கபாலி ரஜினி மாதிரி திரும்ப வரும் ஸ்பைஸ்ஜெட்.. 10 விமானங்கள் ரெடி..!

இந்தியாவை சேர்ந்த விமான சேவை நிறுவனமான ஸ்பைஸ் ஜெட், நிறுத்தி வைத்திருக்கும் 10 விமானங்களை மீண்டும் சேவைக்கு கொண்டு வருவதற்கான பணிகளை தீவிர படுத்தியுள்ளது. இதன்படி ஏப்ரல் மாதத்திற்குள் ஸ்பைஸ் ஜெட் நிறுவனம் 10 விமானங்களை மீண்டும் சேவைக்கு கொண்டு வர இருக்கிறது.

2024 அக்டோபர் மாதத்தில் இருந்து ஸ்பைஸ் ஜெட் நிறுவனம் தங்களுடைய விமான சேவையை விரிவாக்கம் செய்து வருகிறது. அந்த வகையில் கூடுதலாக 10 விமானங்களை அண்மையில் தான் தங்கள் சேவையில் இணைத்தது. இதில் ஏற்கனவே நிறுத்தி வைக்கப்பட்டிருந்த மூன்று விமானங்களோடு, புதிதாக ஏழு விமானங்களை குத்தகைக்கு எடுத்தது. ஸ்பைஸ் ஜெட் நிறுவனம் அண்மையில் தான் அமெரிக்காவை சேர்ந்த என்ஜின் பராமரிப்பு நிறுவனத்துடன் ஒரு ஒப்பந்தத்தை மேற்கொண்டது.

தற்போது பயன்படுத்தாமல் நிறுத்தி வைக்கப்பட்டிருக்கும் விமானங்களை சீரமைப்பு செய்து மீண்டும் பயன்பாட்டுக்கு கொண்டு வருவது என இந்த ஒப்பந்தத்தில் கையெழுத்திடப்பட்டுள்ளது. இதற்கான பணிகளை தீவிர படுத்திருப்பதாக ஸ்பைஸ் ஜெட் நிறுவனத்தின் மேலாண் இயக்குனர் அஜய் சிங் தெரிவித்துள்ளார். எக்கனாமிக் டைம்ஸ்க்கு பேட்டி அளித்துள்ள அவர் ஏப்ரல் மாத மத்தியில் மேலும் 10 விமானங்கள் சேவைக்கு கொண்டு வரப்படும் எனக் கூறியுள்ளார்.

ஸ்பைஸ் ஜெட் நிறுவனம் மீண்டும் வந்து வளர்ச்சி பாதையை நோக்கி செல்வதாகவும் அவர் தெரிவித்துள்ளார். லட்சக்கணக்கான இந்திய மக்களுக்கு குறைந்த கட்டணத்தில் விமான சேவை வழங்க வேண்டும் என்ற பாதையை நோக்கி நாங்கள் பயணித்து வருகிறோம் என அஜய் சிங் கூறியுள்ளார். ஜனவரி 10ஆம் தேதி நிலவரப்படி ஸ்பைஸ் ஜெட் நிறுவனம் மொத்தம் 62 விமானங்களை சொந்தமாக வைத்திருக்கிறது. இதில் 28 விமானங்கள் செயல்பாட்டில் இருக்கின்றன.

தற்போது பயன்பாட்டில் இருப்பதில் 20 விமானங்கள் Boeing B737 மாடல், 6 விமானங்கள் De Havilland Canada DHC-8 Dash 8, இரண்டு விமானங்கள் Airbus A320s ஆகும். மீதமுள்ள 34 இல் 16 விமானங்கள் Boeing B737 , 18 விமானங்கள் DHC-8 Dash 8 ஆகும். இந்த 34 விமானங்களும் பல்வேறு காரணங்களுக்காக அங்கே நிறுத்தி வைக்கப்பட்டுள்ளன. கூடிய விரைவில் தங்கள் நிறுவனம் பல்வேறு புதிய பாதைகளில் விமானத்தை இயக்கப் போகிறது என்று ஸ்பைஸ் ஜெட் நிறுவனம் கூறுகிறது.

ஸ்பைஸ் ஜெட் இந்தியாவில் அதிக எண்ணிக்கையிலான உள்நாட்டு பயணிகள் பயணம் செய்த ஆறாவது பெரிய விமான சேவை நிறுவனம் என்ற பெருமை கொண்டது. 73 பகுதிகளை இணைக்கும் வகையில் விமான சேவை வழங்கி வருகிறது.

இதில் இந்தியாவை சேர்ந்தவை 60 இடங்கள் வெளிநாடுகளில் 13 இடங்களுக்கு ஸ்பைஸ் ஜெட் நிறுவனம் விமான சேவை வழங்குகிறது. 2021 ஆம் ஆண்டு மிகப்பெரிய நஷ்டத்தை சந்தித்த இந்நிறுவனம் விமான சேவைகளை குறைத்து கொண்டது. இந்த நிறுவனம் படிப்படியாக மீண்டு வருகிறது.

Story written by: Devika