சிகரெட் விலையை திடீரென 12% உயர்த்திய ஐடிசி.. அதுவும் இந்த 2 பிராண்ட் மட்டும் விலை உயர்வு..!

இந்தியாவில் 25.3 கோடி மக்கள் புகையிலை பயன்படுத்தி வரும் வேளையில் நம் நாடு உலகளவில் 2வது இடத்தில் உள்ளது. புகைப்படிக்கும் பழக்கம் உள்ள நபர்களுக்கு அதிர்ச்சி அளிக்கும் வகையில் நாட்டின் முன்னணி சிகரெட் தயாரிப்பு மற்றும் விற்பனை நிறுவனமான ஐடிசி இரண்டு பிராண்ட் சிகரெட் விலையை மட்டும் அதிரடியாக உயர்த்தியுள்ளது.

மது அருந்துவதும், புகைப்பிடித்தலும் உடல் நலத்திற்குப் பேராபத்தை விளைவிக்க கூடும் என தொடர்ந்து கூறப்பட்டாலும், இந்தியாவில் மிகப்பெரிய வர்த்தக சந்தை இதை சார்ந்து உள்ளது.

இந்த நிலையில் ஐடிசி தயாரிக்கும் கிளாசிக் கனெக்ட் மற்றும் கோல்டு ஃப்ளேக் சூப்பர் ஸ்டார் பிராண்ட் சிகரெட் விலை தடாலடியாக உயர்த்தப்பட்டு, புதிய விலையில் டீலர்களுக்கு விற்பனை செய்யவும் துவங்கியுள்ளதாக என்டிடிவி தெரிந்துள்ளது. இதன் மூலம் ரீடைல் சந்தையிலும் புதிய விலை நடைமுறைக்கு வந்துள்ளது.

தற்போது சந்தையில் 20 சிகரெட் கொண்ட கிளாசிக் கனெக்ட் 428 ரூபாய்க்கு விற்க துவங்கப்பட்டு உள்ளது. முன்பு 390 ரூபாயாக இருந்த இது, 9.74 சதவீதம் விலை உயர்ந்து 428 ரூபாய் MRP விலையுடன் சந்தைக்கு வந்துள்ளது. இதேபோல் கோல்டு ஃபளேகிங் சூப்பர் ஸ்டார் 10 சிகரெட் கொண்ட பாக்கெட் விலை 79 ரூபாயில் இருந்து 12.66 சதவீதம் அதிகரித்து 89 ரூபாயாக அதிகரித்துள்ளது.

கடந்த ஆண்டு மத்திய நிதியமைச்சகம் ஜிஎஸ்டி விகிதங்களை சீரமைத்த போது 4 வரி அடுக்குகளாக இருந்த வரி அமைப்பை 5 மற்றும் 18 சதவீதம் என்ற இரு அடுக்குகளாக குறைக்கப்பட்டது. அப்போது புகையிலை போன்ற சின் கூட்ஸுக்கு புதிதாக உருவாக்கப்பட்ட 40 சதவீத அடுக்கு கீழ் கொண்டு வரப்பட்டது. இதை தாண்டி பிப்ரவரி 1, 2026 முதல் சிகரெட் மீது அதன் நீளம் அடிப்படையில் கலால் வரி விதிக்கப்பட்டது.

கலால் வரி விதிப்புக்கு பின்பு சிகரெட் விலைகள் தாறுமாறாக உயர்ந்த நிலையில் தற்போது மீண்டும் உயர்த்தப்பட்டு உள்ளது. இதனால் மற்ற சிகரெட் விலையும் உயருமா என்ற கேள்வி எழுந்துள்ளது. இந்த விலை உயர்வு மூலம் சிகரெட் உற்பத்தி நிறுவனங்களுக்கு கூடுதல் லாபத்தை கொடுத்தாலும் சந்தையில் விற்பனை குறைய வழிவகுக்கும் என சந்தை ஆய்வாளர்கள் கூறுகின்றனர்.

ஐடிசி நிறுவனம் தொடர்ந்து மலிவு விலை கொண்ட சிகரெட்களின் விலையை உயர்த்தி வருவதை திட்டமிட்டு செய்வதாகவும் கருத்து நிலவுகிறது. பிப்ரவரி மாத விலை உயர்வுக்கு பின்பு மக்கள் ப்ரீமியம் சிகரெட்களை வாங்குவதை குறைந்து மலிவான சிகரெட்களை வாங்கி வரும் நிலையில் தற்போது இதன் விலையை உயர்த்தியுள்ளது ஐடிசி. இதன் மூலம் ஐடிசி கூடுதல் வருமானத்தை பார்க்க முடியும்.

பிப்ரவரி மாதம் கிளாசிக் கனெக்ட் 300 ரூபாயில் இருந்து 360, அதன் பின்பு 390 வரையில் உயர்த்தப்பட்ட நிலையில் தற்போது 428 ரூபாயாக உயர்ந்துள்ளது. இதேபோல் Gold Flake Super Star 59 ரூபாயில் இருந்து 89 ரூபாயாக உயர்த்தப்பட்டு உள்ளது.