உலகின் சக்தி வாய்ந்த பெண்கள் பட்டியலில் அரசு நிறுவன அதிகாரி.. யார் இந்த சோமா மொண்டல்..!!

ஆண்களுக்கு இணையாக பெண்களும் எல்லா துறைகளிலும் தடம் பதிக்க தொடங்கி விட்டனர். ஆண்கள் ஆதிக்கம் மிகுந்த தொழிற்துறையில் பல பெண்கள் படிப்படியாக உயர்ந்து உச்ச பதவிகளை வகித்துள்ளனர். அவர்களின் ஒருவர் தான் சோமா மொண்டல்.

ஸ்டீல் தயாரிப்பில் ஈடுபட்டு வரும் பொதுத்துறை நிறுவனமான SAIL-ன் தலைவர் பதவியில் இருந்த முதல் பெண்மணி இவர் என்பது குறிப்பிடத்தக்கது. மேலும் போர்ப்ஸின் சக்தி வாய்ந்த பெண்கள் பட்டியலிலும் அவர் இடம் பெற்றுள்ளார்.

நடுத்தர குடும்பத்தில் பிறந்து ரூ.41,075 கோடி மதிப்பிலான அரசு நிறுவனத்தின் தலைவராக உயர்ந்த சோமா மொண்டலின் வாழ்க்கை கதையை கொஞ்சம் தெரிந்து கொள்ளுங்க.

ஒடிசா மாநிலம் புவனேஷ்வரில் ஒரு பெங்காலி நடுத்தர குடும்பத்தில் வளர்ந்தவர் சோமா மொண்டல். இவரது தந்தை ஒரு விவசாய பொருளாதார நிபுணர். சோமா மொண்டல் ரூர்கேலாவில் உள்ள என்.ஐ.டி.யில் எலக்ட்ரிக்கல் இன்ஜினியரிங் பட்டம் பெற்றவர்.

பின்னர் மத்திய அரசு நிறுவனமான நால்கோவில் வேலைக்கு சேர்ந்தார். கடின உழைப்பு மற்றும் அனுபவம் காரணமாக அந்நிறுவனத்தின் வர்த்தக பிரிவு இயக்குனராக உயர்ந்தார். 2017ல் ஸ்டீல் அதார்ட்டி ஆஃப் இந்தியா (செயில்) நிறுவனத்தின் இயக்குனராக பணியமர்த்தப்பட்டார்.

2021ல் அவர் மத்திய அரசின் பொதுத்துறை நிறுவனங்களை பிரதிநிதித்துவப்படுத்தும் அமைப்பான பொது நிறுவனங்களின் நிலை மன்றத்தின் தலைவராக தேர்ந்தெடுக்கப்பட்டார். அதே ஆண்டில் செயில் நிறுவனத்தின் தலைவராக உயர்த்தப்பட்டார்.

இதனையடுத்து அந்நிறுவனத்தின் முதல் பெண் தலைவர் என்ற பெருமையை பெற்றார். 2023 ஏப்ரல் 30ம் தேதியன்று பதவியில் இருந்து ஓய்வு பெற்றார். உலோக துறையில் 30 ஆண்டுகளுக்கும் மேலான அனுபவம் கொண்டவர்.

அவர் செயில் நிறுவனத்தின் தலைவராக இருந்தபோது, அதுவரை இல்லாத அளவுக்கு அந்நிறுவனத்தின் நிதி வளர்ச்சியை பதிவு செய்தார். அவர் தலைமை பொறுப்பில் இருந்த முதல் ஆண்டில் செயில் நிறுவனத்தின் லாபம் 3 மடங்கு அதிகரித்து ரூ.12,000 கோடியாக உயர்ந்தது.

கடந்த 6ம் தேதி நிலவரப்படி செயில் நிறுவனத்தின் பங்குகளின் சந்தை மதிப்பு ரூ.41,075ஆக இருந்தது. 2023ம் ஆண்டுக்கான போர்ப்ஸின் உலகின் சக்தி வாய்ந்த பெண்கள் பட்டியலில் 70வது இடத்தை சோமா மொண்டல் பிடித்துள்ளார்.