வெறும் 34 கோடி போட்டு 2300 கோடி அள்ளிய டாடா மோட்டார்ஸ்.. டாடா டெக்னாலஜிஸ் ஐபிஓ-வில் 67 மடங்கு லாபம்

டாடா டெக்னாலஜிஸ் ஐபிஓ-வின் கடைசி நாள் இன்று, 2 ரூபாய் முக மதிப்பில் 475- 500 ரூபாய் விலை பட்டியலில் அறிமுகம் செய்யப்பட்ட நிலையில் முதலீட்டாளர்களின் ஏகோபித்த வரவேற்பைப் பெற்று 6.08 கோடி பங்குகளுக்குச் சுமார் 15.10 மடங்கு அதிக முதலீட்டைப் பெற்று அசத்தியுள்ளது. அடுத்த சில வருடங்களுக்கு ஐபிஓ சூப்பர்ஸ்டார் என்றால் டாடா டெக்னாலஜிஸ் தான் என்று கூறும் அளவுக்குச் சாதனைப்படைத்துள்ளது.

இந்த நிலையில் டாடா டெக்னாலஜிஸ் நிறுவனத்தின் ஐபிஓ-வில் அதிகப்படியான லாபம் பார்த்தது யாரு என்றால் கட்டாயம் அது டாடா மோட்டார்ஸ் தான். இந்த ஐபிஓ-வில் டாடா டெக்னாலஜிஸ் சுமார் 6.08 கோடி பங்குகளை விற்பனை செய்யும் வேளையில், இதில் டாடா மோட்டார்ஸ் மட்டுமே 4.63 கோடி டாடா டெக்னாலஜிஸ் பங்குகளை விற்கிறது.

டாடா டெக்னாலஜிஸ் நிறுவனத்தின் பெரும் பகுதி பங்குகளை 1996 ஆம் ஆண்டு டாடா மோட்டார்ஸ் நிறுவனம் வாங்கித் தனது பங்கு இருப்பை 64.79 சதவீதமாக வைத்திருந்தது. அப்போது வெறும் 7.4 ரூபாய்க்கு வாங்கப்பட்ட பங்குகள் தற்போது 500 ரூபாய்க்கு விற்கப்படுகிறது.

இந்த ஐபிஓ-வில் டாடா மோட்டார்ஸ் விற்கும் 4.63 கோடி டாடா டெக்னாலஜிஸ் பங்குகளின் அப்போதைய விலை வெறும் 34 கோடி ரூபாய் மட்டுமே, ஆனா இப்போது இதன் மதிப்பு 2300 கோடி ரூபாய் . இதன் மூலம் டாடா மோட்டார்ஸ் 1996 ஆம் ஆண்டு முதலீடு செய்த பணத்திற்கு இப்போது 67 மடங்கு லாபத்தைப் பதிவு செய்துள்ளது.

இந்த ஐபிஓ மூலம் டாடா டெக்னாலஜிஸ் நிறுவனத்தில் டாடா மோட்டார்ஸ்-ன் பங்கு இருப்பு 64.79 சதவீதத்தில் இருந்து 53.39 சதவீதமாக மட்டுமே சரிய உள்ளது. ஐபிஓ-வுக்குப் பின்பும் டாடா மோட்டர்ஸ் அதிகப்படியான பலன்களை அனுபவிக்க உள்ளது என்றால் மிகையில்லை.

டாடா டெக்னாலஜிஸ் ஐபிஓ-வில் QIB பிரிவில் ஒதுக்கப்பட்ட பங்குகளுக்கு 8.55 மடங்கு முதலீடும், NII பிரிவுக்கு 31.19 மடங்கும், ரீடைல் பிரிவுக்கு 11.56 மடங்கும், ஊழியர்களுக்கு ஒதுக்கப்பட்ட பங்குகளுக்கு 2.47 மடங்கும், இதர பிரிவுகளுக்கு ஒதுக்கப்பட்ட பங்குகளுக்கு 20.48 மடங்கு என மொத்தமாக 6.08 கோட் பங்குகள் 15.10 மடங்கு முதலீடு குவிந்துள்ளது.

நவம்பர் 24 ஆம் தேதி ஐபிஓ முடியும் வேளையில், அலாட்மென்ட் நவம்பர் 30 ஆம் தேதி நடக்கும், அலாட்மென்ட் கிடைக்காத முதலீட்டாளர்களுக்கான ரீபண்ட் டிசம்பர் 1 ஆம் தேதி துவங்கும், முதலீட்டாளர்களின் டிமேட் கணக்கில் வரவு வைக்கப்படும் பணிகள் நவம்பர் 4 ஆம் தேதி துவங்கும், பங்குச்சந்தையில் டிசம்பர் 5 ஆம் தேதி செவ்வாய்க்கிழமை பட்டியலிடப்படும்.