காசே இல்லனு சொல்றாங்க..! ஆனா கார் வாங்கி குவிக்கிறாங்க..! அதுவும் இந்த காருக்கு தான் டிமாண்டே!!

2026ஆம் ஆண்டின் முதல் மாதத்தில் இந்தியாவின் கார் விற்பனையில் டாடா நெக்ஸான் முதலிடம் பிடித்து சாதனை படைத்துள்ளது. தனது அதிகபட்ச விற்பனையைப் பதிவு செய்து, மாருதி சுஸுகி டிசையரை விஞ்சி, எஸ்யூவி மாடல்களின் ஆதிக்கத்திற்கு வலு சேர்த்துள்ளது.

ஜனவரி மாதத்தில் டாடா நெக்ஸான் கார்கள் 23,365 யூனிட்கள் விற்பனையாகி, இந்திய சந்தையில் அறிமுகப்படுத்தப்பட்டதிலிருந்து தனது அதிகபட்ச மாதாந்திர விற்பனையைப் பதிவு செய்தது. மாருதி சுஸுகி டிசையர் 19,629 யூனிட்களை விற்ற நிலையில், நெக்ஸான் அதை முந்தியது. மேலும், நெக்ஸான் தனது மொத்த விற்பனையில் 10,00,000 யூனிட்கள் என்ற முக்கிய மைல்கல்லை எட்டியுள்ளது.

டாடா பன்ச் எஸ்யூவி ஜனவரியில் 19,257 யூனிட்களுடன் தனது சிறந்த மாதாந்திர விற்பனையைப் பதிவு செய்தது. டாடா நெக்ஸானைப் போலவே, பன்ச் மாடல் காரும் உச்ச விற்பனையைக் கண்டது. பன்ச் நான்கு ஆண்டுகள் மூன்று மாதங்களுக்குள்ளாகவே 7,00,000 யூனிட்கள் என்ற ஒட்டுமொத்த விற்பனை மைல்கல்லை கடந்துள்ளது.

இந்தியாவின் பயணிகள் வாகனச் சந்தையில், எஸ்யூவி பிரிவின் சந்தைப் பங்கு கிட்டத்தட்ட 55% ஆக உயர்ந்து வலுவான ஆதிக்கம் செலுத்துகிறது. மஹிந்திரா அண்ட் மஹிந்திரா, டாடா மோட்டார்ஸ், மாருதி சுஸுகி இந்தியா, ஹூண்டாய் மோட்டார் இந்தியா போன்ற முன்னணி நிறுவனங்கள் இந்த பிரிவில் முன்னிலை வகிக்கின்றன.

முதல் பத்து விற்பனைப் பட்டியலில் டாடா நெக்ஸான் தவிர ஐந்து எஸ்யூவி மாடல்கள் இருந்தன. ஆனால், எஸ்யூவி அல்லாத மாடல்களில் மாருதி சுஸுகியின் டிசையர் செடான், ஸ்விஃப்ட், பலேனோ ஹேட்ச்பேக், மற்றும் எர்டிகா MPV மட்டுமே இடம்பிடித்தன. டாடா மற்றும் ஹூண்டாய் நிறுவனங்களிடம் இத்தகைய வாகனங்கள் இருந்தும், மாருதியின் ஆதிக்கம் வியப்பை ஏற்படுத்துகிறது.

நெக்ஸானும், டிசையரும் 2026 ஆம் ஆண்டின் தொடக்கத்தை சிறப்பாக அமைத்துக் கொண்டன. இது 2025 ஆம் ஆண்டிலும் அவற்றின் வலுவான ஆதிக்கத்தை தொடர்ந்தது. அப்போது டிசையர் சுமார் 2,14,000 யூனிட்களையும், நெக்ஸான் 2,02,000 யூனிட்களையும் விற்று, ஆண்டு விற்பனையில் சாதனைப் படைத்தன.

மற்ற முக்கிய விற்பனைப் புள்ளிகளில், ஹூண்டாய் கிரெட்டா (17,921 யூனிட்கள்), மாருதி சுஸுகி எர்டிகா MPV (17,892 யூனிட்கள்) மற்றும் மாருதி சுஸுகி ஸ்விஃப்ட் ஹேட்ச்பேக் (17,806 யூனிட்கள்) ஆகியவை அடங்கும். இந்த மாடல்கள் பயணிகள் வாகனச் சந்தையில் அவற்றின் முக்கியத்துவத்தை உறுதிப்படுத்துகின்றன.

அத்துடன், மாருதி சுஸுகி பிரெஸ்ஸா எஸ்யூவி 17,486 யூனிட்களையும், பலேனோ ஹேட்ச்பேக் 16,782 யூனிட்களையும், மஹிந்திரா ஸ்கார்பியோ (என் மற்றும் கிளாசிக் உட்பட) 15,542 யூனிட்களையும், மாருதி சுஸுகி விக்டோரிஸ் எஸ்யூவி 15,240 யூனிட்களையும் விற்று முதல் பத்து பட்டியலை நிறைவு செய்தன.

அதிக கார்களை விற்பனை செய்த நிறுவனமாக மாருதி சுஸுகி இன்னும் தக்க வைத்து கொண்டிருக்கிறது. அதிகம் விற்பனையான கார்களின் பட்டியலில் பெரும்பான்மையானவை மாருது சுஸுகிக்கு சொந்தமானவை.