ஐடி ஊழியர்களுக்கு ஷாக் கொடுத்த டிசிஎஸ்.. வெறும் 22,600 ஊழியர்களுக்கு மட்டுமே வேலை..!

மார்ச் காலாண்டு முடிவில் டிசிஎஸ் நிறுவனத்தின் உலகளாவிய ஊழியர்கள் எண்ணிக்கை 6,14,795 ஆக உயர்ந்துள்ளது முக்கியமான விஷயமாக பார்க்கப்படுகிறது. இதற்கு முக்கிய காரணம் டிசம்பர் காலாண்டில் எப்போதும் இல்லாத வகையில் டிசிஎஸ் நிறுவனத்தில் ஊழியர்கள் எண்ணிக்கை 2,197 குறைந்தது.

இது ஐடி ஊழியர்கள் மத்தியில் அச்சத்தை ஏற்படுத்திய நிலையில் தான் அமெரிக்கா, ஐரோப்பாவில் வங்கிகள் திவாலான நிலையில் BFSI பிரிவில் அதிக வர்த்தகத்தை கொண்டு இருக்கும் இந்திய ஐடி நிறுவனங்கள் பாதிக்கும் என கணிப்புகள் வெளியானது.

ஆனாலும் மார்ச் காலாண்டில் முந்தைய எண்ணிக்கையை காட்டிலும் மொத்த ஊழியர்கள் எண்ணிக்கை 821 அதிகரித்துள்ளது. இதன் மூலம் உலகளாவிய டிசிஎஸ் ஊழியர்கள் எண்ணிக்கை 6,14,795 ஆக உயர்ந்தது. மேலும் மார்ச் காலாண்டில் டிசிஎஸ் அட்ரிஷன் அளவு 1.2 சதவீதம் குறைந்து 20.1 சதவீதமாக உள்ளது.

2022 ஆம் நிதியாண்டில் 1.3 லட்சம் ஊழியர்களை சேர்ந்த நிலையில், 2023 ஆம் நிதியாண்டில் வெறும் 22,600 ஊழியர்களை மட்டுமே டிசிஎஸ் சேர்த்துள்ளது. இதன் மூலம் ஐடி துறையில் புதிய வேலைவாய்ப்புகள் எண்ணிக்கை எந்த அளவுக்கு இருக்கும் என்பது இதில் இருந்தே ஐடி ஊழியர்களும் தெரிந்துக்கொள்ள முடியம்.

2023 ஆம் நிதியாண்டில் டிசிஎஸ், 4 காலாண்டிலும் சேர்ந்து சுமார் 2.25 லட்சம் கோடி ரூபாய் வருவாய் பெற்றுள்ளது, இது கடந்த நிதியாண்டில் 1.91 லட்சம் கோடி ரூபாயாக இருந்தது குறிப்பிடத்தக்கதது.

மேலும் 2023 ஆம் நிதியாண்டில் டிசிஎஸ் சுமார் 42,303 கோடி ரூபாய் அளவிலான லாபத்தை பதிவு செய்துள்ளது, இது கடந்த நிதியாண்டில் 38,449 கோடி ரூபாயாக இருந்தது என டிசிஎஸ் இன்று மார்ச் காலாண்டு அறிக்கையை வெளியிடும் போது தெரிவித்தது.

அமெரிக்கா, ஐரோப்பாவில் வங்கிகள் திவாலான நிலையில் BFSI பிரிவில் அதிக வர்த்தகத்தை கொண்டு இருக்கும் டிசிஎஸ் காலாண்டு முடிவுகளை ஐடி ஊழியர்கள் மட்டும் இல்லாமல் ரீடைல் முதலீட்டாளர்கள் என அனைத்து தரப்பினரும் காத்திருந்தனர்.

மார்ச் காலாண்டில் டிசிஎஸ் நிறுவனத்தின் மொத்த லாபம் கடந்த ஆண்டை ஒப்பிடுகையில் 14.8 சதவீதம் அதிகரித்து 11, 436 கோடி ரூபாயாக உயர்ந்துள்ளது. இதேபோல் மொத்த வருமானம் 16.9 சதவீதம் வளர்ச்சி அடைந்து 59,162 கோடி ரூபாயாக உள்ளது.