில்லியன் டாலர் இழப்பு.. பல வருட உழைப்பு வீண்..!

சர்வதேச முதலீட்டு சந்தையைத் தொடர்ந்து பதற்றத்திலேயே வைத்திருக்கும் ரஷ்யா - உக்ரைன் போர் பேச்சுவார்த்தைக்குப் பின்பும் தொடர்ந்து சரிவு பாதையிலேயே உள்ளது. குறிப்பாக ரஷ்ய பங்குச்சந்தையும், வெளிநாட்டுப் பங்குச்சந்தையில் இருக்கும் ரஷ்ய நிறுவனங்களும் அதிகப்படியான சரிவை எதிர்கொண்டு வருகிறது.

இதற்கிடையில் உலக நாடுகளும், வெளிநாட்டு நிறுவனங்களும் ரஷ்யா மீது கடுமையான தடைகளை விதித்து வருகிறது. இதன் வாயிலாக ரஷ்ய நாட்டின் பெரும் பணக்காரர்களின் சொத்து மதிப்பு மிகவும் மோசமான சரிவை பதிவு செய்துள்ளது.

விளாடிமிர் புதின்

உக்ரைன் நாட்டின் மீது போர் தொடுக்க ரஷ்யா அதிபர் விளாடிமிர் புதின் அறிவிப்பு வெளியிட்டது முதல் ரஷ்ய பங்குச்சந்தை மற்றும் ரஷ்ய நாணயத்தின் மதிப்பு தொடர்ந்து சரிந்து வருகிறது. இதனால் ரஷ்ய பணக்காரர்களின் சொத்து மதிப்பு தொடர்ந்து சரிந்து வருகிறது.

83 பில்லியன் டாலர் சரிவு

ப்ளூம்பெர்க் பில்லியனர்கள் இண்டெக்ஸ் படி 2022ஆம் ஆண்டில் மட்டும் ரஷ்யாவின் டாப் 500 பணக்காரர்களின் சொத்து மதிப்பு சுமார் 83 பில்லியன் டாலர் அளவுக்குச் சரிந்துள்ளது. இது ரஷ்ய வரலாற்றில் ஏற்பட்ட மிகப்பெரிய சரிவாகும்.

ரஷ்ய பங்குச்சந்தை

இன்று ரஷ்ய பங்குச்சந்தை சரிவு மிகவும் தீவிரமானதாக இருந்த காரணக்தால் ரஷ்யாவின் மத்திய வங்கி திங்களன்று வர்த்தகத்தை நிறுத்தியது, இதன் மூலம் பெரிய அளவிலான சரிவுகள் ஈடுசெய்யப்பட்டு உள்ளது.

50 சதவீத சரிவு

லண்டனில் பட்டியலிடப்பட்ட ரஷ்ய நிறுவனங்களின் பங்குகள், எரிவாயு உற்பத்தியாளர் நோவடெக் முதல் எஃகு தயாரிப்பாளர் செவர்ஸ்டல் வரை, திங்களன்று அமெரிக்கா, இங்கிலாந்து, ஐரோப்பிய யூனியன் மற்றும் பிற நாடுகள் பொருளாதாரத் தடைகள் காரணமாக 50 சதவீதத்திற்கும் அதிகமாகச் சரிவை பதிவு செய்தது.

ரஷ்ய பில்லியனர்கள்

ஏற்கனவே உலக நாடுகள் பல ரஷ்ய பில்லியனர்கள் மீது தடை விதித்துள்ள நிலையில் இன்று ஐரோப்பிய யூனியன் உலோகத் தொழிலதிபர் அலிஷர் உஸ்மானோவ், ஆல்ஃபா குழுமத்தின் உரிமையாளர்கள் மிகைல் ஃப்ரிட்மேன் மற்றும் பீட்ர் அவென் மற்றும் ஸ்டீல் துறை தொழிலதிபரான அலெக்ஸி மொர்டாஷோவ் மீது தடை விதிக்கப்பட்டு உள்ளது.

1.5 டிரில்லியன் டாலர் பொருளாதாரம்

இந்தப் போர் மூலம் ரஷ்யாவின் 1.5 டிரில்லியன் டாலர் மதிப்பிலான பொருளாதாரம் சரிந்து வரும் வேளையில், நடந்துள்ள ஓரே நல்ல விஷயம், பல வருடங்களாக ரஷ்யா இந்தப் போருக்கு தயாராகி வரும் நிலையில் சுமார் 640 பில்லியன் டாலரை ரஷ்ய மத்திய வங்கி மட்டுமே வைத்துள்ளது தான்.