IIFL செக்யூரிட்டிஸ-க்கு செபி விதித்த தடை.. பங்குகள் தடாலடி வீழ்ச்சி..!

இந்தியாவின் முன்னணி ஆன்லைன் முதலீட்டு வர்த்தக தளமான IIFL செக்யூரிட்டிஸ் பங்குகள் செவ்வாய்க்கிழமை வர்த்தகத்தில் மட்டும் சுமார் 19.24 சதவீதம் சரிந்தது. இதற்கு முக்கிய காரணம் இந்திய பங்குச்சந்தைகள் மற்றும் பரிவர்த்தனை வாரியமான செபி விதித்த தடை அறிவிப்பு தான்.

ஏப்ரல் 2011 முதல் ஜனவரி 2017 வரையிலான வெவ்வேறு காலகட்டங்களில் பல விரிவான ஆய்வுகளை மேற்கொண்ட பிறகு, இரண்டு ஆண்டுகளுக்கு புதிய வாடிக்கையாளர்களை சேர்க்க கூடாது என சந்தைக் கட்டுப்பாட்டு அமைப்பான செபி தடை விதித்துள்ளது. இந்த தடை அறிவிப்பை தொடர்ந்து IIFL செக்யூரிட்டிஸ் பங்குகள் 57.5 ரூபாய் வரையில் சரிந்தது.

ஆகஸ்ட் 7 முதல் செப்டம்பர் 19, 2014 வரை நிறுவனத்தின் நான்கு வெவ்வேறு அலுவலகங்களில் ஒரே நேரத்தில் IIFL இன் கணக்குப் புத்தகங்களை SEBI ஆறு விரிவான ஆய்வுகளை நடத்தியது.

இந்த ஆய்வின் முடிவுகளில் ஐஐஎஃப்எல் தனது சொந்த நிதியை, வாடிக்கையாளர்களின் நிதியிலிருந்து பிரித்து நிர்வாகம் செய்ய தவறியது, டெபிட் பேலன்ஸ் உள்ள வாடிக்கையாளர்களின் நலனுக்காக வாடிக்கையாளர்களின் நிதிகளில் கடன் நிலுவைகளை தவறாகப் பயன்படுத்தியது மற்றும் வாடிக்கையாளர்கள் வங்கிக் கணக்கில் செய்யப்பட்ட முறைகேடுகளை செபி கண்டறிந்துள்ளது.

இதை தொடர்ந்து தான் IIFL செக்யூரிட்டிஸ் இரண்டு ஆண்டுகளுக்கு புதிய வாடிக்கையாளர்களை சேர்க்க கூடாது என செபி தடை விதித்துள்ளது. மேலும் செபியின் உத்தரவுக்கு பதிலளிக்கும் வகையில், ஐஐஎஃப்எல் செக்யூரிட்டீஸ், செக்யூரிட்டிஸ் மேல்முறையீட்டு தீர்ப்பாயத்தில் 2 வருட தடை உத்தரவுக்கு எதிராக மேல்முறையீடு செய்யத் தயாராகி வருவதாகக் IIFL தரப்பில் கூறப்பட்டு உள்ளது.

இதேபோல் மற்றொரு வழக்கான Shilpi Cable Technologies விவகாரத்தில் insider trading விதிமுறைகளை மீறியதற்காக செபி திங்கட்கிழமை ஆறு நிறுவனங்களை பத்திரச் சந்தைகளில் இருந்து ஓராண்டுக்கு தடை செய்தது மட்டும் அல்லாமல் மொத்தம் 70 லட்சம் ரூபாய் அபராதம் விதித்துள்ளது.

தடை செய்யப்பட்ட 6 நிறுவனங்கள் அல்லது தரப்புகள் பட்டியல் தினேஷ் குப்தா, தினேஷ் குப்தா HUF, ராஜேஷ் குப்தா, ராஜேஷ் குப்தா HUF, நிர்மலா குப்தா, அஜய் பின்கேப் கன்சல்டென்ட்ஸ் ஆகியோர் மீது இந்த ஒரு ஆண்டு தடை விதிக்கப்பட்டு உள்ளது.