பங்குச் சந்தையில் பெரும் சர்ச்சை.. முன்னாள் SEBI தலைவர் மாதபி புச்சுக்கு எதிராக ACB வழக்கு!!

இந்தியாவின் பங்குச் சந்தையை கட்டுப்படுத்தும் அமைப்பு இந்திய பத்திரங்கள் மற்றும் பரிவர்த்தனை வாரியம் (SEBI) முன்னாள் தலைவர் மாதபி பூரி புச் உள்ளிட்ட ஆறு பேருக்கு எதிராக வழக்கு பதிவு செய்ய மும்பை (ACB) சிறப்பு நீதிமன்றம் உத்தரவிட்டுள்ளது. 1994-ம் ஆண்டில் நடந்ததாகக் கூறப்படும் பங்குச் சந்தை மோசடி, ஊழல், மற்றும் ஒழுங்குமுறை மீறல்கள் தொடர்பாக இந்த நடவடிக்கை எடுக்கப்பட்டுள்ளது.

இந்த வழக்கு, தானேவைச் சேர்ந்த பத்திரிகையாளர் சபன் ஸ்ரீவாஸ்தவா என்பவர் கொடுத்த புகாரின் அடிப்படையில் தொடங்கப்பட்டுள்ளது. அவர் SEBI அதிகாரிகள் தங்கள் கடமைகளை முறையாக நிறைவேற்றவில்லை என்றும், சந்தை மோசடியில் உடந்தையாக இருந்தனர் என்றும் குற்றம் சாட்டியுள்ளார்.

1994-ல், ஒரு நிறுவனத்தை மும்பை பங்குச் சந்தையில் (BSE) பட்டியலிடுவதற்கு SEBI அனுமதி அளித்தது. ஆனால், அந்த நிறுவனம் நிதி நிலைமை சரியில்லாதது மற்றும் பங்குச் சந்தை விதிகளை மீறியது என புகார் கூறப்பட்டுள்ளது. அந்த நிறுவனத்தின் பங்கு விலையை செயற்கையாக உயர்த்த, சந்தை விதிமீறல்களை செய்துள்ளனர். முதலீட்டாளர்களை தவறாக வழிநடத்த, பங்குகளை அதிக விலையில் விற்கும் சூழல் உருவாக்கியுள்ளனர். இன்சைடர் டிரேடிங் (Insider Trading) மற்றும் சந்தை கையாளுதல் (Market Manipulation) போன்ற சட்டவிரோத செயல்களில் இந்த நிறுவனமும், SEBI அதிகாரிகளும் தொடர்புடையதாக புகாரில் கூறப்பட்டுள்ளது

இந்த மோசடியில் மாதபி புச்சுடன் மேலும் ஐந்து முக்கிய அதிகாரிகள் ஈடுபட்டுள்ளதாக தெரியவந்துள்ளது. அஸ்வனி பாட்டியா- முன்னாள் முழுநேர உறுப்பினர், அனந்த் நாராயண் ஜி - முன்னாள் முழுநேர உறுப்பினர், கமலேஷ் சந்திர வர்ஷ்னி - முன்னாள் முழுநேர உறுப்பினர், பிஎஸ்இ (BSE) தலைவர் பிரமோத் அகர்வால், மற்றும் BSE தலைமை நிர்வாக அதிகாரி (CEO) சுந்தரராமன் ராமமூர்த்தி ஆகியோர், இந்த அதிகாரிகள் SEBI-யின் ஒழுங்குமுறை சட்டங்களை மீறி, முதலீட்டாளர்களை ஏமாற்ற, சந்தை மோசடி நடத்த உதவியதாக குற்றம் சாட்டப்பட்டுள்ளது. ACB சிறப்பு நீதிமன்ற நீதிபதி சஷிகாந்த் ஏக்நாத்ராவ் பங்கர் புகாரில் வழங்கப்பட்ட ஆவணங்களை ஆய்வு செய்து, ACBக்கு FIR பதிவு செய்ய உத்தரவிட்டார்.

பங்குச் சந்தை மோசடியில் SEBI அதிகாரிகள் தொடர்புடையவர்கள் என்பதற்கான முதன்மை ஆதாரங்கள் உள்ளன. இந்த வழக்கு ஒரு பெரிய குற்றச்சாட்டை வெளிப்படுத்துகிறது, எனவே முழுமையான விசாரணை தேவை. ACB-யை, முப்பது நாட்களில் விசாரணை அறிக்கையை சமர்ப்பிக்க நீதிமன்றம் உத்தரவிட்டது. SEBI-யின் முன்னாள் மற்றும் தற்போதைய அதிகாரிகள் சந்தை மோசடியை தடுக்க தவறியதால், நீதித்துறை தலையீடு அவசியமாகியுள்ளது. இந்த வழக்கு தொடர்பாக SEBI ஒரு அதிகாரப்பூர்வ அறிக்கையை வெளியிட்டு, நீதிமன்ற உத்தரவை எதிர்த்துப் போராடும் என்று தெரிவித்துள்ளது.

இந்த உத்தரவுக்கு SEBI எதிர்ப்பு தெரிவித்துள்ளது. "நீதிமன்றம் எங்களுக்கு எச்சரிக்கை வழங்காமல் மற்றும் உண்மைகளை பதிவு செய்ய வாய்ப்பு கொடுக்காமல் இந்த உத்தரவை பிறப்பித்தது," என்று SEBI குற்றம் சாட்டியது. புகார் தாக்கல் செய்த ஸ்ரீவாஸ்தவா ஒரு பழக்கமான வழக்கு தொடர்பவர் என்றும், அவரின் முந்தைய புகார்கள் நிராகரிக்கப்பட்டதாகவும் SEBI தெரிவித்துள்ளது. "இந்த உத்தரவை எதிர்த்து சட்டப்பூர்வ நடவடிக்கை எடுக்கப்படும்" என்றும், SEBI முழுமையாக ஒழுங்குமுறை இணக்கத்தை உறுதி செய்யும் என்றும் கூறியது. மாதபி புச் மீது இதற்கு முன் விமர்சனங்கள் எழுந்தது. இதுவே முதல் முறை இல்லை. 2023-ல், அமெரிக்க குறுகிய கால விற்பனையாளரான ஹிண்டன்பர்க் நிறுவனம் வெளியிட்ட அதானி குழுமம் தொடர்பான மோசடி அறிக்கையில் புச் பெயர் குறிப்பிடப்பட்டது.

அதானி குழுமத்துடன் வெளிநாட்டு முதலீடுகள் மற்றும் நலன் மோதல் ஏற்பட்டதாக அவர் மீது குற்றச்சாட்டு இருந்தது. ஆனால், புச் தன்னுடைய முதலீடுகள் SEBI-யில் நியமிக்கப்படும் முன்பே நடந்தவை என்றும், அனைத்து தேவையான தகவல்களும் வெளியிடப்பட்டன என்றும் தெரிவித்தார். FIR பதிவு செய்யப்பட்ட பிறகு, ACB விசாரணை மேற்கொண்டு 30 நாட்களில் அறிக்கை தாக்கல் செய்ய வேண்டும். SEBI இந்த உத்தரவை எதிர்த்து மேல்முறையீடு செய்யும். சந்தை மோசடியில் தொடர்புடையவர்களுக்கு எதிராக சட்ட நடவடிக்கைகள் எடுக்கப்படும். நிதி மற்றும் பங்குச் சந்தை ஒழுங்குமுறையை மீறிய நிறுவனங்கள் குறித்த கூடுதல் விசாரணைகள் நடத்தப்படலாம் என்று தெரியவந்துள்ளது.