இந்தியர்களை ஈர்க்க டெஸ்லாவின் புதிய வியூகம்.. மாடல் Y-க்கு இப்படியொரு ஆஃபர் ஆ?

உலகின் முன்னணி மின்சார வாகன உற்பத்தி நிறுவனமான டெஸ்லா, இந்தியச் சந்தையில் தனது இடத்தைப் பிடிக்க ஒரு புதிய வியூகத்துடன் களமிறங்கியுள்ளது. கார் வாங்குபவர்களை ஈர்க்கும் வகையில், டெஸ்லா கார்களின் குறைந்த பராமரிப்பு மற்றும் எரிபொருள் செலவுகளுக்கு முக்கியத்துவம் அளித்து விளம்பரம் செய்து வருகிறது.

$67,000 மாடல் Y: $22,000 சேமிப்பு: டெஸ்லாவின் இந்தியத் தலைவர் புதன்கிழமை வெளியிட்ட அறிக்கையின்படி, டெஸ்லா மாடல் Y இன் ஆரம்ப விலை $67,000 (ரூ.56 லட்சம்) ஆகும். ஆனால், இந்திய வாங்குபவர்கள் இந்த வாகனத்தை வாங்குவதன் மூலம், அடுத்த நான்கு முதல் ஐந்து ஆண்டுகளில் பராமரிப்பு மற்றும் எரிபொருள் செலவுகளில் சுமார் $22,000 (ரூ.18.3 லட்சம்) சேமிக்க முடியும். இது காரின் விலையில் மூன்றில் ஒரு பங்கு என்பது குறிப்பிடத்தக்கது.

இந்தியச் சந்தையின் சவால் 100% இறக்குமதி வரி: இந்தியாவின் 100% இறக்குமதி வரி காரணமாக, டெஸ்லா நிறுவனம் கடந்த ஜூலை மாதம் இறக்குமதி செய்யப்பட்ட மாடல் Y உடன் இந்தியாவிற்குள் நுழைந்தது. இதனால், மற்ற முக்கியச் சந்தைகளை விட இந்தியாவில் இதன் விலை கணிசமாக அதிகமாக உள்ளது.

போட்டி: இந்தியாவில், டெஸ்லா நிறுவனம் மஹிந்திரா & மஹிந்திரா மற்றும் டாடா மோட்டார்ஸ் போன்ற உள்நாட்டுப் போட்டியாளர்களுடனும், SAIC மோட்டார்ஸின் இந்தியப் பிரிவு மற்றும் வியட்நாமிய மின்சார வாகனத் தயாரிப்பாளரான வின்ஃபாஸ்ட் ஆட்டோ போன்ற உலகளாவிய நிறுவனங்களுடனும் போட்டியிடுகிறது.

விலை உணர்திறன்: இந்தியாவின் ஒட்டுமொத்த கார் சந்தையில் சுமார் 5% மட்டுமே மின்சார வாகனங்களின் பங்கு உள்ளது. இந்தியாவில் விற்கப்படும் பெரும்பாலான கார்கள் $22,000 (ரூ.18 லட்சம்) க்கும் குறைவான விலையில் இருப்பதாக ஆய்வாளர்கள் மதிப்பிடுகின்றனர். இந்த விலை உணர்திறன் கொண்ட சந்தையில், டெஸ்லா ஒரு தனித்துவமான, பிரீமியம் மின்சார வாகன சந்தையை இலக்காகக் கொண்டுள்ளது.

விற்பனை மற்றும் சேவை மையங்கள்: இந்திய அரசாங்கப் பதிவுத் தரவுகளின் அடிப்படையில், செப்டம்பரில் டெலிவரிகளைத் தொடங்கியதிலிருந்து, டெஸ்லா இந்தியாவில் 100 மாடல் Y கார்களுக்கு மேல் விற்பனை செய்துள்ளது.

குருபிராம் மையம்: டெஸ்லாவின் இந்தியப் பொது மேலாளர் ஷரத் அகர்வால், குருகிராமில் நடைபெற்ற நாட்டின் மிகப்பெரிய விற்பனை மற்றும் சேவை மையத் திறப்பு விழாவில் இந்தத் தகவல்களைத் தெரிவித்தார்.

குறைந்த இயக்கச் செலவுகள்: இந்திய வாடிக்கையாளர்கள் பெட்ரோல் விலையுடன் ஒப்பிடும்போது டெஸ்லாவை பராமரிப்பதற்கான குறைந்த செலவு மற்றும் மின்சாரத்தை கருத்தில் கொண்டால், நான்கு முதல் ஐந்து ஆண்டுகளில் சுமார் $22,000 சேமிக்க முடியும் என்று அவர் குறிப்பிட்டார்.

மென்பொருள் புதுப்பிப்புகள்: "டெஸ்லா பராமரிப்பு அட்டவணையை வழங்குவதில்லை. ஏனெனில் பெரும்பாலான சேவை மென்பொருள் புதுப்பிப்புகள் மூலம் தொலைதூரத்தில் செய்யப்படுகிறது. இது உரிமைச் செலவைக் குறைக்கிறது என்றும் அவர் கூறினார். மேலும், வீட்டில் சார்ஜிங் செய்யும் செலவு பெட்ரோல் விலையில் பத்தில் ஒரு பங்கு மட்டுமே என்றார்.

சூப்பர்சார்ஜர் நெட்வொர்க்: நவம்பர் தொடக்கத்தில் டெஸ்லாவில் இணைந்த ஷரத் அகர்வால், இதற்கு முன்பு இந்தியாவில் சொகுசுக் கார் தயாரிப்பாளரான லம்போர்கினியின் தலைவராக இருந்தார். அவரது அனுபவம் டெஸ்லாவின் இந்தியச் செயல்பாடுகளுக்குப் பெரிய பலமாக அமையும் என்று எதிர்பார்க்கப்படுகிறது.

டெஸ்லா நிறுவனம் மும்பை, டெல்லி மற்றும் குருகிராம் போன்ற முக்கிய நகரங்களில் தனது சூப்பர்சார்ஜர் நெட்வொர்க்கை படிப்படியாக விரிவுபடுத்தி வருகிறது. இது இந்திய மின்சார வாகன உள்கட்டமைப்பிற்கு மேலும் வலு சேர்க்கும். டெஸ்லா, அதன் தனித்துவமான தொழில்நுட்பம் மற்றும் சுற்றுச்சூழல் நட்பு அணுகுமுறையுடன் இந்தியச் சாலைகளில் ஒரு புரட்சியை உருவாக்குமா என்பதைப் பொறுத்திருந்துதான் பார்க்க வேண்டும்.