சென்னையை வைத்து இந்தியாவை பிடிக்க ஆசைப்படும் HTL குரூப்.. மெகா திட்டம்..!!

உலகின் முன்னணி பர்னிச்சர் தயாரிப்பு நிறுவனமான ஹெச்.டி.எல் குழுமம், ஜெர்மனியின் டோமிசில் (Domicil) மற்றும் ஃபாப்ரிக்கா (Fabbrica), இத்தாலி நாட்டின் கொரியம் இத்தாலியா (Corium Italia) ஆகிய உலக பிரபலமான பிராண்டுகளின் பர்னிச்சர்களை இந்தியாவிலேயே தயாரிக்க உள்ளதாக அறிவித்துள்ளது.

இந்த ஆண்டின் இறுதிக்குள் இந்த முன்னணி பிராண்டுகளின் பர்னிச்சர்களின் தயாரிப்பு பணிகள் தொடங்கும் என்று எதிர்பார்க்கப்படுகிறது.

சிங்கப்பூரை தலைமையிடமாகக் கொண்ட HTL குரூப் நிறுவனம், தற்போது இந்த பிராண்டுகளை இத்தாலி மற்றும் சீனாவிலிருந்து இறக்குமதி செய்து இந்தியச் சந்தையில் விற்பனை செய்து வருகிறது. இறக்குமதியை நிறுத்திவிட்டு சென்னை தொழிற்சாலையில் மிகப்பெரிய அளவில் உற்பத்தி செய்து இந்தியா முழுவதும் விற்பது தான் HTL குரூப்-ன் திட்டம்.

2022 ஆம் ஆண்டில் இந்தியச் சந்தைக்குள் நுழைந்த ஹெச்.டி.எல் குழுமம், நாட்டின் 32 பில்லியன் டாலர் மதிப்புள்ள பர்னிச்சர் சந்தையில் தனது இருப்பை வலுப்படுத்தத் திட்டமிட்டு, சென்னை தொழிற்சாலையில் அடுத்தடுத்து முன்னணி பிராண்டு பொருட்களை தயாரிக்க உள்ளது.

"இந்தியாவில் சுமார் 90% பர்னிச்சர் சந்தை வகைப்படுத்தாத சந்தையாக உள்ளது. இந்த சந்தையின் 5% முதல் 10% வரையிலான பங்கை நாங்கள் கைப்பற்ற முடிந்தாலும், அது எங்களுக்கு மிகப்பெரிய சாதனையாக இருக்கும்" என்று சிங்கப்பூர் ஹெச்.டி.எல் குழுமத்தின் இந்தியா மற்றும் மத்திய கிழக்கு பிராந்திய தலைவரான மனோஜ் நாயர் தெரிவித்தார்.

2023 ஆம் ஆண்டில், இந்தியாவில் ரூ.125 கோடி மதிப்பிலான வருமானத்தைப் பெற்ற ஹெச்.டி.எல் குழுமம், 2024 ஆம் ஆண்டில் 50% முதல் 60% வரையிலான வளர்ச்சியை இலக்காகக் கொண்டு பிராண்டுகளின் எண்ணிக்கை மற்றும் தயாரிப்பை அதிகரித்து வருகிறது.

"டோமிசில், ஃபாப்ரிக்கா மற்றும் கொரியம் ஆகிய பிராண்டுகளின் தயாரிப்பை இந்த ஆண்டின் கடைசி காலாண்டில் தொடங்குவோம். இவற்றில் முதலில் டோமிசில் சோஃபாக்கள் தயாரிக்கப்படும். இந்த பிராண்டுகளை இந்தியாவிலேயே தயாரிப்பதன் மூலம், விலை குறைப்பு மற்றும் வாடிக்கையாளர்களையும் சந்தையையும் விரைவாகச் சென்றடைவது ஆகிய நன்மைகள் கிடைக்கும்" என்று டைம்ஸ் பத்திரிக்கையிடம் தெரிவித்தார்.

மேலும் இறக்குமதி செய்யப்படும் இந்த மூன்று பிராண்டுகளின் விற்பனை, இந்திய சந்தையில் இந்நிறுவனத்தின் மொத்த விற்பனையில் 20% பங்களிப்பு செய்கின்றன. இதை விரிவாக்கம் செய்யவும், லாப அளவீட்டை அதிகரிக்கவும் இந்த முடிவு எடுக்கப்பட்டு உள்ளது.

ஹெச்.டி.எல் குழுமம் இத்தாலி, வியட்நாம், சீனா மற்றும் இந்தியா ஆகிய நாடுகளில் ஏழு தொழிற்சாலைகளை இயக்கி வருகிறது. சென்னையில் உள்ள தொழிற்சாலை தான் இந்தியாவில் உள்ள ஒரே தொழிற்சாலையாகும்.