தாலிபான்-களின் அட்டகாசம்.. ரெஸ்டாரென்ட் செல்ல பெண்களுக்கு புது கட்டுப்பாடு..!!

ஆப்கானிஸ்தான் நாட்டின் ஆட்சியை கைப்பற்றி தாலிபான்கள் அந்நாட்டின் வர்த்தகம், பொருளாதாரம், வேலைவாய்ப்பு சந்தையை மேம்படுத்த பல முயற்சிகள் எடுத்தாலும் பெரிய அளவில் எதுவும் கைகொடுக்காத நிலையில், தொடர்ந்து பெண்கள் மீதான கட்டுப்பாடுகளை விதித்து வருகிறது தாலிபான் அரசு. ஏற்கனவே கல்வி, பொது இடங்களில் தனியாக வருவது என பலவற்றை தடை செய்துள்ளது.

இந்த நிலையில் தற்போது தாலிபான் அரசு பூங்கா அல்லது புல்வெளி இருக்கும் ரெஸ்டாரென்ட்-க்கு பெண்கள் மற்றும் குடும்பங்கள் வருவதை தடை செய்துள்ளது. ஆப்கானிஸ்தான் நாட்டின் வடமேற்கு பகுதியான ஹெராத் மாகாண அரசு இந்த அறிவிப்பை வெளியிட்டுள்ளது. இந்த கட்டுப்பாடு தற்போதைய நிலையில் ஹெராத் மாகாணத்திற்ரு மட்டுமே பொருந்தும்.

ஆப்கானிஸ்தான் நாட்டில் ஏற்கனவே பெண்கள் பூங்கா-விற்கு செல்ல கூடாது என்ற கட்டுப்பாடு இருக்கும் நிலையில் ரெஸ்டாரென்ட்-களில் பூங்கா அமைப்பில் இருக்கும் நிலையில் இதுவும் தவறு என பல மத தலைவர்கள், அரசியல் தலைவர்கள் புகார் அளித்த நிலையில் ஆண்கள் மற்றும் பெண்கள் ஒன்றாக கூடுவதால் ஹெராத் மாகாண அரசு இப்புதிய தடை உத்தரவை விடுத்துள்ளது.

தாலிபான்கள் பல மாத போராட்டாத்திற்கு பின்பு ஆகஸ்ட் 2021ல் ஆப்கானிஸ்தான் நாட்டின் ஆட்சியை கைப்பற்றினர். தாலிபான்கள் ஆட்சிக்கு வந்த நாளில் இருந்து அதிகப்படியான கட்டுப்பாடுகள், அடக்குமுறைகள் அறிவிக்கப்பட்டு வருகிறது. இதில் முக்கியமாக 6ஆம் வகுப்புக்கு மேல் பெண்களுக்கு கல்வி அளிக்கப்படும், அதற்கு மேல் பள்ளி, கல்லூரிகளில் இடமில்லை. இதேபோல் அரசு மற்றும் ஐநா பதவிகளில் பெண்களுக்கு இடமில்லை என அறிவிக்கப்பட்டு உள்ளது.

இது மட்டும் அல்லாமல் அந்நாட்டில் பார்க், ஜிம் உட்பட ஆண்கள் பெண்கள் ஒன்றாக இணையும் சாத்தியக்கூறு உள்ள அனைத்து பொது இடங்களிலும் பெண்களுக்கு தடை விதிக்கப்பட்டு உள்ளது. இதற்கு காரணமாக பெண்கள் ஹிஜாப் அணியும் விதியை கடைப்பிடிப்பது இல்லை என்பதால் இந்த கட்டுப்பாடுகளை விதிப்பதாக தெரிவித்து வருகிறது தாலிபான்கள் அரசு.