தமிழ்நாடு பட்ஜெட் 2025: பள்ளி, கல்லூரி மாணவர்களுக்கு புதிய நலத்திட்டங்கள்! வெளியான பட்ஜெட் அறிவிப்பு

தமிழ்நாடு அரசு 2025-26ஆம் நிதியாண்டுக்கான பட்ஜெட்டை இன்று வெளியிட்டது, அதில் பள்ளிகள் மற்றும் கல்லூரிகளின் வளர்ச்சிக்காக பல முக்கிய அறிவிப்புகள் செய்யப்பட்டுள்ளது. இந்த அறிவிப்புகள் மாநிலத்தின் கல்வி தரத்தை உயர்த்துவதையும், மாணவர்களின் நலன்களை முன்னிலைப்படுத்துவதையும் நோக்கமாகக் கொண்டுள்ளது.

மாணவர்களின் ஆரோக்கியத்தை மேம்படுத்தும் நோக்கத்துடன், முதல்வரின் காலை உணவுத் திட்டம் விரிவுபடுத்தப்பட உள்ளது. இந்த திட்டத்திற்காக ₹600 கோடி ஒதுக்கப்பட்டுள்ளது, மேலும் 3.14 லட்சம் பள்ளி மாணவர்கள் இதன் பயனை பெறுவார்கள். ரூ.65 கோடியில், 2,676 பள்ளிகளில் திறன்மிகு வகுப்பறைகள் தரம் உயர்த்தப்படும். ரூ.56 கோடியில், 880 உயர் தொழில்நுட்ப ஆய்வகங்கள் மேம்படுத்தப்படும். மேலும், ரூ.160 கோடியில் 2,000 பள்ளிகளில் கணினி ஆய்வகங்கள் தரம் உயர்த்தப்படும்.

மாணவர்களின் மூளை வளர்ச்சியை ஊக்குவிக்கும் நோக்கத்துடன், பள்ளி பாடத்திட்டத்தில் சதுரங்கம் (Chess) சேர்க்கப்படும். சிங்கப்பூர் அறிவியல் மையத்துடன் இணைந்து, சென்னை அறிவியல் மையம் உருவாக்கப்படும். இது மாணவர்களிடையே அறிவியல் சிந்தனையை வளர்ப்பதைக் குறிக்கோளாகக் கொண்டுள்ளது.

நீலகிரி மாவட்டம் குன்னூர், சென்னை ஆலந்தூர், திண்டுக்கல் மாவட்டம் நத்தம், விழுப்புரம் மாவட்டம் விக்கிரவாண்டி உள்ளிட்ட 10 இடங்களில் புதிய அரசு கலைக் கல்லூரிகள் தொடங்கப்படும். அண்ணா பல்கலைக்கழகத்தை உலகின் முன்னணி 150 பல்கலைக்கழகங்களில் ஒன்றாக உயர்த்த, அடுத்த ஐந்து ஆண்டுகளில் ₹500 கோடி ஒதுக்கப்படும்.

கணினி நுண்ணறிவு (AI), சைபர் பாதுகாப்பு, மேம்பட்ட உற்பத்தி, மின்சார வாகனங்கள் போன்ற துறைகளில் புதிய உயர்கல்வி படிப்புகள் அறிமுகப்படுத்தப்படுகின்றன. அரசு பொறியியல் கல்லூரிகளில் இந்த புதிய படிப்புகள் அறிமுகப்படுத்தப்படும். அரசு கலை, அறிவியல் கல்லூரிகளில் மேலும் 15,000 இடங்கள் அமைக்கப்படும். போட்டித் தேர்வு எழுதும் மாணவர்களுக்காக மாநகராட்சிகளில் 1 லட்சம் புத்தகங்களுடன் சிறப்பு நூலகங்கள் அமைக்கப்படும்.

பின்தங்கிய சமூகத்தை சேர்ந்த பெண் மாணவிகளின் உயர்கல்வியை ஊக்குவிக்கும் நோக்கத்துடன், மாதம் ரூ.1,000 உதவித் தொகை வழங்கப்படுகிறது. தற்போது 4.06 லட்சம் மாணவிகள் இந்த திட்டத்தின் பயனாளிகளாக உள்ளனர், மேலும் இந்த ஆண்டிற்காக ரூ.420 கோடி ஒதுக்கப்பட்டுள்ளது. சென்னையின் அருகில் 2,000 ஏக்கர் பரப்பில் ஒருங்கிணைந்த புதிய நகரம் உருவாக்கப்படும். இதில் மெட்ரோ வசதி, பேருந்துகள், சாலை வசதிகள், நகர்ப்புற சதுக்கங்கள், பூங்காக்கள் போன்ற அடிப்படை வசதிகள் அடங்கும்.

இந்த அறிவிப்புகள் தமிழ்நாட்டின் கல்வி அமைப்பை வலுப்படுத்துவதையும், மாணவர்களின் நலனை முன்னிலைப்படுத்துவதையும் நோக்கமாகக் கொண்டுள்ளது.