டாப் 10 பட்டியலில் இடம்பிடித்த டாடா மோட்டார்ஸ்.. சும்மாயில்ல 51 பில்லியன் டாலர்..!

டாடா குழுமத்திற்கு சொந்தமான டாடா மோட்டார்ஸ் லிமிடெட் நிறுவனம் சர்வதேச அளவிலான மிகவும் மதிப்பு மிக்க முதல் 10 வாகன நிறுவனங்களில் இடம் பிடித்துள்ளது. தொடர்ச்சியாக இந்த நிறுவனத்தின் பங்கு மதிப்பு உயர்ந்து வந்ததே இதற்கு முக்கிய காரணம். சர்வதேச அளவில் மதிப்புமிக்க முதல் 10 வாகன நிறுவனங்களில் இடம் பிடித்திருக்கும் முதல் இந்திய நிறுவனம் என்ற பெருமையும் டாடா மோட்டார்ஸுக்கு கிடைத்துள்ளது.

கடந்த ஆறு மாத காலத்தில் மட்டும் இந்த நிறுவனத்தின் பங்கு மதிப்பு 50 சதவீதம் உயர்ந்துள்ளது. கடந்த 2023 ஆம் ஆண்டில் மட்டும் 101 சதவிகிதம் அதிகரித்துள்ளது தற்போது இந்தியாவில் உள்ள வாகன நிறுவனங்களிலேயே 51 பில்லியன் டாலர் சந்தை மூலதனத்துடன் இருக்கக்கூடிய ஒரே வாகன உற்பத்தி நிறுவனம் இதுவாகும்.

சர்வதேச அளவில் இந்த அதிக மதிப்பு கொண்ட வாகன நிறுவனங்களின் பட்டியலில் முதலிடத்தில் இருப்பது டெஸ்லா, இதன் சந்தை மூலதனம் 711.19 பில்லியன் டாலர்கள். டொயோட்டா மோட்டார்ஸ் 307.50 பில்லியன் டாலர்களுடன் இரண்டாவது இடத்தில் இருக்கிறது. பிஒய்டி நிறுவனம் 92.65 பில்லியனுடன் மூன்றாவது இடத்திலும், ஃபெராரி நிறுவனம் 74.04 பில்லியன் டாலர் சந்தை மூலதனத்துடன் இந்த பட்டியலில் நான்காவது இடத்தில் இருக்கிறது.

மெர்சிடிஸ் பென்ஸின் சந்தை மூலதனம் 71.26 பில்லியன் டாலர்கள், போர்சே நிறுவனம் 68.29 பில்லியன் டாலர்கள் ,பிஎம்டபிள்யூ நிறுவனம் 59.54 பில்லியன் டாலர்கள், ஃபோக்ஸ்வேகன் நிறுவனம் 58.18 பில்லியன் டாலர்கள் சந்தை மூலதனம் கொண்டுள்ளது. இந்த பட்டியலில் ஹோண்டா மோட்டார் நிறுவனம் 56.12 பில்லியன் டாலர்களுடன் இருக்கிறது.

தற்போது டாடா மோட்டார்ஸ் இந்த பட்டியலில் 10ஆவது இடம் பிடித்துள்ளது. டாடா மோட்டார்ஸ் நிறுவனம் ஜெனரல் மோட்டார்ஸ், மாருதி சுசுகி, மகேந்திரா மகேந்திரா,ஃபோர்ட் , ஹூண்டாய் மோட்டார் உள்ளிட்ட நிறுவனங்களை எல்லாம் பின்னுக்கு தள்ளி இந்த பட்டியலில் முன்னேறியுள்ளது. டாடா மோட்டார்ஸ் நிறுவனத்தின் பங்கு மதிப்புகள் கடந்த மூன்று ஆண்டுகளில் பல மடங்கு அதிகரித்துள்ளது.

இந்தியாவில் தற்போது மின்சார கார்களுக்கான பிரிவில் டாடா மோட்டார்ஸ் நிறுவனம் முன்னணியில் இருக்கிறது. அதே வேளையில் டாடா குழுமத்தில் லாபகரமான நிறுவனமாகவும் டாடா மோட்டார்ஸ் தற்போது செயல்பட்டு வருகிறது .அண்மையில் நோமுரா உள்ளிட்ட பல்வேறு தரகு நிறுவனங்கள் இந்த பங்கினை வாங்கலாம் என பரிந்துரை செய்துள்ளன. ஜூலை 31ஆம் தேதி டாடா மோட்டார்ஸின் நிறுவன பங்கு 1159 ரூபாய் என வர்த்தகமானது.

Story Written by: Devika