சுட்டெரிக்கும் வெயில்.. சூரிய சக்தி மூலம் மின்சார உற்பத்தியில் புதிய சாதனை படைத்த தமிழ்நாடு..!

சென்னை: சூரிய சக்தி மூலம் மின்சாரம் உற்பத்தி செய்வதில் தமிழ்நாடு புதிய சாதனையை படைத்துள்ளது. இது தொடர்பாக தமிழ்நாடு மின்சார உற்பத்தி மற்றும் பகிர்மான கழகமான tangedco வெளியிட்டுள்ள தகவலின் படி செப்டம்பர் 12 ஆம் தேதி தமிழ்நாட்டில் சூரிய சக்தி மூலம் உற்பத்தி செய்யப்படும் மின்சாரத்தின் அளவு 6,090 மெகாவாட் என்ற அளவை எட்டியுள்ளது. இது புதிய சாதனை என tangedco தெரிவித்துள்ளது.

இதற்கு முன்னதாக சூரிய சக்தியின் மூலம் செப்டம்பர் 7ஆம் தேதி 5985 மெகாவாட் மின் உற்பத்தி செய்யப்பட்டது. அதுதான் சாதனையாக இருந்தது. தற்போது அந்த சாதனை மிஞ்சப்பட்டுள்ளது. அதுமட்டுமின்றி சோலார் சூரியசக்தி மூலம் உற்பத்தி செய்யப்பட்ட மின்சாரத்தின் நுகர்வும் செப்டம்பர் 12ஆம் தேதி புதிய உச்சத்தை எட்டி இருப்பதாக tangedco கூறுகிறது.

அதாவது செப்டம்பர் 2ஆம் தேதி சூரிய சக்தி மூலம் உற்பத்தி செய்யப்பட்ட மின்சாரத்தின் நுகர்வு 43.70 மில்லியன் யூனிட்களாக இருந்தது. அது செப்டம்பர் 12ஆம் தேதி 45.47 மில்லியன் யூனிட்டுகள் என உயர்ந்துள்ளது.

தமிழ்நாட்டைப் பொறுத்தவரை சூரிய சக்தியிலிருந்து 7,800 மெகாவாட் மின்சாரத்தை உற்பத்தி செய்யும் திறன் கொண்டிருக்கிறது. நடப்பு ஆண்டில் 2024 ஆம் ஆண்டு தொடங்கியதிலிருந்து தற்போது வரை தமிழ்நாட்டில் 521 .73 மில்லியன் யூனிட்டுகள் மின்சாரம் சூரிய சக்தியின் மூலம் மட்டுமே உற்பத்தி செய்யப்பட்டுள்ளது. தமிழ்நாட்டில் உச்சபட்ச மின்சார தேவை என்பது ஒரு நாளைக்கு 18,115 மெகாவாட்டாக இருக்கிறது. தினந்தோறும் நுகரப்படும் மின்சாரத்தின் அளவு சுமார் 400 மில்லியன் யூனிட்டுகள் ஆகும்.

2024- 25 ஆம் ஆண்டில் கடந்த மே 2 ஆம் தேதி தமிழ்நாட்டில் மின்சாரத்தின் தேவை மிக அதிகபட்சமாக 20,830 மெகாவாட் என இருந்தது. அதேபோல ஒரு நாளைக்கு அதிகபட்சமாக மின்சாரம் நுகரப்படும் விகிதம் ஏப்ரல் 30ஆம் தேதி 454.320 மில்லியன் யூனிட்களாக இருந்தது.

அதிகபட்ச சூரிய மின் சக்தி உற்பத்திக்கான திறன் கொண்ட மாநிலங்களில் தமிழ்நாடு நான்காவது இடத்தில் இருக்கிறது. வீட்டு மேற்கூரை மற்றும் பிற அமைப்புகள் என மொத்தம் 8,145.53 மெகா வாட் மின்சார உற்பத்திக்கான திறனை தமிழ்நாடு கொண்டுள்ளது.

ஜூன் 30, 2024, நிலவரப்படி, தமிழ்நாட்டில் புதுப்பிக்கத்தக்க சக்தி மூலம் மின்சாரம் உற்பத்தி செய்யும் திறன் 22,754 மெகாவாட் ஆகும். இதில் 10,789 மெகாவாட் காற்றாலை மூலம் உற்பத்தி செய்யப்படுகிறது. பயோமாஸ் மூலம் 969 மெகாவாட் மின்சாரம் மற்றும் நீர் மின் திட்டங்கள் மூலம் 2178 மெகாவாட் மின் உற்பத்தி திறன்களை கொண்டுள்ளது.