Lakme, Westside மூலம் டாடா குழுமத்தை ஃபேஷன் வணிகத்தில் வெற்றி பெற வைத்த சிமோன் டாடா மரணம்!!

ரத்தன் டாடாவின் வளர்ப்பு தாயும், டாடா குழுமத்தின் மூத்த நிர்வாகியுமான சிமோன் டாடா, 95 வயதில், மும்பை பிரீச் கேண்டி மருத்துவமனையில் காலமானார். பார்கின்சன் நோயின் அறிகுறிகளுடன் போராடி வந்த அவர், கடந்த ஆகஸ்ட் மாதம் உடல்நிலை மோசமடைந்ததால், துபாயில் இருந்து மும்பைக்கு விமானம் மூலம் கொண்டுவரப்பட்டு தீவிர சிகிச்சை பெற்றுவந்தார்.

சுவிட்சர்லாந்தின் ஜெனீவாவில் பிறந்த சிமோன், தனது 23வது வயதில், 1953 ஆம் ஆண்டு ஒரு சுற்றுலாப் பயணியாக முதன்முதலில் இந்தியாவுக்கு வந்தார். அங்கு, விவாகரத்து பெற்றவரும், தன்னைவிட 26 வயது மூத்தவருமான நாவல் டாடாவை சந்தித்து, 1955 ஆம் ஆண்டில் திருமணம் செய்து கொண்டார். அதன்பின் அவர் நிரந்தரமாக மும்பையில் குடியேறினார்.

சிமோன் டாடா, இந்தியாவின் புகழ்பெற்ற அழகுசாதனப் பிராண்டான லாக்மீயை (Lakmé) உருவாக்குவதில் முக்கியப் பங்காற்றினார். இந்தியப் பெண்கள் வெளிநாட்டு அழகுசாதனப் பொருட்களைச் சார்ந்திராமல் இருக்க வேண்டும் என்ற அன்றைய பிரதமர் ஜவஹர்லால் நேருவின் வேண்டுகோளுக்கு இணங்க, டாடா குழுமம் 1952 இல் லாக்மீயை நிறுவியது. 1980களின் முற்பகுதியில் அவர் லாக்மீயின் தலைவராகவும் பொறுப்பு வகித்து வழிநடத்தினார்.

லாக்மீ நிறுவனத்தைத் தொடர்ந்து, ட்ரென்ட் லிமிடெட் (Trent Ltd.) என்ற சில்லறை வர்த்தகச் சங்கிலியை சிமோன் டாடா நிறுவினார். 2006 ஆம் ஆண்டு வரை ட்ரென்ட்டை வழிநடத்தியதன் மூலம், அவர் நான்கு தசாப்தங்களுக்கும் மேலாக இந்தியாவின் அழகுசாதன மற்றும் சில்லறை வர்த்தகத் தொழில்களை வடிவமைத்தார். 1996 இல், டாடா குழுமம் ஒரு மறுசீரமைப்பு நடவடிக்கையின் ஒரு பகுதியாக லாக்மீயை ஹிந்துஸ்தான் யூனிலீவருக்கு விற்றது.

லாக்மீ விற்பனை மூலம் கிடைத்த நிதியைக் கொண்டு, சிமோன் ட்ரென்டின் கீழ் வெஸ்ட்ஸைடை (Westside) நிறுவினார். இது இந்தியாவின் மிகவும் பிரபலமான பேஷன் விற்பனை நிறுவனங்களில் ஒன்றாக மாறியது. மேலும், அவர் டாடா இண்டஸ்ட்ரீஸ் (Tata Industries) குழுமத்தின் நிர்வாகக் குழுவிலும் பணியாற்றினார். 2006 இல் ஓய்வு பெற்ற பிறகு, சிமோன் டாடா பொது நிகழ்வுகளில் குறைவாகவே தோன்றினார்.

தற்போது டாடா குழுமத்தில் நல்ல லாபம் தரக்கூடிய ஒரு வணிக பிரிவாக டிரெண்ட் செயல்படுகிறது. ஸூடியோ, வெஸ்ட் சைடு ஆகியவற்றின் மூலம் இந்தியாவில் பேஷன் பிரிவில் சில்லறை வணிகத்தில் வேகமாக வளரும் நிறுவனமாக இருக்கிறது.