மகளிர் உரிமைத் தொகை ரூ.1000.. உங்களுக்கு கிடைக்கலையா? விடுபட்ட பெண்களுக்கு ஜூன் 4-ல் வாய்ப்பு!

தமிழ்நாடு அரசின் கலைஞர் மகளிர் உரிமைத் தொகை திட்டம், தகுதிவாய்ந்த குடும்பத் தலைவிகளுக்கு மாதம் ரூ.1000 வழங்கும் ஒரு முக்கியமான சமூக நலத்திட்டமாகும். 2023 செப்டம்பரில் தொடங்கப்பட்ட இந்தத் திட்டம், இதுவரை 1 கோடியே 14 லட்சம் பெண்களுக்கு பயனளித்துள்ளது. ஒவ்வொரு மாதமும் 15-ம் தேதி பயனாளிகளின் வங்கிக் கணக்குகளில் இந்தத் தொகை நேரடியாக வரவு வைக்கப்படுகிறது.

இருப்பினும், சில தகுதி வாய்ந்த குடும்பத் தலைவிகள் பல்வேறு காரணங்களால் இந்தத் திட்டத்தில் இன்னும் இணைய முடியாமல் உள்ளனர். அரசு ஊழியர்கள், வங்கி ஊழியர்கள், பொதுத்துறை ஊழியர்கள் மற்றும் ஓய்வூதியதாரர்கள் போன்ற சில குறிப்பிட்ட பிரிவினர் இந்தத் திட்டத்தில் விண்ணப்பிக்கத் தகுதியில்லை என்பது குறிப்பிடத்தக்கது.

இதுவரை மூன்று கட்டங்களாக நடைபெற்ற முகாம்களின் மூலம் தகுதியான பெண்கள் சேர்க்கப்பட்டிருந்தாலும், விடுபட்ட மற்றும் தகுதியிழந்த பயனாளிகளை கண்டறியும் பணிகள் தொடர்ந்து நடைபெற்று வருகின்றன. இந்நிலையில், மாதம் ரூ.1000 கிடைக்காத தகுதிவாய்ந்த பெண்கள், தங்களுக்கும் இந்த உதவித் தொகை வேண்டும் என்று அமைச்சர்கள் மற்றும் சட்டமன்ற உறுப்பினர்களிடம் தொடர்ந்து கோரிக்கை வைத்து வந்தனர்.

இந்தக் கோரிக்கைகளுக்கு செவிசாய்த்த தமிழ்நாடு அரசு, விடுபட்ட தகுதிவாய்ந்த பெண்களுக்கு மீண்டும் ஒரு வாய்ப்பை வழங்கியுள்ளது. அதன்படி, தமிழ்நாடு முதலமைச்சர் மு.க.ஸ்டாலின் அவர்கள் அறிவித்துள்ள மக்களுடன் முதல்வர் திட்ட முகாம்களில், விடுபட்ட பெண்கள் மகளிர் உரிமைத் தொகைக்காக விண்ணப்பிக்கலாம். இந்த முகாம்கள் தமிழ்நாடு முழுவதும் ஜூன் மாதம் 4-ம் தேதி நடைபெற உள்ளது.

இந்த சிறப்பு முகாம்கள் தமிழ்நாடு முழுவதும் சுமார் 9 ஆயிரம் இடங்களில் நடத்தப்பட ஏற்பாடுகள் தீவிரமாக நடைபெற்று வருகின்றன. இதற்கான ஆயத்தப் பணிகளை மேற்கொள்ளும் வகையில், இத்திட்டத்தில் பணியாற்றும் தாசில்தார்கள் உள்ளிட்ட அதிகாரிகளுக்கு சென்னையில் இன்று பயிற்சி முகாம் நடத்தப்பட்டது. ஒவ்வொரு மாவட்டத்திலும் மக்களுடன் முதல்வர் முகாம் எங்கு நடத்தப்பட வேண்டும் என்ற விவரங்களும் அதிகாரிகளுக்கு தெரிவிக்கப்பட்டுள்ளன.

இந்த அறிவிப்பால், தகுதி இருந்தும் இதுவரை இந்தத் திட்டத்தில் இணைய முடியாத குடும்பத் தலைவிகள் மிகுந்த மகிழ்ச்சியடைந்துள்ளனர். ஆண்டுக்கு ரூ.2.5 லட்சத்திற்கும் குறைவான வருமானம் கொண்ட குடும்பங்கள், வீட்டு உபயோகத்திற்கு ஆண்டுக்கு 3,600 யூனிட்டிற்கும் குறைவாக மின்சாரம் பயன்படுத்துபவர்கள், 5 ஏக்கருக்குக் குறைவாக நன்செய் நிலம் அல்லது 10 ஏக்கருக்குக் குறைவாக புன்செய் நிலம் வைத்திருப்பவர்கள் இந்தத் திட்டத்தில் இணைய தகுதியுடையவர்கள்.

Take a Poll

சொந்த பயன்பாட்டிற்காக கார், ஜீப், டிராக்டர் அல்லது கனரக வாகனம் போன்ற நான்கு சக்கர வாகனங்கள் வைத்திருப்பவர்கள் இந்தத் திட்டத்தில் பயனடைய தகுதி இல்லை என்பது குறிப்பிடத்தக்கது. எனவே, தகுதிவாய்ந்த விடுபட்ட குடும்பத் தலைவிகள் ஜூன் 4-ம் தேதி நடைபெற உள்ள மக்களுடன் முதல்வர் முகாம்களைப் பயன்படுத்தி, கலைஞர் மகளிர் உரிமைத் தொகை திட்டத்தில் இணைந்து பயனடையுமாறு கேட்டுக்கொள்ளப்படுகிறார்கள்.