செபி விசாரணை வளையத்தில் பிரபல யூடியூபர்.. ரூ.54 கோடி பறிமுதல்..!

அஸ்மிதா படேல் பிரபலமான யூடியூபர். இவருக்கு யூ டியூப்பில் 5.20 லட்சம் சந்தாதாரர்கள் உள்ளனர். மேலும் அஸ்மிதா படேல் குளோபல் ஸ்கூல் ஆஃப் டிரேடிங் பிரைவேட் லிமிடெட் என்ற பெயரில் பங்குச் சந்தை பயிற்சி நிறுவனத்தை நடத்தி வருகிறார்.

இந்நிலையில், அஸ்மிதா படேலின் குளோபல் ஸ்கூல் ஆஃப் டிரேடிங் பிரைவேட் லிமிடெட் பயிற்சி திட்டங்கள் என்ற பெயரில் சட்டவிரோத முதலீட்டு ஆலோசனை சேவைகள் வழங்குவதாக பங்குச் சந்தை ஒழுங்குமுறை அமைப்பான செபியிடம் 42 மாணவர்கள் புகார் கொடுத்தனர்.

இதனையடுத்து செபி இது குறித்து தீவிர விசாரணையில் இறங்கியது. விசாரணையில் மாணவர்கள் அளித்த புகாரில் உண்மை இருப்பதை கண்டு பிடித்தது. அஸ்மிதா படேலின் கல்வி நிறுவனம் அங்கீகரிக்கப்படாத முதலீட்டு ஆலோசனைகளை வழங்கியதாகவும், விதிமுறைகளை மீறியதாகவும் செபி தீர்மானித்தது.

இதனையடுத்து, அஸ்மிதா படேல் நடத்தும் குளோபல் ஸ்கூல் ஆஃப் டிரேடிங் நிறுவனத்திடமிருந்து ரூ.53.67 கோடியை பறிமுதல் செய்தது. மேலும், பல்வேறு திட்டங்களுக்கான கட்டணமாக வசூலிக்கப்பட்ட மேலும் உள்ள ரூ.104.6 கோடியை ஏன் பறிமுதல் செய்யக்கூடாது என்பதற்கு விளக்கம் அளிக்கும்படி அந்நிறுவனத்தை கேட்டுள்ளது.

2024 டிசம்பரிலும் செபி இது போன்ற ஒரு நடவடிக்கையை எடுத்தது. அப்போது சிக்கியது யூடியூபர் ரவீந்திர பாலு பாரதி மற்றும் அவரது ரவீந்திர பாரதி கல்வி நிறுவனமும். 2024 ஏப்ரல் 4ம் தேதி வரை செக்யூரிட்டிஸ் சந்தையிலிருந்து ரவீந்திர பாலு பாரதி மற்றும் அவரது நிறுவனத்தையும் தடை செய்தது. மேலும், பதிவு செய்யப்படாததாகக் கூறப்படும் முதலீட்டு ஆலோசனை வணிகத்திலிருந்து ஈட்டிய ரூ.9.5 கோடி சட்டவிரோத லாபத்தை திரும்ப கொடுக்கவும் உத்தரவிட்டது.

கடந்த ஜனவரி 30ம் தேதியன்று செபி வெளியிட்ட அறிவிப்பில், முதலீட்டாளர் கல்வியாக மாறுவேடமிடும் முதலீட்டு ஆலோசனையை தடுக்க, செல்வாக்கு செலுத்துபவர்கள் தங்கள் உள்ளடக்கத்தில் live prices பயன்படுத்துவதற்கு தடை விதிக்கப்படுவதாக அறிவித்தது. பதிவு செய்யப்பட்ட நிறுவனங்கள் கூட நேரடி அல்லது மறைமுக தொடர்புக்காக செல்வாக்கு செலுத்துபவர்களுக்கு பணம் கொடுக்க முடியாது. இந்த விதிமுறை 2024 ஆகஸ்ட் 29ம் தேதி முதல் அமலில் உள்ளது குறிப்பிடத்தக்கது.