ஷாரூக் கான் பக்கத்து வீட்டுக்காரர் இவரா..? ரூ.11,560 கோடி சொத்து, ஆடம்பர வாழ்க்கை.. வாவ்..!

ஃபௌஜி என்ற தூர்தர்ஷன் சீரியல் மூலம் அறிமுகமான நடிகர் ஷாரூக் கான் இன்றைக்கு பாலிவுட் மெகா ஸ்டாராக விளங்குகிறார். கடந்த 30 ஆண்டுகளாக ரசிகர்களை தனது நடிப்பால் மகிழ்வித்து வரும் ஷாரூக் கானின் நிகர சொத்து மதிப்பு தற்போது ரூ.6,300 கோடி ஆகும். நடிப்பு தவிர பல்வேறு தொழில்களில் ஷாரூக் கான் முதலீடு செய்து வருமானத்தைப் பெறுகிறார்.

ஷாரூக் கானைப் போலவே அவரது பக்கத்துவீட்டுக்காரரான ரியல் எஸ்டேட் தொழிலதிபர் சுபாஷ் ரன்வாலும் தனது வாழ்க்கைப் பயணத்தை எளிமையாகவே தொடங்கினார்.

1964இல் மகாராஷ்டிர மாநிலம் துலியா என்ற சிறிய கிராமத்தில் இருந்து தனது பாக்கெட்டில் வெறும் 100 ரூபாயுடன் மும்பைக்கு வந்து குடியேறியவர் சுபாஷ் ரன்வால். நீங்கள் எதையாவது முழு மனதோடு நேசித்தால் அதை ஷாரூக் கானின் ஓம் சாந்தி ஓம் படத்தில் வரும் இந்தப் பிரபஞ்சம் உங்கள் வசம் கொண்டு வந்து சேர்க்கும் என்ற வசனத்துக்கு ஏற்ப ரன்வாலின் வாழ்க்கையும் அமைந்தது.

ரியல் எஸ்டேட் பிசினஸில் ஈடுபட்ட ரன்வாலின் நிகர சொத்து மதிப்பு இப்போது ரூ.11,560 கோடி என போர்ப்ஸ் கணித்துள்ளது. ரன்வால் குரூப்பின் தலைவரான சுபாஷ் ரன்வால் மிகப் பெரிய ரியல் எஸ்டேட் அதிபர் ஆவார். மும்பையின் பாந்த்ராவில் கடற்கரையோரமாக அமைந்துள்ள ஷாரூக் கான் வீட்டின் பக்கத்து வீட்டில் சுபாஷ் ரன்வால் வசித்து வருகிறார்.

தாணேயில் முதன்முதலாக 10,000 சதுர அடியில் தனது முதல் ஹவுசிங் சொசைட்டியை அமைத்தார். அடுத்த சில ஆண்டுகள் கழித்து ரன்வாலின் பிரதான திட்டமான 16 அடுக்கு மாடி வீடுகளைக் கொண்ட ரன்வால் நகர் மிகப் பெரிய வரவேற்பைப் பெற்றது.

நடுத்தர வகுப்பைச் சேர்ந்த மக்களுக்குக் கட்டுபடியாகக் கூடிய வீடுகளை மும்பையில் கட்டித்தரவேண்டும் என்ற நோக்கத்தில் சுபாஷ் ரன்வால் செயல்பட்டு வருகிறார். ரன்வால் குரூப் இப்போது பெரிய மால்களை கட்டி வருகிறது. ரன்வாலின் மகன்களும் தங்களது குடும்பத் தொழிலில் ஈடுபட்டுள்ளனர்.

கட்கோபாரில் நடிகர் அமிதாப் பச்சன் திறந்து வைத்த 12 லட்சம் பரப்பளவிலான ஆர் சிட்டி மால், முலுந்தில் ஆர் மால் போன்றவை குறிப்பிடத்தக்க திட்டங்களாகும்.