3 வீடு 263 கோடி.. பிரபல பங்குச்சந்தை முதலீட்டாளர் முகுல் அகர்வாலின் புதிய ஷாப்பிங்..!

மும்பையில் ரியல் எஸ்டேட் சந்தை வேகமாக வளர்ச்சி அடைந்து வருகிறது, குறிப்பாக ஆடம்பர வீடுகளுக்கான டிமாண்ட் அதிகரித்துள்ள காரணத்தால் ரியல் எஸ்டேட் விலைகள் தாறுமாறாக அதிகரித்துள்ளது. இந்நிலையில் அங்கு சாமானியர்களால் வீடு வாங்குவது என்பது நடக்கவே நடக்காத காரியமாகும்.

இந்திய தொழிலதிபரான ஆஷா முகுல் அகர்வால், பிரபல பங்குச் சந்தை முதலீட்டாளர் முகுல் அகர்வாலின் மனைவி, தெற்கு மும்பையின் மலபார் ஹில் பகுதியில் உள்ள மூன்று ஆடம்பரமான அடுக்குமாடி குடியிருப்புகளை சமீபத்தில் வாங்கினார்.

வாக்கேஷ்வர் சாலையில் வரவிருக்கும் பிரீமியம் குடியிருப்பு திட்டத்தில் மூன்று அடுக்குமாடி குடியிருப்புகளுக்கு ஆஷா முகுல் அகர்வால் ரூ.263 கோடி செலுத்தினார். லோதா குழுமத்தின் வரவிருக்கும் திட்டம் பல இந்திய தொழில்முனைவோர், வணிக உரிமையாளர்கள் மற்றும் தொழிலதிபர்களுக்கு ஒரு முக்கிய முதலீட்டு வாய்ப்பாக மாறியுள்ளது.

1993 ஆம் ஆண்டு முகுல் அகர்வால் நிறுவிய பங்குச் சந்தை நிறுவனமான பரம் கேபிட்டலின் இயக்குநரான ஆஷா முகுல் அகர்வால், லோதா மலபாரின் 24 மற்றும் 25 வது மாடிகளில் மூன்று அடுக்குமாடி குடியிருப்புகளை வாங்கினார். அடுக்குமாடி குடியிருப்புகளின் மொத்த பரப்பளவு 19,254 சதுர அடி. பங்குச் சந்தை முதலீட்டாளர் முகுல் அகர்வால் மொத்த நிகர மதிப்பு ரூ.3,824 கோடி.

இந்த 3 ஆடம்பர வீடுகளின் ஒப்பந்தம் செப்டம்பர் 27, 2023 அன்று முடிக்கப்பட்டது. அகர்வால் லோதா குழுமத்தின் நிறுவனமான மைக்ரோடெக் டெவலப்பர்ஸ் லிமிடெட் நிறுவனத்திடமிருந்து மொத்தம் ரூ.263 கோடிக்கு மூன்று ஆடம்பரமான அடுக்குமாடி குடியிருப்புகளை வாங்கினார்.

25வது மாடியில் 9719 சதுர அடி பரப்பளவில் உள்ள முதல் இரண்டு யூனிட்டுகளுக்கு ரூ.132 கோடியும், முத்திரைத் தொகையாக ரூ.6.63 கோடியும் செலுத்தியுள்ளார். மூன்றாவது அடுக்குமாடி குடியிருப்பு 24வது மாடியில் உள்ளது, இதன் மதிப்பு ரூ.130.24 கோடி. இந்த அடுக்குமாடி குடியிருப்பின் மொத்த பரப்பளவு 9,535 சதுர அடியாகும். மூன்றாவது யூனிட்டுக்கான ஒப்பந்தத்தை முடிக்க அகர்வால் ரூ.6.51 கோடி முத்திரைத் தொகையை செலுத்தினார். இதில் ஐந்து பிரத்யேக கார் பார்க்கிங் இடங்களும் அடங்கும்.

தெற்கு மும்பையில் வரவிருக்கும் இந்த ஆடம்பர குடியிருப்பு திட்டம் பல முக்கிய இந்திய தொழிலதிபர்களை ஈர்த்துள்ளது. ராஜேஷ் விஜய்குமார் அகர்வால் மற்றும் ராகுல்குமார் நிரஞ்சன்குமார் அகர்வால் - கண்டோய் ஃபேப்ரிக்ஸ் பிரைவேட் லிமிடெட் இயக்குநர்கள், மாதவ் கோயல் - டுஃப்ரோப்ஸின் இயக்குனர் மற்றும் ஃபேமி கேர் நிறுவனர் ஜேபி டபரியா ஆகியோர் இதில் வீடுகளை வாங்கியுள்ளனர்.

ராதாகிஷன் தமானி மற்றும் பிகே கோயங்கா உட்பட பல இந்திய தொழிலதிபர்கள் தங்கள் ரியல் எஸ்டேட் முதலீடுகளை 2023 இல் விரிவுபடுத்தியுள்ளனர். தமானியின் குடும்பம் த்ரீ சிக்ஸ்ட்டி வெஸ்டில் உள்ள 28 அடுக்குமாடி குடியிருப்புகளுக்கு ரூ.1238 கோடி முதலீடு செய்தது, அதே சமயம் தெற்கு மும்பையில் ரூ.240 கோடி மதிப்புள்ள பென்ட்ஹவுஸை கோயங்கா வாங்கினார்.