19வயது சிறுவனை டிவிட்டரில் பிளாக் செய்த எலான் மஸ்க்.. ஏன் தெரியுமா..?!

எலான் மஸ்க் இந்தப் பெயரே தற்போது மிகப்பெரிய பிராண்டாக மாறியுள்ள நிலையில், எலான் மஸ்க் செய்யும் ஒவ்வொரு விஷயமும் தற்போது உலகளவில் டிரெண்டாகி வருகிறது. சமீபத்தில் எலான் மஸ்க் அமெரிக்க அதிபர் ஜோ பைடன் அமெரிக்காவில் எலக்ட்ரிக் கார்களின் எதிர்காலம் குறித்துப் பேசுகையில் டெஸ்லா நிறுவனத்தின் பெயரை பைடன் குறிப்பிடவில்லை.

இதற்கு எலான் மஸ்க் ஜோ பைடன் டிவிட்டர் கணக்கில் கடுமையாக விமர்சனம் செய்தார், இதற்குப் பலரும் ஆதரவு தெரிவித்தனர். இந்நிலையில் டெக் உலகின் இன்றைய சூப்பர் ஸ்டாராக விளங்கும் எலான் மஸ்க் வெறும் 19 வயது சிறுவனைத் தனது டிவிட்டர் கணக்கில் பிளாக் செய்துள்ளார்.

எலான் மஸ்க்

உலகையே புரட்டிப்போடும் டெஸ்லா மற்றும் ஸ்பேஸ்எக்ஸ் ஆகிய இரு நிறுவனத்தின் தலைவரான எலான் மஸ்க் டிவிட்டரில் எவ்வளவு ஆக்டிவாக இருக்கிறார் என்பது அனைவருக்கும் தெரியும், இந்நிலையில் 19 வயது மட்டுமே ஆன ஜாக் ஸ்வீனி என்பவரை டிவிட்டரில் பிளாக் செய்துள்ளார்.

எலான் மஸ்க் பிளாக் செய்யும் அளவுக்கு ஜாக் ஸ்வீனி என்ன செய்தார்..?

யார் இந்த ஜாக் ஸ்வீனி

ஜாக் ஸ்வீனி உலகின் முன்னணி தொழிலதிபர்கள், பிரபலங்கள் மற்றும் அரசியல் தலைவர்களின் பிரைவேட் ஜெட் விமானத்தின் இருப்பிடத்தையும், அந்த விமானம் எங்கெல்லாம் செல்கிறது என்பது குறித்து டிவிட்டரில் தொடர்ந்து பாட் மூலம் டிவீட் செய்து வருகிறார்.

கல்ப்ஸ்ட்ரீம் விமானம்

இதில் எலான் மஸ்க்-ன் பிரைவேட் ஜெட் கல்ப்ஸ்ட்ரீம் விமானமும் அடக்கம். இப்படி விமானம் எங்குச் செல்கிறது, எங்கு இருக்கிறது என்பது குறித்து ரியல் டைம் டேட்டாவை ஜாக் ஸ்வீனி டிவிட்டரில் பதிவு செய்து வருகிறார்.

@ElonJet கணக்கு

எலான் மஸ்க் இது தனது பாதுகாப்பிற்கு ஆபத்து என்பதால் ஜாக் ஸ்வீனி-யிடம் தனது விமானத்தின் இருப்பிடத்தைப் பதிவிடும் @ElonJet டிவிட்டர் கணக்கை மூட நவம்பர் 2021ல் வேண்டுகோள் விடுத்தார். இதுமட்டும் அல்லாமல் @ElonJet கணக்கை மூடுவதற்கு 5000 டாலர் தருவதாகவும் எலான் மஸ்க் கூறினார்.

50000 டாலர் வேண்டும்

5000 டாலரை பெற மறுத்த ஜாக் ஸ்வீனி தனது கல்லூரி கட்டணத்திற்கும், புதிய டெஸ்லா கார் வாங்குவதற்கும் 50000 டாலர் வேண்டும் என கேட்ட நிலையில், எலான் மஸ்க் மவுனம் காத்த நிலையில் பல கட்ட விவாதத்திற்குப் பின்பு, ஜாக் ஸ்வீனி ஜனவரி 26ஆம் தேதி பணத்திற்குப் பதில் நிறுவனத்தில் இன்டர்ன்ஷிப் கேட்டார் ஜாக் ஸ்வீனி.

டிவிட்டரில் பிளாக்

இந்நிலையில் தற்போது எலான் மஸ்க் டிவிட்டரில் எவ்விதமான பதிலும் தெரிவிக்காமல் ஜாக் ஸ்வீனி-ஐ பிளாக் செய்துள்ளார். மேலும் எலான் மஸ்க்-யிடம் ஜாக் ஸ்வீனி இந்தக் கணக்குகளையும், மென்பொருள் மூலம் இயங்கும் பாட்களையும் தனது பள்ளியில் இருந்து உருவாக்கி வருவதாகவும் தெரிவித்துள்ளார் என்பது குறிப்பிடத்தக்கது.