329% லாபம் கொடுத்த தங்கப் பத்திரம்.. ரூ.1 லட்சம் முதலீட்டாளருக்கு ரூ.4.29 லட்சம் கிடைத்தது எப்படி..?

மத்திய அரசால் நிர்வகிக்கப்படும் சவரன் தங்கப் பத்திர திட்டம் (SGB), முதலீட்டாளர்களுக்கு பாதுகாப்புடன் கூடிய மிகப்பெரிய லாபத்தையும் ஈட்டித் தரும் என்பதை நிரூபித்துள்ளது. இந்த திட்டத்தின் 2017-18 தொடர்-IX இன் இறுதி மீட்பு விலை மற்றும் தேதியை இந்திய ரிசர்வ் வங்கி தற்போது அறிவித்துள்ளது. இந்த தொடர் நவம்பர் 27, 2025 அன்று முதிர்ச்சியடையும் நிலையில், இதன் மூலம் முதலீட்டாளர்கள் சுமார் 329% லாபத்தை பெற்றுள்ளனர்.

சவரன் தங்கப் பத்திரத் திட்டத்தின் விதிமுறைகளின்படி, ஒரு பத்திரம் வழங்கப்பட்ட நாளில் இருந்து 8 ஆண்டுகள் நிறைவடைந்த பிறகு பணம் திரும்பச் செலுத்தப்பட வேண்டும். அதன்படி, இந்த SGB தொடர் (2017-18 Series-IX), நவம்பர் 27, 2017 அன்று வழங்கப்பட்டதால், அதன் இறுதி மீட்பு தேதி நவம்பர் 27, 2025 என அதிகாரப்பூர்வமாக அறிவிக்கப்பட்டுள்ளது.

ரூ.12,484 என்ற உச்ச விலை நிர்ணயம் : இந்த SGB தொடரின் இறுதி மீட்பு விலை, ஒரு கிராமுக்கு ரூ.12,484 ஆக நிர்ணயிக்கப்பட்டுள்ளது. இந்த விலையானது, இறுதி மீட்புக்கு முந்தைய 3 வேலை நாட்களின் (நவம்பர் 24, 25, 26) தங்கத்தின் சராசரி விலையின் அடிப்படையில் கணக்கிடப்பட்டுள்ளது.

இந்த தொடர் பத்திரங்களை ஆன்லைன் மூலம் தள்ளுபடியுடன் வாங்கிய முதலீட்டாளர்கள், ஒரு கிராமுக்கு ரூ.2,914 மட்டுமே செலவழித்திருப்பார்கள். 8 ஆண்டுகளுக்குப் பிறகு, அவர்கள் ரூ.12,484 பெறுவதால், வட்டி வருமானத்தை கணக்கில் கொள்ளாமல், அவர்களுக்கு கிடைத்த தனிப்பட்ட லாபம் ரூ.9,570 ஆகும். இது முதலீட்டு மதிப்பில் 328.41% என்ற மிக அற்புதமான லாபத்தை உறுதி செய்துள்ளது.

தங்கப் பத்திரத்தின் முக்கிய அம்சங்கள் :சவரன் தங்கப் பத்திரத் திட்டம் என்பது, வாடிக்கையாளர்கள் உண்மையான தங்கத்தை ஆவணம் அல்லது டிமேட் வடிவில் வைத்திருப்பதற்கான ஒரு பாதுகாப்பான மாற்று வழியாகும். இதனால், தங்கம் சேமிப்புக் கிடங்கு, பாதுகாப்பு மற்றும் அதன் தூய்மை பற்றிய எந்த கவலையும் இல்லை.

இந்தப் பத்திரங்களில் முதலீடு செய்பவர்களுக்கு, ஆண்டுக்கு 2.5% நிலையான வட்டி வழங்கப்படுகிறது. மேலும், இந்த திட்டம் முதிர்வடைய 8 ஆண்டுகள் என்றாலும், முதலீட்டாளர்கள் 5 ஆண்டுகளுக்குப் பிறகு வட்டி செலுத்தும் தேதிகளில் முன்கூட்டியே பணத்தை எடுத்துக் கொள்ளலாம். இவற்றை சந்தையில் விற்கலாம் அல்லது கடனுக்கு பிணையாகவும் பயன்படுத்தலாம். சந்தையில் தங்கத்தின் விலை குறைந்தாலும், முதலீட்டாளர் தான் வாங்கிய தங்கத்தின் அளவு அடிப்படையில் எந்த இழப்பையும் சந்திக்க மாட்டார்.

இந்தியாவில் வசிப்பவர்கள், அறக்கட்டளைகள், பல்கலைக்கழகங்கள் மற்றும் தொண்டு நிறுவனங்கள் இந்த திட்டத்தில் முதலீடு செய்ய தகுதியானவர்கள். முதிர்வு தொகையானது, முதிர்வுத் தேதியன்று முதலீட்டாளரின் வங்கிக் கணக்கில் அதற்கான தொகை நேரடியாக செலுத்தப்படும். எனவே, வங்கிக் கணக்கு விவரங்களில் ஏதேனும் மாற்றம் இருந்தால், அதை உடனடியாக வங்கிக்கு தெரிவிப்பது அவசியம் ஆகும்.