10 வருசமாச்சு.. மைக்ரோசாப்ட் சிஇஓ சத்ய நாடெல்லா.. வியக்கவைக்கும் பயணம்..!

மைக்ரோசாப்ட் நிறுவனத்தின் வளர்ச்சி, வர்த்தகம் பில் கேட்ஸ் பின்பு சிஇஓ-வாகத் தலைமையேற்ற ஸ்டீவ் பால்மர் காலத்தில் மந்தமான வளர்ச்சியைப் பதிவு செய்தது. புதிய முன்னேற்றங்கள், புதிய வர்த்தகத்திற்குள் நுழைய முடியாமல் எதிர்கால வளர்ச்சி குறித்து முதலீட்டாளர்கள் கவலை தெரிவிக்கத் துவங்கினர்.

இதேவேளையில் தான் ஸ்டீவ் பால்மர் 2014 ஆம் ஆண்டு ஓய்வு பெறும் காலம் வந்தது, இவர் 2000 முதல் 2014 வரையிலான காலத்தில் சிஇஓ-வாக இருந்தார். இதைத் தொடர்ந்து அடுத்த சிஇஓ யார் என்ற கேள்வி எழுந்தது பல மாத ஆய்வு ஆலோசனைக்குப் பின்பு பில் கேட்ஸ், ஸ்டீவ் பால்மர் இணைந்து சத்ய நாடெல்லாவை தேர்வு செய்தனர்.

அன்று முதல் சத்ய நாடெல்லாவின் சிங்க பாதை துவங்கியது, இன்று இவரது தலைமையில் மைக்ரோசாப்ட் பங்குகள் கடந்த 10 வருடத்தில் 1041 சதவீத வளர்ச்சி அடைந்து சுமார் 3 டிரில்லியன் டாலர் மதிப்புடைய நிறுவனமாக உருவெடுத்துள்ளது.

ஒரு ஐஏஎஸ் தந்தையின் மகனாக ஹைதராபாத்தில் பிறந்த சத்ய நாடெல்லா ஐஐடி கல்லூரியில் அட்மிஷன் பெற முடியாத காரணத்தால் மணிப்பால் இன்ஸ்டிடியூட் ஆஃப் டெக்னாலஜி நிறுவனத்தில் 1988 ஆம் ஆண்டுப் பட்டம் பெற்று, மேற்படிப்பை அமெரிக்காவில் தொடர்ந்தார். அமெரிக்காவில் கல்லூரி படிப்பை முடித்த கையோடு அப்போது மிகப்பெரிய டெக் நிறுவனமான இருந்த சன் மைக்ரோசிஸ்டம்ஸ் நிறுவனத்தில் சேர்ந்தார்.

சில ஆண்டுகளிலேயே சன் மைக்ரோசிஸ்டம்ஸ் நிறுவனத்தை விடுத்து 1992 ஆம் ஆண்டு மைக்ரோசாப்ட் நிறுவனத்தில் சேர்ந்தார். இவரது தலைமையில் தான் மைக்ரோசாப்ட் தனது கிளவுட் சேவை கட்டமைக்கப்பட்டது, இது தான் OS வர்த்தகத்தைத் தாண்டி மைக்ரோசாப்ட் லாபத்தை அள்ளிய முக்கியத் துறையாக இருந்தது.

இது மட்டும் அல்லாமல் சத்ய நாடெல்லா மைக்ரோசாப்ட்-ன் R&D பிரிவின் தலைவராக இருந்தார், இதன் மூலம் கிளவுட் சேவை, சர்வர் டூல்ஸ், கிளவுட் டெவலப்பர் டூல்ஸ்-ல் பெரிய அளவில் கவனம் செலுத்தப்பட்டுப் பெரிய அளவில் வளர்ச்சி அடைந்தது. இதன் வெற்றியில் உருவானதே Azure.

சத்ய நாடெல்லாவின் செயல்பாட்டைக் கவனித்த பில் கேட்ஸ், ஸ்டீவ் பால்மர் 2014ல் பிப்ரவரி மாதம் அவரை சிஇஓ ஆக அறிவித்தனர். இவர் சிஇஓ-வாகப் பதவியேற்றிய பின்பு விண்டோஸ் ஓஎஸ் பெரிய அளவில் மாற்றத்தை எதிர்கொண்டு 73 சதவீத சந்தை பங்கீட்டை பெற்றது.

இதைத் தொடர்ந்து துணிச்சலாக நோக்கிய வர்த்தகத்தை விற்பனை செய்துவிட்டு லின்கிடுஇன், கிட்ஹப், Activision Blizzard உட்பட 50க்கும் அதிகமான நிறுவனங்களைக் கைப்பற்றப்பட்டது. சமீபத்தில் செய்யப்பட்ட OpenAI நிறுவன முதலீட்டின் மூலம் மைக்ரோசாப்ட் எதிர்காலம் எப்போதும் இல்லாத வகையில் மிகவும் பிரகாசமாக உள்ளது.