அமெரிக்க ஸ்மார்ட்போன் இறக்குமதியில் கலக்கும் இந்தியா.. கதிகலங்கிப் போன சீனா.!!

அமெரிக்காவில் இறக்குமதி செய்யப்படும் ஸ்மார்ட்போன்களில் இந்தியாவின் பங்கு 2025ஆம் ஆண்டின் முதல் 5 மாதங்களில் 36 சதவீதமாக உயர்ந்துள்ளது. இது 2024இல் இருந்த 11 சதவீதத்துடன் ஒப்பிடுகையில் மிகப் பெரிய உயர்வாகும். அதே சமயம், சீனாவின் பங்கு 82 சதவீதத்தில் இருந்து 49 சதவீதம் வரை குறைந்துள்ளது. இந்த மாற்றத்திற்கு முக்கிய காரணம், அமெரிக்காவில் பிரபலமான ஆப்பிள் ஐபோன்கள் இந்தியாவில் தயாரிக்கப்பட்டு அதிக அளவில் அமெரிக்காவுக்கு அனுப்பப்படுவதாகும்.

இதனால், இந்தியா அமெரிக்காவில் இறக்குமதி செய்யப்படும் ஸ்மார்ட்போன்களில் மூன்றில் ஒன்று வழங்கும் முக்கிய நாடாக மாறியுள்ளது. இந்த மாற்றம் அமெரிக்கா-இந்தியா இடையேயான வணிகப் பேச்சுவார்த்தைகள் மற்றும் தொழில்நுட்ப உற்பத்தி வளர்ச்சியின் காரணமாக அமைந்துள்ளது. இதன் காரணமாக, இந்தியாவின் தொழில் வளர்ச்சி மற்றும் உலகச் சந்தையில் அதன் முக்கியத்துவம் மேலும் அதிகரித்து வருகிறது.

இந்தியா, அமெரிக்காவுக்கு அதிக மதிப்பில் ஸ்மார்ட்போன்களை ஏற்றுமதி செய்யும் முக்கிய நாடாக இருந்தாலும், அமெரிக்கா பிரதமர் டொனால்ட் டிரம்ப் இந்தியாவில் தயாரிக்கப்பட்ட ஐபோன்களுக்கு 25 சதவீத வரி விதிக்கப்படலாம் என்று தெரிவித்துள்ளார். US International Trade Commission (USITC) தகவலின்படி, 2025 ஜனவரி முதல் மே மாதம் வரை, இந்தியாவில் தயாரிக்கப்பட்ட ஸ்மார்ட்போன்கள் அமெரிக்காவில் 2.13 கோடி யூனிட் அளவில் இறக்குமதி செய்யப்பட்டுள்ளன. இது கடந்த ஆண்டுடன் ஒப்பிடுகையில் 3 மடங்கு அதிகமாகும்.

மொத்த இறக்குமதி மதிப்பு 9.35 பில்லியன் அமெரிக்க டாலர் ஆகும். இது 2024 முழு ஆண்டிற்கான மதிப்பை விட 182 சதவீதம் அதிகமாகும். மே மாதத்தில், ஆப்பிள் நிறுவனத்தின் தலைமை நிர்வாக அதிகாரி டிம் குக் கூறுகையில், "2025 ஏப்ரல்-ஜூன் காலாண்டில் அமெரிக்காவில் விற்பனை செய்யப்பட்ட பெரும்பாலான ஐபோன்கள் இந்தியாவில் தயாரிக்கப்பட்டவை. இந்தியாவில் தற்போது ஆப்பிள் உலகளாவிய ஐபோன் உற்பத்தி திறனின் சுமார் 20% உள்ளது" என்றார்.

அதேபோல், இந்தாண்டில் சீனாவில் தயாரிக்கப்பட்ட ஸ்மார்ட்போன்கள் அமெரிக்காவில் 2.94 கோடி யூனிட் அளவில் இறக்குமதி செய்யப்பட்டுள்ளன. இது கடந்தாண்டுடன் ஒப்பிடுகையில் 27% குறைவு. மொத்த இறக்குமதி மதிப்பு 10 பில்லியன் அமெரிக்க டாலர் ஆகும். இந்நிலையில், அமெரிக்கா இறக்குமதிகளில், சீனாவுக்கு 49 சதவீதம் பங்கு உள்ளது. இந்தியா 36 சதவீதம் பங்குடன் இரண்டாம் இடத்தில் உள்ளது. மேலும், வியட்நாம் 14 சதவீத பங்குடன் 83 லட்சம் ஸ்மார்ட்போன்களை ஏற்றுமதி செய்துள்ளது.

ஆப்பிள் தனது ஐபோன் ஸ்மார்ட்போன் உற்பத்தியை சீனாவில் இருந்து இந்தியாவுக்கு கடந்த 2020-இல் மாற்றியது. இதற்கு காரணமாக, இந்திய அரசு அறிமுகப்படுத்திய Production Linked Incentive (PLI) திட்டம் தான். இந்த திட்டம் இந்தியாவில் ஸ்மார்ட்போன் உற்பத்தியை ஊக்குவித்து வளர்ச்சியை அதிகரித்தது. ஆப்பிள், அதன் ஒப்பந்த உற்பத்தியாளர்களின் மூலம், இந்தத் திட்டத்தின் நன்மைகளைப் பயன்படுத்தி உற்பத்தி நிலையங்களை விரிவுபடுத்தியுள்ளது. இதனால், அவர்கள் சீனாவில் இருந்து உற்பத்தி செய்வதை குறைத்து, இந்தியாவில் உற்பத்தியை அதிகரித்துள்ளனர்.

முன்னதாக, பழைய மாடல்கள் கொண்ட ஐபோன்கள் மட்டுமே இந்தியாவில் தயாரிக்கப்பட்டிருந்தாலும், இப்போது ஆப்பிள் இந்தியாவில் தனது அனைத்து ஐபோன் மாதிரிகளையும், அதில் சிறந்த தரமான Pro மாதிரிகள் கூட சேர்ந்து, தயாரிக்கிறது. இதனால், இந்தியா உலகின் முக்கியமான ஐபோன் உற்பத்தி மையமாக மாறி வருகிறது. இது இந்தியாவின் தொழிற்சாலை வளர்ச்சிக்கு, வேலை வாய்ப்புகளுக்கு பெரிய உதவியாக உள்ளது.

மே மாதத்தில், அமெரிக்க அதிபர் டொனால்ட் டிரம்ப் சமூக வலைதளத்தில், "நான் ஆப்பிள் CEO-வுக்கு ஏற்கனவே தெரிவித்துள்ளேன். அமெரிக்காவில் விற்கப்படும் ஐபோன்கள் இந்தியா அல்லது வேறு எந்த இடத்திலும் தயாரிக்கப்படாமல், அமெரிக்காவிலேயே தயாரிக்கப்பட வேண்டும். இது நடைபெறாவிட்டால், ஆப்பிள் குறைந்தது 25% வரி அமெரிக்காவுக்கு செலுத்த வேண்டும்" என்று தெரிவித்துள்ளார்.

இந்த விமர்சனத்துக்குப் பிறகும், ஆப்பிள் இந்தியாவில் உற்பத்தியை விரிவுபடுத்திக் கொண்டுள்ளது. அதன் ஒப்பந்த உற்பத்தியாளர் ஃபாக்ஸ்கான், மே மாதம் யுஜான் டெக்னாலஜீஸ் இந்தியா பிரைவேட் லிமிடெட் நிறுவனத்தில் 1.49 பில்லியன் அமெரிக்க டாலர் முதலீடு செய்துள்ளது. இந்த புதிய தொழிற்சாலை தமிழ்நாட்டில் அமைக்கப்படவுள்ளது. அங்கு ஃபாக்ஸ்கான் ஏற்கனவே பெரிய ஐபோன் உற்பத்தி நிலையத்தை நடத்தி வருவது குறிப்பிடத்தக்கது.