TCS: லஞ்சம் வாங்கிய 15 பேர் அதிரடி பணிநீக்கம்.. புதிய தலைவர் நியமனம்.. யார் இந்த சிவகுமார்..?!

இந்திய ஐடி சேவை துறையை மொத்தமாக புரட்டிப்போட்ட டிசிஎஸ் நிறுவனத்தில் லஞ்சம் வாங்கிக்கொண்டு ஊழியர்களை பணியில் அமர்த்திய செய்தி பெரும் அதிர்ச்சியை ஏற்படுத்தியது. ஏற்கனவே புதிய வேலைவாய்ப்புகள் அதிகளவில் உருவாகாமல் இருக்கும் காரணத்தால் பல பட்டதாரிகள் வேலைவாய்ப்பு இல்லாமல் மாட்டிக்கொண்டு இருக்கின்றனர்.

இந்த நிலையில் லஞ்சம் வாங்கி கொண்டு வேலைவாய்ப்பை கொடுத்த புகார், அதை தொடர்ந்த விசாரணை ஆகியவற்றின் மூலம் டிசிஎஸ் நிர்வாகம் சுமார் 15 நிர்வாக அதிகாரிகள் பணிநீக்கம் செய்யப்பட்டு உள்ளதோடு, 8 staffing நிறுவனங்களை பிளாக்லிஸ்ட் செய்யப்பட்டு உள்ளது.

இந்த நிலையில் தற்காலிக ஒப்பந்த ஊழியர்களை வெளியில் இருந்து தேர்வு செய்து, ப்ராஜெக்ட்களில் பணியில் அமர்த்தும் முக்கிய வர்த்தக பிரிவான Resource Management Group-ன் தலைவர் பொறுப்பில் புதிதாக சிவகுமார் என்பவரை சிஇஓ கே கிருதிவாசன் தலைமையிலான நிர்வாகம் நியமித்துள்ளது.

டிசிஎஸ் நிறுவனத்தில் சுமார் 30 வருடமாக பணியாற்றி வரும் சிவகுமார் விஸ்வநாதன் என்பவரை Resource Management Group-ன் புதிய தலைவராக நியமிக்கப்பட்டு உள்ளார். இனி இவர் தலைமையிலான குழு தான் ஒப்பந்த ஊழியர்களை வெளியில் இருந்து தேர்வு செய்து, ப்ராஜெக்ட்களில் பணியில் அமர்த்தும் முக்கிய பணியை செய்ய உள்ளது.

மேலும் டிசிஎஸ் நிர்வாகம் பிளாக்லிஸ்ட் செய்யப்பட்டு உள்ள 8 Staffing நிறுவனங்கள் உடன் இனி வரும் காலத்தில் எவ்விதமான வர்த்தகங்களையும் தொடர்புகளையும் வைத்துக்கொள்ளாது என்பது முக்கியமான விஷயம். மேலும் இந்த 8 Staffing நிறுவனங்கள் இனி சக போட்டி நிறுவனங்கள் உடன் பணியாற்ற முடியும் என்பதால் இது டிசிஎஸ்-க்கு பின்னடைவாக அமையலாம்.

மார்ச் மாத இறுதியில் டிசிஎஸ்-ன் மொத்த ஊழியர்கள் எண்ணிக்கை 6,14,795 பேர். கடந்த ஆண்டில் மட்டும் சுமார் 22,600 பேர் புதிதாக சேர்க்கப்பட்டு உள்ளனர், இதோடு நிறுவனத்தின் அட்ரிஷன் விகிதம் 20.1 சதவீதம். டிசிஎஸ் நிறுவனத்தின் மொத்த சந்தை மதிப்பு 11.7 லட்சம் கோடி ரூபாய்.

சிவகுமார் விஸ்வநாதன் தற்போது புதிய டிசிஎஸ் சிஇஓ கே கிருதிவாசன்-க்கு மிகவும் நெருக்கமானவர்.