ஓசூரில் அடுத்த பிரம்மாண்டம்.. டாடா குழுமத்திற்குத் தமிழ்நாடு அரசின் முக்கிய அனுமதி..!

தமிழ்நாட்டின் எலக்ட்ரானிக்ஸ் உற்பத்தியில் மாபெரும் சக்தியாக மாறி வரும் டாடா எலக்ட்ரானிக்ஸ் நிறுவனம் ஓசூரில் அமைந்திருக்கும் தொழிற்சாலையை அடுத்தகட்டமாக விரிவாக்கம் செய்து, ஸ்மார்ட்போன் உற்பத்தியை அதிகரிக்க முடிவு செய்துள்ளது.

ஓசூர் தொழிற்சாலையை விரிவாக்கம் செய்ய டாடா எலக்ட்ரானிக்ஸ் நிறுவனம் தமிழ்நாடு அரசிடம் சுற்றுச்சூழல் அனுமதி கோரியிருந்த நிலையில், தற்போது இதற்கு பச்சை கொடி காட்டியுள்ளது தமிழ்நாடு அரசு. இந்த அனுமதியைத் தொடர்ந்து டாடா எலக்ட்ரானிக்ஸ் தனது மாபெரும் விரிவாக்கத் திட்டத்தைச் செயல்படுத்த உள்ளது.

டாடா குழுமம் ஓசூரை ஜாம்ஷெட்பூர் ஆக மாற்றும் பாதையில் ஓசூரில் தொடர்ந்து தனது டாடா எலக்ட்ரானிக்ஸ் தொழிற்சாலையை விரிவாக்கம் செய்து வருகிறது. ஓசூரில் டாடா குழுமம் டாடா எலக்ட்ரானிக்ஸ் தொழிற்சாலைக்காக இதுவரையில் ரூ.3051 கோடி முதலீடு செய்துள்ளது.

இந்த நிலையில் டாடா எலக்ட்ரானிக்ஸ் ஆலை, தற்போது அனுமதி பெற்ற புதிய விரிவாக்கத் திட்டத்திற்காகக் கூடுதலாக ரூ.3699 கோடி முதலீட்டில் விரிவாக்கம் செய்யப்பட உள்ளது. இந்த விரிவாக்கத்தின் மூலம் 80,000 பேருக்கு புதிய வேலைவாய்ப்புகள் கிடைக்கும் என எதிர்பார்க்கப்படுகிறது.

தற்போது டாடா எலக்ட்ரானிக்ஸ் தொழிற்சாலை 1.49 லட்சம் சதுர அடி பரப்பளவில் செயல்பட்டு வரும் நிலையில், விரிவாக்கத்திற்குப் பிறகு 5 லட்சம் சதுர அடி பரப்பளவில் இயக்கும். மேலும், தற்போது தினமும் 92,000 மொபைல் போன்கள் உற்பத்தி செய்யப்பட்டு வரும் நிலையில், விரிவாக்கத்திற்குப் பிறகு தினமும் 2 லட்சம் மொபைல் போன்கள் உற்பத்தி செய்யப்படும் என கூறப்படுகிறது.

ஆப்பிள் ஐபோன் உற்பத்தியை அதிகரிக்கவே டாடா எலக்ட்ரானிக்ஸ் நிறுவனம் இந்த மிகப்பெரிய முதலீட்டை செய்கிறது. ஓசூர் டாடா எலக்ட்ரானிக்ஸ் ஆலை விரிவாக்கம் தமிழ்நாட்டின் பொருளாதார வளர்ச்சிக்கு புதிய உந்து சக்தியாக இருக்கும். இந்த விரிவாக்கத்தின் மூலம் 80,000 பேருக்கு புதிய வேலைவாய்ப்புகள் கிடைக்கும் காரணத்தால், தமிழ்நாட்டின் இளைஞர்களுக்கு போதுமான வேலைவாய்ப்பு கிடைத்து வேலைவாய்ப்பின்மை அளவீடு குறையும்.