மிஸ் யூனிவர்ஸ் போட்டியில் பங்கேற்கும் சவுதி அரேபியா.. வரலாற்று சம்பவம் பாஸ்..!!

மிஸ் யூனிவர்ஸ் போட்டியில் 27 வயதான சவுதி அரேபியாவை சேர்ந்த மாடல் பங்கேற்று பெருமை சேர்க்கவுள்ளார். மிஸ் யூனிவர்ஸ் போட்டியில் சவுதி அரேபியா கலந்து கொள்வது வரலாற்றில் இதுவே முதன் முறையாகும்.

சவுதி அரேபியாவில் பிரபலமான ரூமி அல்குவாதானி என்ற மாடல் இன்ஸ்டாகிராமில் 10 லட்சத்தும் மேற்பட்ட ஃபாலோயர்களை வைத்துள்ளார். ரூமி அல்குவாதானி மிஸ் யூனிவர்ஸ் போட்டியில் சவுதி அரேபியா சார்பில் பங்கேற்கிறார்.

இது தனக்கு மிகவும் பெருமையைத் தருகிறது என்றும் சர்வதேச மேடையில் சவுதி அரேபிய பிரதிநிதியாக கலந்து கொள்வதில் கௌரவம் அடைந்துள்ளதாகவும் ரூமி கூறியுள்ளார்.

மிஸ் யுனிவர்ஸ் 2024 போட்டியில் பங்கேற்பதில் நான் மகிழ்ச்சியடைகிறேன், இந்த மதிப்புமிக்க நிகழ்வில் சவுதி அரேபியாவின் அறிமுகத்தைக் காணலாம் என்று அவர் தனது இன்ஸ்டாகிராம் கணக்கில் அரபு மொழியில் பதிவிட்டுள்ளார் ரூமி அல்குவாதானி.

ரியாத்தைச் சேர்ந்த அல்குவாதானி, சில வாரங்களுக்கு முன்பு மலேசியாவில் நடைபெற்ற மிஸ் அண்ட் மிஸஸ் குளோபல் ஏசியனில் சமீபத்தில் பங்கேற்றது உட்பட, உலகளாவிய போட்டிகளில் பங்கேற்றுள்ளார்.

சவுதி அரேபியாவில் பெண்கள் தங்கள் உரிமைகள் மற்றும் சுதந்திரங்களின் பல்வேறு சவால்களையும் கட்டுப்பாடுகளையும் பல தசாப்தங்களாக எதிர்கொண்டு வந்துள்ளனர். சவுதி அரேபியா இஸ்லாமிய சட்டத்தை கடுமையாக பின்பற்றியது, இதன் விளைவாக பொது வாழ்க்கையில் பெண்களின் பங்கேற்பை பெரிய அளவில் கட்டுப்படுத்தியது.

இந்த கட்டுப்பாடுகளில் முக்கிய அம்சங்களில் ஒன்று பாதுகாவலர் அமைப்பு ஆகும், அங்கு பெண்களுக்கு சட்டப்பூர்வமாக ஒரு ஆண் பாதுகாவலர் இருக்க வேண்டும் இதில் தந்தை, கணவர், சகோதரர் அல்லது ஒரு மகன் ஆகியோர் யாரேனும் ஒருவர் இருக்கலாம். அவர்கள் தான் வீட்டு பெண்களின் வாழ்க்கையில் அதிகாரம் கொள்வார்கள். இந்த அதிகாரம் பெண்களின் கல்வி, வேலைவாய்ப்பு, பயணம் மற்றும் திருமணம் தொடர்பான முடிவுகளும் இதில் அடங்கும்.

ஆனால் இது அனைத்தும் சவுதி அரேபியாவின் மன்னராக முகமது பின் சல்மான் ஆட்சிக்கு வந்த பின்பு படிப்படியாக மாறியது. 2018 ஆம் ஆண்டு வரை, சவுதி அரேபியாவில் பெண்கள் வாகனம் ஓட்ட அனுமதிக்கப்படவில்லை.

இது உள்நாட்டிலும் சர்வதேச அளவிலும் மிகவும் சர்ச்சைக்குரிய பிரச்னையாக இருந்தது. பெண்கள் வாகனம் ஓட்டுவதற்கான இந்த தடை, நாட்டில் பெண்களின் உரிமைகள் மீதான பரந்த கட்டுப்பாடுகளின் அடையாளமாக பார்க்கப்பட்டது.

2018ல் சவுதியில் பெண்கள் வாகனம் ஓட்ட அனுமதிக்கப்பட்டனர், சமீபத்திய ஆண்டுகளில், பெண்களின் உரிமைகளை மேம்படுத்துவதையும் சமூகத்தில் அவர்களின் பங்களிப்பை அதிகரிப்பதையும் நோக்கமாகக் கொண்ட படிப்படியான மாற்றங்கள் மற்றும் சீர்திருத்தங்கள் கொண்டுவரப்பட்டு உள்ளன.

இந்த மாற்றங்கள் பெண்களை வாகனம் ஓட்ட அனுமதிப்பது, அவர்களுக்கு கல்வி மற்றும் வேலை வாய்ப்புகளை வழங்குவது மற்றும் சில கடுமையான பாதுகாவலர் சட்டங்களை தளர்த்துவது ஆகியவை அடங்கும்.

Story written by: I.Jayachandran