இந்திய ரயில்வே துறை ஸ்லீப்பர், ஏசி வகுப்பு விதிகளை திடீரென மாற்றியது..!

நீங்கள் ரயிலில் நீண்ட தூரம் பயணம் செய்பவராக இருந்தால் இந்த தகவல் உங்களுக்கு மிகவும் முக்கியமானதாகும். பயணிகளின் வசதிக்கு ஏற்றபடி இந்திய ரயில்வே அவ்வப்போது சில விதிகளை அமல்படுத்தி வருகிறது.

அதுபோல் அண்மையில் ரயிலில் படுக்கை வசதி கொண்ட ஸ்லீப்பர் மற்றும் ஏசி கோச்களில் பயணிப்பவர்களுக்கான விதியை இந்திய ரயில்வே மாற்றியுள்ளது. அதன்படி பயணிகளின் தூங்கும் நேரம் குறைக்கப்பட்டுள்ளது. முன்னதாக பயணிகள் 9 மணிநேரம் வரை பயணத்தின்போது தூங்கலாம். இப்போது அந்த நேரம் 8 மணிநேரமாக குறைக்கப்பட்டுள்ளது.

புதிய விதியின்படி இரவு 10 மணி முதல் காலை 6 மணி வரை தான் இனி தூங்க முடியும். இதற்கு முன்பு இரவு 9 மணி முதல் காலை 6 மணிவரை தூங்கலாம்.

படுக்கை வசதி உள்ள அனைத்து ரயில்களிலும் இந்த விதி அமலுக்கு வந்துள்ளது. இதன் மூலம் நீண்ட தொலைவு பயணிக்கும் பயணிகள் வசதியாக செல்லலாம் என்று இந்திய ரயில்வே கூறியுள்ளது.

ரயில்வேயின்படி இரவு 10 மணி முதல் காலை 6 மணி வரை தூங்குவது நல்ல சமயம் எனக் கருதப்படுகிறது. இந்த விதி அமலாவதற்கு முன்பாக மிடில் பெர்த்தில் படுத்திருக்கும் பயணிகள் இரவில் மிக சீக்கிரமாக தூங்கிவிடுவதாகவும் காலையில் மிகவும் தாமதமாக எழுகின்றனர் என்று புகார்கள் குவிந்தன.

இதனால் லோயர் பெர்த்தில் பயணிப்பவர்களுக்கு சிரமம் ஏற்பட்டது. பல நேரங்களில் பயணிகள் இடையே இதனால் தகராறுகள் எழுந்துள்ளன.
இப்போது புதிய விதியின்படி படுக்கை நேரம் நிர்ணயிக்கப்பட்டதால் எப்படியிருந்தாலும் காலை 6 மணிக்கு எழுந்து விட வேண்டும்.

மிடில் பெர்த் வைத்திருப்பவர்கள் இரவு 10 மணி முதல் காலை 6 மணி வரை மட்டுமே அதைப் பயன்படுத்த முடியும். காலை 6 மணிக்கு மிடில் பெர்த்தை இறக்கிவிட வேண்டும். அதன் பின்னர் லோயர் சீட்டில் உட்கார்ந்து செல்ல வேண்டும்.

அப்படிச் செய்யாவிட்டால் உங்கள் மீது நடவடிக்கை எடுக்கப்படும்.
புதிய விதியின்படி இரவு 10 மணிக்கு முன்பாக ரிசர்வ் செய்த பெட்டியில் தூங்க முடியாது. காலை 6 மணிக்கு மேல் தூங்க முடியாது. யாராவது இந்த விதியை மீறினால் இதுபற்றி ரயில்வேக்கு புகார் செய்யலாம்.

Story written by: Jayachandran