பொங்கல் பரிசுத்தொகுப்பில் இருக்கப்போவது இதுதான்.. மக்கள் எதிர்பார்ப்பை பூர்த்தி செய்ததா தமிழக அரசு?

தமிழ்நாட்டில் தமிழர் திருநாளாம் பொங்கல் பண்டிகை வரும் ஜனவரி மாதத்தில் கொண்டாடப்பட உள்ளது. ஆண்டுதோறும் பொங்கல் பண்டிகையை முன்னிட்டு ரேஷன் அட்டைதாரர்களுக்கு தமிழக அரசு சார்பில் பொங்கல் பரிசுதொகுப்பு வழங்கப்பட்டு வருகிறது. அந்த பரிசுதொகுப்பில் பொங்கலுக்கு தேவையான பொருட்கள் சர்க்கரை பொங்கல் செய்ய தேவையான பச்சரிசி, வெல்லம், இதர பொருள்கள், கரும்பு உள்ளிட்டவை அடங்கும். அத்துடன் 1000 ரூபாய் ரொக்கம் மற்றும் வேட்டி சேலைகள் வழங்கப்படும். அந்த வகையில், இந்த ஆண்டில் தமிழ்நாடு அரசு ரேசன் அட்டைதாரர்களுக்கு வழங்கபோகும் பரிசுபொருட்கள் என்ன இருக்கப்போகிறது என்பது குறித்த அரசாணை வெளியிடப்பட்டுள்ளது.

பொங்கல் பண்டிகையை முன்னிட்டு ரேஷன் அட்டைதாரர்களுக்கு 2025ம் ஆண்டுக்கான பொங்கல் பரிசுத் தொகுப்பை தமிழக அரசு அறிவித்துள்ளது. அதன்படி, 2025-ஆம் ஆண்டில் தமிழர் திருநாளாம் பொங்கல் பண்டிகையைச் சிறப்பாகக் கொண்டாடிட அனைத்து அரிசி குடும்ப அட்டைதாரர்கள் மற்றும் இலங்கைத் தமிழர் மறுவாழ்வு முகாம்களில் வசிக்கும் குடும்பத்தினருக்கு தலா ஒரு கிலோ பச்சரிசி, ஒரு கிலோ சர்க்கரை மற்றும் ஒரு முழுக் கரும்பு வழங்கிட தமிழ்நாடு அரசு அறிவிப்பு வெளியிட்டுள்ளது.

இது குறித்து தமிழக அரசின் கூட்டுறவு, உணவு மற்றும் நுகர்வோர் பாதுகாப்புத்துறை செயலாளர் வெளியிட்டுள்ள அறிவிப்பில், தமிழர்களின் பழம்பெரும் பாரம்பரியத்தையும், பண்பாட்டையும் பிரதிபலிக்கும் விழாவாகப் பொங்கல் பண்டிகை தமிழ்நாட்டில் சிறப்பாகக் கொண்டாடப்படுகிறது. இந்நாள் அறுவடைத் திருவிழாவாகவும், இயற்கைக்கும், உழவர் பெருங்குடி மக்களுக்கும் அவர்தம்மோடு சேர்ந்து உழைத்த கால்நடைகளுக்கும், நன்றியையும் மகிழ்ச்சியையும் தெரிவிக்கும் விழாவாகவும் ஒவ்வொரு ஆண்டும் கொண்டாடப்படுகிறது என்று தெரிவிக்கப்பட்டுள்ளது.

அத்துடன் இதன் மூலம் 2,20,94,585 அரிசி குடும்ப அட்டைதாரர்களும், இலங்கைத் தமிழர் மறுவாழ்வு முகாம்களில் வசிக்கும் குடும்பத்தினர்களும் பயன்பெறுவார்கள். இதனால் அரசுக்கு ரூபாய் 249.76 கோடி செலவாகும் என கூறப்பட்டுள்ளது. மேலும். பொங்கல் திருநாளை முன்னிட்டு வழங்கப்படவுள்ள இலவச வேட்டி சேலைகள் அனைத்தும் தயார் செய்யப்பட்டு, அணைத்து மாவட்டங்களுக்கும் அனுப்பி வைக்கப்பட்டுள்ளதாகவும், பொங்கல் பரிசுத் தொகுப்புடன் இவற்றையும் சேர்த்து வழங்குவதற்குத் தேவையான நடவடிக்கைகள் மேற்கொள்ளப்பட்டு வருவதாகவும், இவை ஜனவரி 9 முதல் விநியோகம் செய்யப்பட உள்ளதாகவும் கூறப்பட்டுள்ளது.