எனக்கு வேற வழி தெரியல ஆத்தா.. டாடா - கியா வெளியிட்ட முக்கிய அறிவிப்பு.. மக்கள் ஷாக்..!

2025 ஆம் ஆண்டு தொடக்கத்தில் நாட்டின் பல கார் தயாரிப்பாளர்கள் தங்களுடைய கார்களின் விலையை உயர்த்துவதாக அறிவித்துள்ளனர். மாருதி, ஹூண்டாய், மஹிந்திரா, ஜேஎஸ்டபிள்யூ எம்ஜி மோட்டார், மெர்சிடிஸ்-பென்ஸ் இந்தியா, ஆடி மற்றும் BMW ஆகிய நிறுவனங்கள் ஏற்கனவே விலை உயர்வை அறிவித்துள்ள நிலையில், தற்போது டாடா மோட்டார்ஸ் மற்றும் கியா நிறுவனங்களும் விலை உயர்வை அறிவித்துள்ளன.

TATA Motors: எலக்ட்ரிக் வாகனம், சிஎன்ஜி வாகன பிரிவில் வேகமாக வளர்ச்சி அடைந்து வரும் டாடா மோட்டார்ஸ் தனது பயணிகள் வாகன விலையை அடுத்த ஆண்டு ஜனவரி முதல் 3% வரை உயர்த்துவதாக திங்கள்கிழமை தெரிவித்தது. கார் தயாரிப்பின் உள்ளீட்டு செலவுகள் மற்றும் பணவீக்கம் அதிகரிப்பை ஈடுசெய்ய இந்த விலை உயர்வு மேற்கொள்ளப்படுவதாக அறிவித்துள்ளது.

இந்த 3 சதவீத விலை உயர்வு ஒவ்வொரு கார் மாடலுக்கும், அதன் வகைகளுக்கும் மாறுபடும் என்பது கவனிக்க வேண்டிய ஒன்று.

Kia: பிரபலமான கார் பிராண்டான கியா, அதன் முழு மாடல் விலையிலும் 2% விலை உயர்வை அறிவித்துள்ளது. இந்த விலை உயர்வு 2025 ஜனவரி 1 முதல் அமலுக்கு வருகிறது.

கியா நிறுவனம் இந்த விலை உயர்வை அதிகரித்து வரும் சப்ளை சங்கிலி செலவுகளை ஈடு செய்யவே கொண்டு வருவதாக கூறியது. இந்த சவால்களுக்கிடையே, Kia India நிர்வாகம் பெரும் பகுதி செலவுகளை தனது லாப அளவில் இருந்து சரி செய்துள்ளதாகவும் தெரிவித்துள்ளது.

கடந்த சில மாதங்களாக இந்தியாவில் கார் விற்பனை மோசமாக இருக்கும் காரணத்தால் கார் தயாரிப்பாளர்கள் இந்த பண்டிகை காலத்தில் அதிகப்படியான விற்பனையை பதிவு செய்ய வேண்டும் என்ற கட்டாயத்தில் இருப்பதால் பெரிய தள்ளுபடிகள் மற்றும் கவர்ச்சியான சலுகைகளை வழங்கினர்.

பண்டிகை காலம் முடிந்த உடன், புதிய ஆண்டில், புதிய கார்களை விற்பனை செய்வதற்கு முன் விலையை உயர்த்தியுள்ளது ஆட்டோமொபைல் நிறுவனங்கள்.